Hádegishlaup 10. apríl 2013

Mættir:  Dagur, Guðni, Ívar, Ólafur

Leið:  HLL-Való-HLL samtals 10k

Veður:  Kalt en fallegt og fínt á leiðinni til baka

GI

Hádegisæfing 09.04.'13

Mættir á pinna:
Jón Örn, Dagur, Oddgeir, Jón Gunnar Geirdal-aka Mr. Lemon, Huld og Sigrún.
Fórum Suðurgötu með 2*2000m@mp.  Hvað það þýðir á íslensku veit enginn.  Æfingin var hin skemmtilegasta og sumarveður (rugl veður) í boði. Við mikinn fögnuð Dags fengu tvibbarnir nýtt nafn, eða Snuðra og Tuðra, og eru það réttnefni. Alls um 8 km.

Þórdís og sæluhúsið lögðu af stað löngu áður en þau máttu.  Þau fóru um Hofsvallagötu og fóru létt meða.

SBN

Afmælishlaup Bjögga Bjútí-s

Í dag var hlaupið til heiðurs BB, sem varð 39 ára í dag, einmitt á afmæli sínu.  Ótrúlegt en satt.  Hann fékk hádegisleyfi frá Belgjagerðinni og skokkaði tindilfættur með okkur niður í bæ um æskuslóðir sínar í Töfluholti, Pilluholti, Lyfjabrunni...Nei, Meðal(a)holti, hvar hann sleit barnsskóm sínum að hluta til.  Það hús virtist nú í eyði.  Síðan var haldið niður í bæ um Rauðarárstíg og Laugaveg og um Austurvöll og Hljómskálagarð.  Meðfylgjandi mynd er tekin þar hjá honum Jónasi okkar.  Hlupum síðan heim á hótel og göntuðumst við afmælisbarnið og fleiri.
Toppmæting í blíðunni:
Þórdís, Huld (myndasmiður), Ívar, Jón Örn, Guðni, Dagur, Oddgeir, Sigrún og Björgvin sjálfur.
Alls um 8km
Góða helgi, ;)

SBN

Til upplýsinga fyrir kvenkynsmeðlimi skokkklúbbsins - Kynning á íþróttabúnaði

Við vorum beðin um að koma eftirfarandi upplýsingum á framfæri við kvenkynsmeðlimi skokkklúbbsins:

"Í tilefni af því að við vorum að taka í sölu verðlauna íþróttabrjóstarhaldara frá Panache, viljum við bjóða konum í skokkhópi Icelandair, á kynningarkvöld í Selenu fimmtudaginn 11. apríl frá kl. 18-20.

Við tökum vel á móti ykkur, léttar veitingar í boði og 20% kynningarafsláttur.

Þessi einstaki íþróttahaldari frá Panache minnkar hreyfingu brjósta um 83% og veitir þessi verðlauna hönnun hámarks stuðning og þægindi. Sjá meðfylgjandi fylgiskjal með nánari upplýsingum.

Við vonumst til að sjá sem flestar í versluninni Selenu, bláu húsunum við Faxafen (Suðurlandsbraut 50).

Kær kveðja,
Bryndís
S: 553-7355 og 695-4999"

Hádegisæfing 4.4.2013

Góðir hálsar.
Mættir voru Dagur, Óli og undirrituð.  Veður var með eindæmum gott, Valhúsahæðarhringurinn tekinn og umræðuefnið of krassandi til birtingar.  Frábær æfing í enn betri félagsskap.
Alls 10km
SBN
Filippus Bragi

Hádegisæfing 3. apríl

Mættir:
Ársæll, já fínt, já sæll...Þórdís og Anna Dís í forstarti á eigin vegum.
Hinir:
Oddur (nýliði), Gamle Ole, Dagur tískudrós, Huld, Sigrún, Bjöggi Bjútí og Johnny.  Fórum Framnesveg í 3-2-1 æfingu sem ekki má enskuskjóta.  Þrír kílómetrar á hálfmaraþonskeppnishraða, tveir kílómetrar á 10 kílómetrakeppnishraða og 1 kílómetri á 5 kílómetraog þiðþekkiðframhaldiðkeppnishraða. Frábært veður var og mikill ánægjuauki að sjá hversu prúðbúnir sumir komu til æfinganna.  Eftir kafla tvö féllu þessi frómu orð frá Óla (tekin úr bókmenntahorni Bob Morans):  "Mann, mann. Ich bin gespannt wie ein Regenschirm".  Túlki það hver á sinn hátt.
Alls  9,8km
Góðar stundir-SBN

Hádegishlaup 2. apríl 2013

Flestir gleymdu að hlaupa apríl. 

Þess í stað var tekin æfing gærdagsins í boði Viktors, 8*500m á 1:45-1:55.  Með Viktori hlupu Dagur og Guðni.  Ársæll og Þórdís voru fulltrúar S&M og fór á undan.

GI

Hádegisæfing 26. mars

Margt var í gangi í dag, jarðhræringar og ýmislegt fleira.  Mættir á pinnan: Ársæll sem vildi einveru, Ívar sem vildi fara stutt, Dagur, Guðni og Huld ásamt undirritaðri, sem vildu fara langt.  Allt fyrir mennina. Fórum Háskólaleiðina vestur í bæ og Seltjarnarnesið sunnanvert.  Sögð var sagan af Gunnlaugi ormstungu og niðjum hans, við einhvern fögnuð.  Erfitt er samt að setja sig í spor sagnapersónunnar enda ekki á allra færi að gera slíkt.  Mikil veðurblíða og vor í lofti gáfu von um góða hlaupatíð framundan.
Alls um 10k
Kveðja-SBN

Þekktu félagsmanninn

Vegna fjölda áskorana er hér gerð tilraun til að endurvekja þennan skemmtilega getraunaþátt.  Hann gengur út á það að grafa upp gamla mynd af félags-manni/mönnum og leyfa öðrum að giska á af hverjum myndin er.  Allar myndir eru vel þegnar, sér í lagi gamlar  og torkennilegar.
Á þessari mynd, sem fulltrúa ritara áskotnaðist óvænt í dag, getur að líta tvo félagsmenn.  Þriðji aðilinn er ekki félagsmaður en þó nátengdur öðrum félagsmannanna.  Hér nægir að nefna eiginnöfn félagsmannanna.  Greinilegt er á myndinni að mikil gleði er ríkjandi.
Kveðja,
SBN

Tískuhorn BB

Þegar vetri er tekið að halla og vorið er smám saman að taka yfir er nauðsynlegt að endurvekja tískuhorn Bjögga Bjútís, eða Bjögga Broncos, ef menn vilja það heldur.  Sá sem verðugastur er til sýningarstarfanna var að sjálfsögðu eðalhlauparinn og nýliði hópsins, Þórólfur Þórsson, sem nýverið tók til starfa hjá grúppunni.  Mætti hann til æfinga í dag í fyrirmyndarklæðnaði til æfinga, fullkomlega stíliseraður með litapallettu sem hæfir vori.  Punkturinn yfir i-ið var svo límónugræna bakstykkið sem passaði áreynslulaust við hýrlegar skóreimarnar. Jafnvel hanskarnir stungu ekki í stúf við faglega samsett litavalið. Svona einstaklingar eru til fyrirmyndar fyrir ímynd hópsins og ber sérstaklega að hlúa að ímyndarsköpun og framtíðar fyrirsætustörfum, vilji menn festa sig í sessi sem stefnumarkandi á slíkum vettvangi.  Mörgum sögum fer af hlaupagetu pilts og óþarfi er að fjölyrða um það hér.  Verkin eru látin tala, eins og sést á meðfylgjandi myndum. Búast má við að annríki verði á umboðsskrifstofu pilts næstu daga en umboðsaðili hans er Huld Konráðsdóttir, myndasmiður.  Textahöfundur biðst hinsvegar forláts á framhleypni sinni við ritstörfin en ekki var unnt að bíða með þessa frétt. :)
SBN

Hádegisæfing 25. mars 2013

Mættir: 
Anna Dís, Ársæll, Dagur, Guðni, Gylfi (gestur hálfa leið), Huld, Jón Örn, Sigrún, Sveinbjörn, Þórólfur

Í boði voru nokkrar leiðir rangsælis í kringum flugvöllinn.  Veðrið var þannig að bæði sáust sólgleraugu og stuttbuxur.  Þá voru á leiðinni teknar ljósmyndir fyrir tískuhornið.  Þeim verður örugglega gerð góð skil á næstu dögum.

GI

Hádegisæfing 21. mars

Mættir: Sveinbjörn, Óli og Sigurgeir.

Sveinbjörn fór sér á meðan aðrir fóru Hofs.

Umræðan í dag var kolvetniskúrar/lágkolvetnamataræði (LCHF). Vorum við sammála því að slíkir megrunarkúrar eru ekki til hins betra og mælum við með þvi að fólk hreyfi sig og gæti hófs í mat og drykk.

Kveðja,
Sigurgeir

Hádegisæfing 20. mars

Mættir: Dagur, Ívar og Sigurgeir.

Hópnum var skipt í tvennt, Icelandair og Cargo. Annar hópurinn fór Hofs með styttingu á meðan hinn hópurinn fór fulla Hofs + perra. Svo sameinuðust hópanir við Suðurgötu og fóru saman restina.

Kveðja,
Sigurgeir

Hádegisæfing 19. mars 2013

"Hér er bara einn", sagði eini hlauparinn fyrir utan Síams, við mætingu.  "Hver er þessi eini?", var spurt til baka. 
Svona gerast kaupin á eyrinni í dag.  Allavega var sett á þriggjamannanefnd til þess að leiða málið til lykta og úr varð að Dagur og Huld tóku æfingu gærdagsins (míns) sem samanstóð af 10* 2 mín. sprettum (um og yfir 500m) með 1 mín. skokkhvíld á milli.  SBN lék hinsvegar hlutverk þess sem lætur sér fátt um finnast og hljóp bara í kantinum, á skjön við raunveruleikann, og var stundum náð og stundum ekki.  Á svona stundum getur skipt höfuðmáli að eiga jafn þéttriðið stuðningsnet og raun ber vitni og ber að þakka fyrir það, sérstaklega.  Takk! ;)
Alls um 9k hjá öllum
Bless.
SBN

Heyrt á hlaupum:
"Hey, áttu gel?" "Nei, ég borðaði það í hádegismat"!  "En í morgun, hvað borðaðirðu þá"?  "Annað gel, ekki það sama og í hádeginu".  "Hugsarðu bara um mat"?  "Já"............

Hádegi 18. mars 2013

Mættir:  Anna Dís, Ársæll, Dagur, Guðni og Ívar

Allir fóru Hofsvallagötu í fallegu en köldu veðri.  Félagsmenn höfðu ýmist verið á uppskeruhátíð Powerade vetrarraðhlaupsins eða á árshátið Icelandair Group nema Anna Dís, hún var á báðum stöðum.

Þessir félagsmenn og viðhengi fóru heim með verðlaun frá uppskeruhátíðinni:

Anna Dís, 3. sæti í flokki
Ása, 1. sæti í flokki og 3. sæti kvenna
Huld, 1. sæti í flokki
Sigrún, 3. sæti í flokki
Viktor, 3. sæti í flokki

Flottur árangur.

GI

Hádegisæfing 14. mars

Mættir Ólafur og Dagur.

Seltjarnarnes í frísku tempói, 4:50, rúmir 10k.

Áköf umræða um ofnotkun orðsins "forréttindi".

Kveðja,
Dagur

Hádegisæfing 13. mars ´13

Mættir: Ívar og Dagur og síðan "special appearance" frá Síams.
Fórum Hofsvallagötuna í miklu blíðviðri og sól.  Ívar reyndi a.m.k. einu sinni að losna við hópinn en þegar það tókst ekki ákvað hann að fylgja fjöldanum.  Ýmsar umræður voru á reiki en e.t.v. hæst hljómaði það kall frá félagsmönnum að ekki væri til neitt stuðningsnet úti í samfélaginu fyrir fólk eins og okkur sem vildi, af augljósum ástæðum, hætta að hlaupa og gerast venjulegur borgari.  Bókstaflega engin úrræði væru fyrir slíkan hóp.  Kvöl félagsmanna er því augljós og ég bið lesendur að hafa skilning á þessu málefni, sem vissulega er mjög brýnt og mjög alvarlegt!

Einnig var gamalt grín til umræðu og ekki veitir af að dusta rykið af því:
Hér er eitt dæmi

Beiðni dagsins (Dagsins) var samt sú að ég deildi þessu og endilega kíkið á valda kafla ef leiði herjar á ykkur!
Áramótaskaup 1984  Þetta er í heild sinni alfyndnasta skaupið að mati undirritaðrar, en það er að sjálfsögðu smekksatriði.

Highlights:  11:00 
                    12:58*
                    20:47
                    22:22
                    25:59 Must see
Alls um 8,3k
Blesssssssss
SBN
Yfir og út

Hádegi 12. mars 2013

Það eru bara 8 í hverju hádegi.  Komið vor í alla.  Í dag var meira samræmi en í gær.  Ársæll, Dagur, Guðni, Huld, Jóhann, Óli og Þórdís fóru öll Hofsvallagötuna.  Nokkrir fóru 5*800m spretti á 3:20-3:30, aðrir fóru jafnt.  Sveinbjörn sér.

GI

Hádegi 11. mars 2013

Allt að verða vitlaust.  Alls 8 mættir á 5 mismunandi æfingar->

Dagur og Óli, Keilugranda
Guðni og Ívar, Framnesveg
Anna Dís og Ársæll, Suðurgata
Jón Örn, styttra
Sveinbjörn, enn styttra

Gott veður og færi.

GI

Hádegisæfing 8. mars

Mættir: Dagur, Guðni (nýliði) og Sigurgeir

Fórum hefðbundin bæjarrúnt með nýliðann.

Kveðja,
Sigurgeir

Hádegisæfing 28.02.'13

Stundum hleypur maður, bara ekki í spik.
Á þessum dýrðardegi, síðasta degi febrúarmánaðar, var fátt um æfingafélaga.  Samt er gott að hlaupa á slíkum degi.  Annar hluti Síams var í WC Kringlu að horfa á bakið á elítunni í brettabruni (til þess að læra hvernig á að gera þetta, ekki kann maður það!).  Bar þá svo við að framarlega í æfingunni sá Síams2 gula veru með gráa húfu hlaupa hnarreista framhjá útsýnisglugganaum í WC og kviknaði þá sú veika von að um væri að ræða Dag, fulltrúa höfuðstöðvanna, í útsýnisferð.  Annars var æfingin tíðindalítil, 3*16mín. tempó með 3 mín. rólegu skokki á milli.  Þess má geta að ofurhlauparinn KSK var fremstur meðal jafningja á brettinu.
Yfir og út-
SBN

Hádegisæfing 27. febrúar

Mættir: Þórdís, Ársæll, Dagur, Óli og Sigurgeir

Ársæll og Þórdís fór Hofs og börðust hetjulega við vindinn. Three Amigos "flúðu" inn í Öskjuhlíð/Fossvogskirkjugarð í lognið.

Total 7,9-10,4 km.

Kveðja,
Sigurgeir

Hádegisæfing 26. febrúar

Mættir voru eftirtaldir í vorveðri: Matthías, Ársæll, Dagur, Óli og Huld. Þema dagsins var að helst skyldu ekki tveir eða fleiri hlaupa saman og gekk það eftir. Þannig var farin Suðurgata, Hofsvallagata, Kaplaskjól, Meistaravellir, Álagrandi að hætti hvers og eins. Sumir náðu öðrum og aðrir náðu ekki sumum. 

Kveðja góð,

Huld

Hádegisæfing 20. febrúar

Mættir: Ársæll, Dagur, Huld og Sigurgeir.

Ársæll var á sérleið. Við hin fórum öfugan hring sem átti að vera Hofs en endaði að ég held með Frostaskjóli/Álagranda. Þetta voru total 9,2 km í góðu vorveðri.

Kveðja,
Sigurgeir

Hádegisæfing 19. febrúar

Mættir: Dagur, Sigurgeir, Jói (flugmaður), Matthías (nýliði), Huld, Ársæll, Þórdís og Björgvin aka Bjútí.

Það var hörkumæting í vorveðrinu í dag. Matseðillinn í dag var fjölbreyttur að vanda, á honum var m.a. Suðurgata, Framnesvegur/Álagrandi og svo Keilugrandi + Lynghagi með 5 km tempókafla. Sem sagt eitthvað fyrir alla :o)

Kveðja,
Sigurgeir

18. febrúar. Fleiri hundar, meiri kúkur.

Mættir: Formaður, gjaldkeri, flugmaður (Jói) og þjálfi. Ársæll á undan okkur hinum út, á kvennafari eins og venjulega. Formaður fór stutt um Suðurgötu en við hinir um Hofs. Þegar við komum til móts við Nauthól þá tók á móti okkur myndavél og fréttamaður frá Stöð 2. Þau tóku af okkur myndir (afturendinn á okkur sýndur á Prime Time í fréttum kvöldsins) og síðan var beðið um álit hversdagshetjanna  á hundum og eigendum þeirra, sér í lagi hundaskítnum sem ku vera mikið vandamál á stígum borgarinnar. Við komum okkur saman um að þjálfi myndi svara fyrir hópinn, enda hann eini hlutlausi aðilinn, við hinir verandi hundaeigendur. Í stuttu máli sagt, þá kom þetta ekkert sérstaklega vel út fyrir okkur hundaeigendur.

Sjá fréttina hér.

Alls 7-8,6km.

Gjaldkeri.

Powerade#5

Á Valentínusardaginn, 14. febrúar fór fram fimmta og næstsíðasta hlaup í vetrarraðhlaupsseríu Powerade. Ekki var hægt að kvarta undan veðri en það var stórgott. Helst skemmdi þó fyrir að Valentínusarblómvendina vantaði algjörlega en á móti kom þó að við annan þjónustubílinn var afhentur fagurrauður orkudrykkur, sem ku vera minna eitraður en gerist og gengur um Powerade. Nokkrir tóku þátt úr okkar röðum en fleiri tóku ekki þátt. Úrslitin frá okkur má sjá hér:(tími á undan nafni) 43:19 Hólmfríður Ása Guðmundsdóttir 47:09 Huld Konráðsdóttir 48:09 Sigrún Birna Norðfjörð 50:53 Jóhann Þ. Jóhannsson 52:47 Steinunn Una Sigurðardóttir Konurnar ( H, H og S)halda sínum sætum í stigakeppni aldursflokka og skemmtilegt er einnig frá því að segja að í parakeppni halda S og O sínu sæti, þrátt fyrir að annað parsins hafi ekki hlaupið tvö síðustu hlaup. Ef einhver gleymdist í þessari upptalningu biðst ég velvirðingar á því. Annars bara yfir og út- SBN f.h. OAR

Hádegisæfing 14. feb 2013

Mættir:  Ársæll, Guðni, Kata, Þórdís, Þórólfur
Leið: Hofsvallagata, rangsælis
Veður:  Logn, sól, frostmark, "sem sagt gott".

Þeir sem ekki mættu í hádeginu, koma þá bara í Powerade Vetrarraðhlaupið í Árbæ í kvöld.

GI

Hádegisæfing 8. febrúar

Mættir: Tveir Harðir (Dagur & Sigurgeir).

Fórum Álagranda (aðeins lengra en Meistaravellir) á tempó. Undirritaður hægði aðeins á hraðanum þegar leið á hlaupið. Total 10 km á 46 mín.

Kveðja,
Sigurgeir

Framhjáhlaup 6. feb.

Mættum Þórdísi og Ársæli á rómantísku leiðinni (öfund) á vesturleið.  Við hótel voru hinsvegar Dagur og Óli að gera sig klára fyrir 7 hraða (hvar voru hinir fimm?).  Allavega þá hlupu drengirnir okkar með okkur að Suðurgötu og tóku þaðan tempó heim en Síams, sem ekki vildu sólunda sinni orku á "svona vitleysu" fóru áfram í lengingu, enda eru þær í prógrammi sem ekki samræmist vel atferli annarra.
Gaman var að hitta drengina, sem voru ferskir og grínaktugir að vanda.
Kveðja,
SBN

Hádegisæfing 5. feb 2013

Mættir:  Dagur, Guðni, Ívar, Jón Örn og Þórdís

Hálkuhlaup Hofs (D&G), Suður (Í&JÖ) og Sér (Þ)

GI

Hádegisæfing 4. febrúar

Mættir: Ársæll, Anna Dís, Þórdís, Óli og Sigurgeir

Hluti af hópnum fór Suðurgötu og meðan aðrir fóru Hofs. Svo safnaðist hópurinn saman við Kafara og fóru saman restina.

Kveðja,
Sigurgeir

N.Y. Style 2nd of February

"Hey, lady...you dropped something"...."What"?..".Yes, my heart"! 
Það er gaman frá því að segja að skemmtilegum uppákomum Síamssystra eru hvorki landamæri né takmörk sett.  Töluverð skemmtun var fólgin í löngu æfingu helgarinnar sem fór fram í miðgarði í Nýju Jórvík í -7°C.  Ekki hafði það teljandi neikvæð áhrif, heldur var alsælan áþreifanleg, upphrópanir heimamanna merkjanlegar og lengdarmælingar hagstæðar.  Teknir voru ríflega tveir hringir í garðinum á yndislegu leiksviði ólíkra hlaupara, hvar samstæða í klæðaburði og háttum var minna augljós en hjá Síamssystrum.  Eftir hlaup var snætt á Le Pain Quotidien í faðmi broddborgara og þaðan hlaupið um Manhattan í pakkaleit, m.m. Sérstaklega ber að geta þess að áhrif súrefnisskortsins frá fluginu kvöldið áður voru í sögulegu hámarki, á jákvæðan hátt.  Á meðan á hlaupi stóð og á eftir fór fram forkeppni í ljótumyndakeppninni og gildir þá sú eina regla að vera hvað ljótastur og brosa ekki því ekki valdi maður þetta sjálfur!  (nema að hluta til) :-0
Alls 24k
+nokkrir viðbótarkílómetrar í sendlahlaupi á UPS gjaldskrá.
Alls 100% Hunt´s
Bestu kveðjur,

S og H

Frjáls föstudagur 1. feb.

Toppmæting í dag í flottu veðri:
Bjöggi og Þórdís á rómantísku leiðinni, Óli og Ívar á eigin vegum, Dagur og Þórólfur, sem mætti á sína fyrstu æfingu með FI Skokki, Milla frá hótelkeðjunni og svo Huld og Sigrún.  Fórum skemmtilegan en hefðbundinn bæjarrúnt þar sem hlaupastílar og beiting líkamans í hlaupum voru rædd á léttum nótum.
Alls um 8k og sérlega frískandi,
Góða helgi
SBN

Hádegisæfing 31.01.

Fyrst enginn annar bloggar...
..og eins og okkur sé ekki sama þótt Guðni sé upptekinn við að skoða umsóknir um væntanlegar flugfreyjur...
Fórum allavega á fagæfingu fimmtudagsins í spikbræðslustöðinni við Kringlu með- eða horfandi á elite-group.  Æfing dagsins: 4*8 mín. tempó með 3mín. skokk á milli.
Söknuðum þess að sjá ykkur ekki hlaupa framhjá glugganum á WC-inu.
Kveðja,
SBN

Miðvikudagsæfing 30.01.

FARÐU NIÐUR OG FARÐU ÚR FÖTUNUM!
Þetta var bein skipun sem gefin var til Dags er hann hugðist sleppa því að fara á æfingu með Síams.  Þessu hlýddi hann orðalaust og okkur fannst auðmýkt hans og undirgefni til fyrirmyndar.  Svona viljum við hafa þá!
Jæja, en allavega þá var enginn á þessari æfingu fyrir utan okkur þrjú, sem fórum Hofsvallagötu á 5:15 (held ég) en reyndar hittum við fyrir hana Lilju og kærastann hennar skammt frá dælustöð, en kærastinn var í sérmerktri flík sem á stóð "Þjálfari".  Var Dagur hvattur til að fá sér svona jakka en þá benti hann réttilega á að það væru svo margir þjálfarar í hópnum að það gengi ekki.  Síðan var eitt þjóðþrifamál leitt til lykta er við hlupum fram á Gylfa Magnússon, æskuvin Guðna, og undirrituð notaði tækifærið til að spyrja í eitt skipti fyrir öll hvort réttara væri að nota orðið "innistæðitrygging" eða "innstæðutrygging".  Augljóst, myndu kannski einhverjir segja en hagfræðiprófessorinn hvað um gamalt hugtak að ræða og nota bæri hugtakið innstæða, t.d. væri það notað í lagamáli.  Þessi niðurstaða bjargaði algerlega deginum hjá undirritaðri og er sem þungu fargi af mér létt.
Alls rúmir 8K
Ath.  Einnig sást til Joe boxer á kraftgöngu á Flugvallarvegi.  Hvað eru mörg i í því?

Keðjubréf 29.01.

Ekki ætla ég að slíta bloggkeðjuna...
..þessvegna geri ég fastlega ráð fyrir að þið séuð ofuráhugasöm (eða sá eini sem les bloggið) um hversvegna Síams mæta stundum ekki til æfinga á pinnann.  Jú, vegna fagæfinga í spikbræðslustöðinni.  Í dag vóru það 8*90 sek. sprettir í 4% halla on ðe brett.  Þar hafið þið það!  Og hættið svo þessum sífelldu spurningum og æðibunugangi á kommentakerfinu!  OK?????
Bestu kveðjur/keðjur úr verinu-
SBN

Hádegisæfing 28. janúar

Mættir : Ole og Dagur

Fórum Eiðistorg á skeiði í sviptivindi.

Æfingunni barst vísa frá JB

Fjölnir litli datt í dí
og meiddi sig á fótnum
aldrei varð hann upp frá því
jafngóður í fótnum

Kveðja,
Dagur

Laugardagsæfing 26. janúar

Fyrsta langa hlaup tveggja klúbbmeðlima í hinu langþráða Boston prógrammi fór fram í dölunum tveimur, Fossvogs og Elliðaár í nýföllnum snjóm. Ekki er hægt að segja að um draumahlaup hafi verið að ræða ef félagsskapurinn er undanskilinn en sá þáttur hefur þó ekki hvað minnst vægi í hugum þátttakenda. Undirrituð stenst þó engan veginn samanburðinn við nýjasta hlaupafélaga Sigrúnar sem getið er í síðustu færslu. Mættum Ívari og hundi hans á leið okkar þar sem annar dró hinn áfram.

Kveðja góð,

Huld

Akureyrarævintýr 20.01.2013

Ég má til með að deila með ykkur litlu ævintýri sem ég bjó mér til á Akureyri nýlega.  Þannig var að ég fór í hlaup einn morguninn frá hlíðum Vaðlaheiðar og upp í Glerárhvefi.  Það er í sjálfu sér ekki merkilegt nema fyrir þær sakir að þegar ég lauk hlaupinu við Keiluhöllina á AEY rakst ég á skemmtilegan fýr úr heimi hlaupanna.  Sá hinn sami er margreyndur maraþonhlaupari og er frægur fyrir sína framúrstefnulegu hárgreiðslu, lokkinn framgreidda.  Ég vatt mér að honum og spurði (eftir smá umhugsun) "væri það mjög dónalegt af mér að biðja um mynd af okkur saman"?  "Dónalegt, ég veit ekki einu sinni hvað orðið þýðir", svaraði hann.  Þetta var upphafið af okkar skemmtilegu samræðum sem veittu mér ákveðna hvatningu og vissu fyrir því að það er allt hægt.  Jón hefur hlaupið fjöldamörg maraþon um sína löngu ævi og langt frá því að vera hættur.  Ég spurði hann hvort að hann ætlaði að hlaupa fleiri maraþon um ævina og svarið var "meðan ég stend á löppunum hleyp ég".  Ætlum við ekki að gera það líka?

SBN
Ath. Ef einhverjir velta fyrir sér myndgæðunum eða skorti á þeim skal það játað að myndin er tekin á sveittan og gamlan Nokia síma, ekki var annað í boði.  Einnig geta glöggir áhorfendur séð keppnisnúmer Jóns nælt í hann frá síðasta RM.  Snilld!

Föstudagsæfing 25. jan.

Stórkostleg mæting í dag: Dagur, Guðni, Óli, Jón Örn, Gulla og Síams (komu úr launsátri).  Ívar kom síðan í bakið á okkur, fór Hofsvallagötuna á tempói.  Við hin fórum bæjarrúnt í blíðskaparveðri og vel fór á með mannskapnum og ekki var laust við að ástar- og saknaðarkveðjunm rigndi yfir tvíburana, a.m.k. frá sumum.
Gaman er að sjá að nýliðunin er í fullum blóma og vonumst við til að hún haldi áfram, þ.e. nýliðunin.  A.m.k. 2 þorskígildi. ;)
Góða helgi og hafið í huga- "It ain't over till the fat lady sings".

"It ain't over till (or until) the fat lady sings is a colloquialism, essentially meaning that one should not assume the outcome of some activity (e.g. a sporting contest) until it has actually finished,..."

milli 7-8k
SBN

Fimmtudagur 24 jan 2013

Mættir: Dagur, Guðni og Guðlaug Harpa

Hlaupið suður í átt að Nesti Fossvogi.  Þar mátti velja að snúa við eða að fara yfir í Kópavog, norður Kringlumýrarbraut inn í Holtin yfir Klambratún og að IHRN.

Bara gaman.

Kveðja
Guðni

Hádegisæfnig 23. janúar

Mættir : Dagur, Guðni, Sigurgeir og Óli

Rólegt, Skógræktin, rúmlega 7k.

Dýrlegt veður og frábært hlaup.

Kveðja,
Dagur

Hádegisæfing 22. janúar

Mættir : Dagur, Guðni, Jón Örn, Gunnur og Jóhann

Jón Örn gaf dagsskipunina.
Brekkusprettir í kirkjugarði, langt 'K' 90sec.

Flestir fannst nóg um að taka 5 kvikindi en Jón Örn er einbeittur í sínu PAR prógrammi og hækkaði í 7.

Kveðja,
Dagur

Hádegisæfing 21. janúar

Magnaður mánudagur!

Mættir: Dagur, Guðni, Sigurgeir, Jón Örn og Óli

Óli fór Suðurgötu og restin fór Eiðistorg (9k) á 5mín tempói.
Blíðskaparveður og létt yfir hópnum.

Meðal umræðuefnis var handboltaleikurinn við Frakka í gær.

Kveðja,
Dagur

Hádegisæfing 18. 1

Mikið fjölmenni var á æfingu dagsins, í blíðskaparveðri.
Mættir voru: Dagur, Jón Örn, Ívar, Sigurgeir, Sigrún Erlends frá Staff, sem einnig er skráður meðlimur klúbbsins, nýliðarnir og flugfreyjurnar Jóhanna Dögg Pétursdóttir og Guðlaug Harpa Gunnarsdóttir.  Vonumst við til að sjá allar þessar ofuskutlur aftur, og aftur og aftur...
Fórum tiltölulega hefðbundinn föstudagshring og enduðum á HL, eftir milli 7-8km hlaup. Nokkur mál vóru á dagskrá og voru þau leidd farsællega til lykta og megi helgin verða öllum ánægjuleg.
Góðar stundir,
SBN fh. hóps

Limra dagsins: (til gamans)

Svo lést hann Leópold kjaftur
og lofaði að ganga ekki aftur
en svo gekk hann aftur
og aftur-og aftur
og aftur-og aftur-og aftur.
 
 Gísli Rúnar Jónsson

Hádegisæfing 17. 1

Hvernig tengist
lífi manns? Jú, það tengist því á þann hátt að ef viðkomandi er kúlulaga getur verið gott að vita rúmmál kúlunnar. Eða ekki. Kannski er hægt að reikna út eitthvað skemmtilegt um þessa kúlu.  Segi svona bara....

En allavega voru of margir mættir í dag eða: Jón Örn, sem er á eigin vegum í einhverju allsherjar leyniprógrammi.  Held að það tengist stóra bílnúmeramálinu, hafnfirska.  Hinir sem mættu voru: Guðni, Dagur, Ívar, Jói, Huld og undirrituð.  Ákveðið var að fara í spretti, 4*1000m sem mun vera ágætis byrjun.  Á heimleið sást til nýjasta meðlims klúbbsins, Sigríðar Sólar, á hlaupum á austurleið.  Á morgun er svo von á nýjum meðlimi og verður spennandi að sjá hver það verður, en það vita einungis bleikstökkur. 
Allt í lagi þá, blezzzzzzzzzzzz.......
SBN- aka fulltrúinn

Newsflash***Nýr félagsmaður***

Skokkklúbbnum hefur borist liðsauki með nýjum félaga sem skráði sig í dag.  Þetta er hún Sigríður Sól , fv. flugfreyja, eða
(SIGRÍÐUR SÓL BJÖRNSDÓTTIR)
Ferðaráðgjafi/Travel Consultant
Viðskiptasöludeild/Corporate Sales   Við bjóðum hana hjartanlega velkomna og voumst til að sjá hana sem fyrst á æfingu.
Kveðja,
SBN f.h. OAR

Hádegisæfing 16. 1

Mættir:
í baðklefa-Johnny, ekki fer frekari sögum af hans afdrifum.
Hinir vóru-Guðni, Dagur, Huld og Sigrún. Hópurinn var fullkomlega stíliseraður, drengirnir í bláum mittisjökkum við sokkabuxurnar og stúlkurnar í bleiku einkennisjökkunum við sínar. Fórum skemmtilega vesturbæjarleið með óhefðbundnu sniði í blíðskaparveðri. Mikill og einbeittur áhugi samferðamanna hefur beinst að hlaupaprógrammi Síams fyrir Boston og spurningum virðist ekki ætla að linna hvað það varðar. Tvíburarnir eru hinsvegar pollrólegir og skeytingarlausir hvað prógrammið áhrærir.  Einnig virðist furðu sæta að þær báðar, komnar að fótum fram úr elli og hrumleika, skyldu hafa komist inn í þetta stórmerkilega hlaup á eigin forsendum en ekki með sérleyfisbréfum og mútugreiðslum undir borðið.  Því til glöggvunar fylgir tafla um tímatakmarkanir sem gilda fyrir 2013, ef einhverjir vilja stefna þangað.  Síðan ef það gengur ekki má alltaf athuga með kynskipti.  Mér skilst að svoleiðis sé á tilboði núna á hópkaup.is, en hvað veit ég?
Kveðja góð,
SBN- fulltrúi ritara í fjarveru hans.

Boston Marathon Qualifying Standards (effective for 2013 race)
Age	Men	Women
18–34	3hrs 5min	3 hrs 35min
35–39	3hrs 10min	3 hrs 40min
40–44	3hrs 15min	3 hrs 45min
45–49	3hrs 25min	3 hrs 55min
50–54	3hrs 30min	4 hrs 0min
55–59	3hrs 40min	4 hrs 10min
60–64	3hrs 55min	4 hrs 25min
65–69	4hrs 10min	4 hrs 40min
70–74	4hrs 25min	4 hrs 55min
75–79	4hrs 40min	5 hrs 10min
80+	4hrs 55min	5 hrs 25min

Hádegisæfing 15.1

Að sögn mætti Dagur einn á þessa æfingu.  Engin vitni eru samt að æfingunni þannig að um uppspuna gæti eins verið að ræða.
SBN

Hádegisæfing 14.1

Mættir í eftir Powerade umræðuhlaup (stigalega séð): Johnny, Huld, Dagur, nýliðinn Lilja (úr tekjustýringu) og Sigrún.  Eftir ófrægingarherferð Dags gegn hinum meintu "vondu stjúpum" fór hópurinn saman vestureftir.  Johnny tók Lilju með sér Suðurgötuhringinn en hin þrjú fóru lengra. Eineltisstefna hópsins var iðkuð á leiðinni og virðist lifa góðu lífi þessa dagana.
Alls um 10k
SBN fulltrúi ritara

Hádegisæfing 11.1.

Mættir: Ársæll og Þórdís í forstarti.
Almennir: Dagur, Guðni, Huld og Sigrún.
Þau síðarnefndu fóru bæjarhring og þrættu mestalla leiðina um hvort réttlætanlegt væri að skíra kvenmann nafninu Blær.  Skiptar skoðanir voru um þetta.
Alls um 7k

Ein kona skráð undir nafninu Blær í þjóðskrá

Arnar Þór Stefánsson, lögmaður hjá lögmannsstofunni Lex, fer með þetta mál fyrir hönd Blævar. Fyrirtaka var í málinu í dag. Hann segir krafa sé gerð um að úrskurður mannanafnanefndar verði dæmdur ógildur. Jafnframt er farið fram á að ríkið greiði Blæ miskabætur vegna framgöngu þess í málinu.
Arnar segir að ein kona heiti Blær í þjóðskrá, en hún er fædd 1973. Árnastofnun hafi einnig staðfest að Blær hafi verið notað hér á landi bæði sem karlmanns- og kvenmannsnafn. Í bókinni Nöfn Íslendinga sé af finna nafnið Blær sem kvenmannsnafn. Það séu því sterk rök fyrir því að heimila kvenmannsnafnið Blæ í mannanafnaskrá. Þar að auki sé búið að skíra Blæ þessu nafni og hún hafi borið það í 14 ár.
Mannréttindadómstóll Evrópu hefur fjallað um eitt mál af þessum toga, en þar var tekist á um bann finnskra stjórnvalda við því að maður fengi að heita nafninu Axl. Maðurinn vann málið.
Arnar er bjartsýnn á að Blær vinni málið. Björk segir að Blær bíði spennt eftir niðurstöðunni. Það sé tímabært að ljúka þessari þrætu.

Til gamans: http://www.mbl.is/greinasafn/grein/136813/

Og beyginarmyndir orðsins, einnig til gamans:
http://is.wiktionary.org/wiki/bl%C3%A6r

Alltí læ....blesssssssssssss,
SBN

Hádegisæfing með Gamle Ole -9.1.

Loksins, loksins....
Feginleikinn var tær og einlægur þegar Síamssystur og GO fóru saman í slagveðrinu lítinn monthring um Öskjuhlíð og rifjuðu upp skemmtileg atvik um menn og málefni.  Samdóma álit þremenninganna var að þau þrjú væru þau einu í klúbbnum sem augljóslega þyldu að æfa við þessar aðstæður, þ.e. rok og rigningu og var það sannað með æfingunni.
Kveðja,
SBN

Hádegisæfing 7.1.

Mættir: Johnny, Geiri smart, Day, Ivanhoe og tveir eldri borgarar, sem gangast stundum við nafninu Síams.  Einhverjar spurningar vöknuðu um hvort eitthvað maraþonprógramm væri farið í gang. Hvort einhver væri að fara í maraþon, hvar og af hverju.  Fjölnir er t.d. byrjaður í sínu prógrammi sem felst í 6*800m spretthvíldum, Johnny er í sínu prógrammi og lætur glys og glaum ekki trufla sig, Síams eru ekki byrjaðar í sínu en eru þó í lengdri og vaxandi hvíld, en það hlýtur að breytast fljótlega. Hópurinn fór þrjár leiðir; Suðurgötu, Hofs og Dagur og Ívar fóru lengingu með 3k tempókafla@4:50. Þá fannst Ívari alveg nóg komið.  Þegar komið var að teygjustund kom upp umræða um til hvaða örþrifaráða væri heppilegt að grípa ef manni fyndist sem hlaupaferillinn væri runninn sitt skeið. Sú tillaga sem hvað sterkast kemur til greina er að fara beint á stera, ekki endilega þá sterkustu sem hafa miklar aukaverkanir, heldur hina sem koma manni í fremstu röð.  Þess ber þó að gæta í keppnum að koma ekki of snemma í mark, til að forðast óþægindi lyfjaprófs. M.ö.o. það borgar sig að taka stera en það borgar sig ekki að sýna að maður er orðinn einn af þeim bestu, þótt maður sé það.  Þetta heilræði geta allir í klúbbnum nýtt sér!
Kveðja,
afleysingaritarinn getulausi, aka SBN.

Hádegisæfing fös 4. janúar - Hvar eru Parísarfararnir?

Þrjú holl lögðu af stað í dag á mismunandi tímum.  Í fyrsta holli var Ársæll, sem þjófstartaði.  Í öðru holli voru 3R, 1/2 Síams (Sigrún) og Sigrún (newbie frá hótelinu).  Þær þjófstörtuðu lítillega.  Í þriðja holli, og á tíma, voru Dagur, Bretta-Geiri, Gamle Úle (telst orðið nafn með réttu), Oddgeir og Anna Dís.  Öll hollin fóru einhverja útgáfu af flugvallarhring.

Sá er þetta ritar getur einungis lýst því sem fram fór í þriðja holli.  Bar þar ýmislegt á góma.  Skal hér stuttlega sagt frá tveimur umræðuefnunum.  Fyrst skal nefna undrun manna á fjarveru Parísarfaranna.  Finnst mönnum Parísarfararnir fara kæruleysislega af stað við upphaf æfingaáætlunarinnar.  Þá skal og nefna skiptar skoðanir manna í þriðja holli á fyrirætlun þjóðkirkjunnar að safna fé til tækjakaupa á Landspítalanum.  Einhver fann þessu allt til foráttu (talaði um skattpeninga sína o.s.frv.) á meðan öðrum fannst þetta bara fínt (að það skipti ekki máli hvaðan gott kemur jafnvel þó um skattpeninga Dags sé að ræða).

Hádegisæfing 2. janúar - Fyrsti í hlaupi

Mætt á fyrstu æfingu skokkklúbbsins í dag eftir algleymi jóla og áramóta voru: 3R, Alsæll, Brekku Jón, Huld, Oddgeir og Dagur.

Færi var frekar erfitt, hörkuhálka og læti.  Reyndar sást Dagur hvergi þegar hópurinn hafði hlaupið skamma stund.  Hvar var Dagur?  Laumaðist hann kannski inn á brettið góða í spa-inu þegar hann áttaði sig á erfiðu færi?

Stysta útgáfa flugvallarhringsins tekin í dag enda engin ástæða til fara of geyst af stað á nýju ári (7k).

Þegar hópurinn var að teygja að loknu hlaupi birtist Dagur allt í einu.  Sagðist hann hafa hlaupið "hringinn" um Hofsvallagötu, hann hefði misst af hópnum þar sem Gipsið hans fann ekki tungl.

Gamlárshlaup ÍR

Eftirtaldir hlupu undir merkjum skokkklúbbsins í Gamlárshlaupi ÍR á síðasta degi ársins:

42:10  Oddgeir Arnarson
50:14  Sigrún Birna Norðfjörð
51:01  Rúna Rut Ragnarsdóttir (3R)
53:39  Huld Konránsdóttir (hljóp til góðs með ungum syni sínum)

Áramótakveðja,
Stjórn skokkklúbbsins

Alvöru hádegisæfingin 28. desember

Alvöru hádegisæfinguna tóku þrjú á palli í vosbúð, slabbi og kulda.  Huld, Sigrún og Oddgeir lögðu af stað á tilsettum tíma þegar ljóst var að kuldaskræfurnar treystu sér ekki út, þær vildu sem sagt hafa það notalegt og kósý á spandexskýlunum sínum í spa-inu (sjá færsluna hér að neðan).  Það tók að vísu nokkra klukkutíma að ná upp hita í tær þriggja á palli eftir æfingu, en er það ekki svo að stundum verða menn að færa smá fórnir til að ná árangri?

Ritarinn.

Hádegisæfing 28. desember

Mættir á síðustu æfingu FISKOKK þetta árið voru Dagur og Sigurgeir!

Vegna veðurs þá var ákveðið að taka æfinguna inni á bretti. Tókum upphitun í 2 km og svo 5x600m spretti með vaxandi tempó og 400m rólegt á milli. Niðurskokkið var rúmur km.

Vonandi hafa allir það yndislegt um áramótin og sjáumst hress og kát á nýju hlaupaári.

Kveðja,
Sigurgeir

Hádegisæfing 27. des

Mættir: Dagur, Villi og Sigurgeir.

Fórum rólegan skógræktarhring. Á leiðinni var m.a. rætt um drenginn (man ekki nafnið) sem hleypur með öll jólakortin sín. Við höfum ákveðið að útfæra þessa hugmynd og mun FISKOKK bjóða póstþjónustu um næstu jól og það verður að sjálfsögðu hlaupið með öll kortin. Með þessu ætlum við að safna fyrir maraþon-ferð þeirra sem bjóða fram krafta sína. Við fórum yfir nákvæma útfærslu á þessu og það er of langt að fara í details hérna en þeir sem hafa áhuga geta sett sig í samband við undirritaðan á næstu æfingum :o)

Kveðja,
Sigurgeir

Föstudagur 21. des - Kirkjubæjararmbeygjur

Í ljósi þess að jólin eru á næsta leyti var ákveðið að taka rúnt um kirkjur bæjarins.  Hver og ein(n) (Huld, Dagur Guðni, Ívar og Oddgeir) fékk að velja sér kirkju að eigin vali, sem þó þurfti að vera innan hlaupadrægis æfingarinnar.  Að auki voru tvær kirkjur í bónus.

Rúnturinn var svohljóðandi:  Neskirkja, Landakotskirkja, Dómkirkjan, Fríkirkjan, Aðventkirkjan (við Ingólfsstræti), Hallgrímskirkja og Friðrikskapella (að Hlíðarenda).  Við hverja kirkju voru síðan teknar 10 armbeygjur.

Alls rúmir 7 km + 70 armbeygjur.

Gleðileg jól.

                             Tekið á því við Landakot            Copyright HUK

                     The Boys Band         Copyright HUK



Fimmtudagur 20. des - Nú mega jólin koma

Nú mega jólin koma sagði skáldið og eflaust nokkuð til í því þar sem hið árlega aðventuhlaup skokkklúbbsins átti sér stað í dag.  Svipuð mæting og hin síðari ár, hæfilega fjölmennt og góðmennt.

Nú bar svo við að tveir vitringar birtust skyndilega í búningsherbergi karla rétt fyrir hlaup og höfðu með sér góðar gjafir, þ.e.a.s. ónotað Garmin hlaupaúr og gott skap.  Lýstu þeir veginn og fylgdu hlaupurunum góðan hluta aðventuhlaupsins.  Reyndar hefðu þeir mátt byrja lýsinguna strax við höfuðstöðvarnar því Sigurgeiri tókst að hlaupa niður tvo óupplýsta gangandi vegfarendur á fyrstu metrunum.

Að loknu hlaupi og sturtu var skottast upp í höfuðstöðvarnar þar sem biðu manna veitingar og barmafull dagskrá.  Hlýddu menn m.a. á stjórnarmenn fara yfir starfsáætlun stjórnar auk áhugaverðrar framsetningar á lang stærsta draumi Dags (skammstafað LSD).  Að lokum var síðan stutt myndasýning frá Edinborgarför nokkurra meðlima klúbbsins fyrr á árinu.

P.s. Vitringarnir voru þeir Jón Baldursson, a.k.a. JB RUN, og Bertel frá Icelandair Cargo og stóðu þeir sig vel og fóru tæplega 7 km.

Miðvikudagur 19. des - Jólin nálgast

Ágætis mæting í dag nú er líða fer að jólum, alls 9 stykki.  8 stykki fóru út að skógrækt, með smá viðkomu í K_obbavogi, enda Glamúrinn með í för.  Á leiðinni til baka var fyrsti armur Kolkrabbans tekinn (rólega enda voru sumir á gæðaæfingu í går) og síðan hlaupið utan í og með hlíðum Öskjuhlíðar.  Alls 7.5 km.

Eina stykkið sem ekki fór með út að skógrækt, þ.e. fór Cher, var formaður vor.  Sögðu illar tungur að hann hefði hlaupið út undan sér í fússi eftir meintar deilur í búningsherberginu rétt fyrir æfingu.  Undirritaður hefur litla trú á sögu þessari og telur líklegast að hér hafi einungis verið um hárbeitt grín af hálfu formanns vors að ræða.

Föstudagur 14. des - 10 litlir.....

10 litlir hlauparar hlupu í hádeginu.  Bæjarrúntur á dagskrá en strax við Valsheimili slitu Sæli og Dísa sig frá hópnum og fóru rólegt og rómantískt.  Restin, 8 litlir hlauparar, hljóp sína leið.  Engin afföll urðu meðal hlaupara, ólíkt sögunni um 10 litla, og allir voru voða glaðir þegar þeir skiluðu sér til baka að höfuðstöðvunum.

Desember Powderarde hlaupið var í gærkvöldi og lá forvígismaður þess, Dagur, undir miklu ámæli meðal samhlaupara fyrir lélega dreifingu á konfektkössum til þeirra félagsmanna klúbbsins sem höfðu fyrir því að mæta (uppskeran var 0 kassi!).  Degi var all brugðið við þessa atlögu og hvæsti að næst yrðu engir konfektkassar í boði í desemberhlaupi Powderade, og hananú!

Hið árlega aðventuhlaup skokkklúbbs Icelandair

Hið ómissandi og eftirsótta aðventuhlaup skokkklúbbsins fer fram fimmtudaginn 20. desember nk. Lagt verður að af stað frá Hótel Loftleiðum kl. 1708. Vegna mikillar aðsóknar og eftirspurnar eru félagsmenn hvattir til að mæta.......tímanlega. Lengd hlaupsins mun eins og áður ráðast af veðri og færð en þó er ekki gert ráð fyrir lengra en 45 mín. hlaupi.

Félagsmenn fá aðgang að sturtu á Sóley Natura Spa á Hótel Loftleiðum sér að kostnaðarlausu. Félagsmenn þurfa sjálfir að koma með handklæði og sundfatnað (krafa að hálfu staðarhaldara).
Að loknu hlaupi mun skokkklúbburinn bjóða hlaupurum upp á hressingu á bar hótelsins.

Kveðja,
Stjórn skokkklúbbsins

Hjartað og hlaupin

Ívar benti mér á þessa grein sem birtist á vefnum í kjölfar andláts Caballo Blanco.
Áhugavert, en látið ekki glepjast af falsspámönnum.

Einnig eru hér áhugaverðar myndir úr síðasta fréttabréfi Runner's World.
Takið eftir fótaburðinum.

Kveðja, Dagur

Hádegisæfing 11. des

Mættir: Oddgeir, Fjölnir, Sigurgeir, Dagur, Ívar og Jói (ðe six pack).

Eins og venjulega á þriðjudögum þá var tempó. Í þetta skiptið var ákveðið að fara út á Nes og taka hringinn góða, þar sem það er svo langt síðan við höfum gert það. Á leiðinni skipti yfirþjálfarinn hópnum í tvö lið og það var keppni með forgjöf. Þetta var æsispennandi og ég man ekki hver vann :o) Svo var tekið rólegt að HÍ og þá var bætt aðeins í tempó-ið heim að HLL.
Virkilega skemmtileg æfing og menn höfðu orð á því að það er langt síðan það hefur verið svona góð tempó-æfing og líklega væri það vegna þess að loksins var engin kvk á æfingunni, aðeins ðe six pack!
Total 9,9 km


Heyrst hefur að JB RUN sé á markaðnum að reyna ná í nýja meðlimi og þeir voru m.a. á jólabollunni að fá fólk til að skrá sig í klúbbinn. Það er sorglegt að sjá að JB RUN skuli nota tækifærið þegar fólk er í glasi og tekur kannski ekki alltaf réttar ákvarðanir í því ástandi. Ég skora á ykkur að láta ekki glepjast og sýnið stuðning ykkur við FISKOKK :o)

Kv. Cargo Kings

Föstudagur 7. des - Bótox

Mætt í hádeginu á bolludegi voru Johnnie Örn, Dagur, Sesamie 1&2 og Oddgeir.

Miðbæjarrúntur þar sem ákveðið var að kanna hvort finna mætti vott af jólastemningu á Laugaveginum.  Um leið og komið var inn á Laugaveginn mætti hópnum hrúga af slökkvi- og sjúkrabílum á leið í útkall.  Það var sem sagt kviknað í húsi á Laugaveginum.  Er hópurinn smeygði sér framhjá mannhafinu er fylgdist með ósköpunum varð á vegi þeirra hurð á sjúkrabíl.  Skipti engum togum að hin opna hurð veitti annarri Sesamie-systra þungt högg á munninn.  Neðri vör bólgnaði strax og líktist fljótt þvi sem vænta mætti eftir góða bótox meðferð.  Létu menn þetta duga og héldu heim á leið enda nóg komið af áhættuatriðum í dag.

Hádegisæfing 4. desember

Mættir voru:
Ársæll, Dagur, Guðni, Huld og Sigrún.
Strákarnir ákváðu að losa sig við Ársæl þannig að þeir gætu verið einir með Síams.  Ársæll fór því sérleið.  Ákveðið var að yfirnjörður hópsins myndi skipuleggja æfinguna og fórum við fjögur glaðbeitt út á Klambratún í æfingu sem kallast 4L.  Tókum við fjórum sinnum L á mismunandi  formatti í stígkantinum eða á grasinu.  Var það samdóma álit nefndarinnar að skemmtilegri og fjölbreyttari æfing hefði ekki verið framkvæmd í háa herrans tíð og ætlaði þakkarbréfunum aldrei að hætta að rigna inn til Guðna, yfirnjarðar.  Þess ber þó að geta að ísinn var varhugaverður á köflum og eins gott að passa sig sbr. lesningu að neðan.
Góðar stundir,
SBN

Jólahaldsávarðing!!!

Frá heilsumálaráðnum er henda nýggja ÁVARÐINGIN komin:

Vodka & ísur oyðileggja nýruni;

Romm & ísur oyðleggja livrina;

Whiskey & ísur oyðileggja hjartað;

Ginn & ísur oyðileggja heilan;

Pepsi & ísur oyðileggja tenninar...

Líkt er altso til, at ísur drepur, sama hvörjum tú blandar hann við!

Ávarða tíni vinfólk: bein fyri ísinum – og drekk einans reinar vörur!

Kopiera og send ávarðingina víðari í STUNDINI!

Tú kanst bjarga einum mannalívi!

(Minst til, hvat ísurin gjördi við Titanic

Hádegisæfing 3. desember

Vegna fjölda áskorana tók ég að mér þessa færslu.
Mættir voru: Anna Dís, Jón Örn, Guðni, Sigurgeir, Fjölnir, Huld og Sigrún.  Á öfugri leið til móts við okkur voru faggarnir O-man und gamle Ole.  Fórum Hofsvallagötuhring undir stjórn Parísarfaranna, Fjölnis og Johnnys.  Rætt var um sameiningu Síams og Kings og hvað þyrfti að gerast til þess að af henni yrði.  Gaman var að sjá hvað Cargókóngarnir voru vörpulegir og smart og einungis herslumun vantar upp á til að hægt sé að kalla þá "hlaupara".  Þetta er alveg að koma strákar, ekki gefast upp.
Au revoir,
le freak
Ath. Sveinki kemst ekkert á æfingar í desember því hann er upptekinn við myndatökur og allskyns jólasveinauppákomur um allan bæ.
Jólalag

Samskokk

Á morgunn laugardag verður samskokk á vegum ÍR frá versluninni TRI á Suðurlandsbraut.  Skokkið hefst kl. 9.00.

kv. formi

Þriðjudagur 27. nóvember

Mættir: Dagur, Guðni, Bjúti og Sigurgeir

Fjölnir King kom með yfirlýsingu í gær að það yrði tempó í dag þar sem hann og Dagur ætluðu að skilja undirritaðann eftir í reyk! Við tókum að sjálfsögðu tempó eins og var búið að plana...Fjölnir lét ekki sjá sig á æfingu!!! Bjútí tók Suðurgötu með stæl og meðan aðrir fór Hofs þar sem Dagur og Guðni bættu perranum við. Þetta endaði í ca. 4-5 km tempó að kafara.

Kveðja,
Sigurgeir

CCP

Eftir umræðu í karlaklefanum eftir æfingu.

Fyrirlestur sem Hilmar Veigar CCP flutti á haustráðstefnu Skýrr 2011.

http://www.dailymotion.com/video/xl4224_hilmar-veigar-ccp_tech

Kveðja,
Dagur

The Cargo Kings

Mættir í dag voru Kings, Guðni, Óli og Ársæll.

Óli kann ekki á klukku og fór þvi ca. 10 mín of snemma af stað, en við hittum hann við teygjur eftir hlaupið. Fréttum að Ársæll hefði farið í Fossvogsdalinn en það er ekki sama hvoru megin maður er!

Guðni og Cargo Kings fóru Skógræktina með smá tvist til að ná Kópavoginu með í hlaupið. Sá merkilegi atburður átti sér stað í dag þar sem Guðni sótti formlega um inngöngu í The Cargo Kings. Honum var að sjálfsögðu tekið fagnandi og hefur hann hafið inngönguferlið og er núna Cargo Prins í þjálfun sem vonandi nær þeim áfanga að verða hluti af Kings.

Kveðja,
The Cargo Kings

Föstudagur 16. nóv - Bæjarrúntur sem ekki varð

Guðna var falið að sjá um bæjarrúnt dagsins.  Farið var hefðbundin leið út á Hringbraut og töldu menn að fljótlega eftir það yrði beygt af leið og eitthvað niður í bæ.  Hins vegar varð ekkert úr því þar sem Guðni virtist mjög upptekinn í rökræðum við Síamssystur um eitthvert hitamál.  Því fór sem fór og enduðu menn og konur á því að taka hefðbundinn hring með mismunandi lengingum, eftir getu og áhuga.  Geiri Smart fór einungis um Hofsvallagötu, enda í ömurlegu formi, Guðni og Síamssystur fóru um Meistaravelli og Dagur og Oddgeir fóru um Meistaravelli með lengingu.  Í endamarki voru svo Jói gönguhrólfur og Þórdís að toga og teygja eftir sína æfingu.

Miðvikudagur 14. nóv - Ekki svo rólegur miðvikudagur

Svo virðist sem hinn rólegi þriðjudagur hafi farið illa í Dag því að í dag rauk hann af stað með látum, ásamt hinum hundtrygga aðstoðarmanni sínum Úle, og Oddgeiri.  Flugvallarhringurinn skildi það vera.

Við gatnamót Hringbrautar og Hofsvallagötu sá Oddgeir sæng sína útbreidda og beygði af á Hofsvallagötu en Úle reyndi að hanga í Degi sem hélt áfram um Kaplaskjólsveg.  Degi nægði þetta ekki og tók því Perrann í leiðinni.  Fór svo að Dagur og Úle náðu Oddgeiri töluvert fyrir Kafarann.  Vel að verki staði.  Enn var Dagur ekki búinn að fá nóg og hljóp inn í kirkjugarð og Öskjuhlíðarskóg til þess að ná 10 km.

Góð æfing og ekki skemmdi fyrir að grúppía ein (segjum ekki hver) tók á móti þremenningunum í lok æfingar.

Þriðjudagur 13. okt - Rólegur þriðjudagur

Já, þátt fyrir þriðjudag var lítið tekið á því í dag, hver svo sem ástæðan fyrir því kann að vera.  Þeir sem mættu voru:  Simmi 1 og 2, skötuhjúin Dagur og Guðni, Jói hinn síðari, Oddgeir og halti kargó kóngurinn hann Sigurgeir.  Hefðbundinn flugvallarhringur með fljúgandi hálku á göngustígnum við HR.

Powerade#2

Úrslit okkar fólks frá 8. nóv.

Oddgeir  40:36

Viktor  41:22

Ása  43:57

Huld  45:06

Sigrún  Birna  48:15

Jói  Þ.  49:59

Jón Örn   50:29

Anna  Dís  52:35

Steinunn Una  52:56

 

Kveðja,

Ritter Sport

Föstudagur 9. nóvember

Mættir: Dagur, Guðni og Sigurgeir

Dagur og Guðni fóru Suðurgötu á meðan 1/2 Kings fór Flugvallarhringinn með styttingum þar sem hægt var. Við fórum yfir glæsilegan árangur þeirra sem mættu í Powerade á fimmtudaginn, allir sem mættu stóðu sig með sóma. Það vantar samt töluvert upp á mætingu og skora ég á Ívar, Fjölnir, Óla og alla aðra til að mæta í næsta Powerade sem verður 13. des.

Einnig vil ég benda ykkur á að það er komin hlaupadagbók á hlaup.is og þar er búið að stofna hlaupahóp Icelandair, endilega skrá sig í hópinn!

Kveðja,
Kings Forever...

Aðalfundur og árshátíð skokkklúbbsins er í kvöld

Þá er komið að því sem margir hafa beðið eftir, nebbilega aðfundur og árshátíð.  Von er á ágætis mætingu, þó vissulega megi segja að "the usual suspects" verði í meirihluta.

Mæting kl. 1900.  Stefnt er að því að hefja aðalfundarstörf eigi síðar en 1930 og er jafnframt stefnt að öguðum vinnubrögðum í þeim efnum svo hægt verði að hefja árshátíðina fyrir miðnætti.

Miðvikudagur 31. okt - Þrír harðir

Það voru þrír harðir sem mættu á æfingu á síðasta í stuttbuxum.  Þetta voru þeir Dagur, Guðni og Oddgeir.  Veður var frábært, garrinn frá því í gær farinn, og sól í heiði.

Rólegt hlaup í skógræktina og til baka via 1. arm Kolkrabbans.  Ýmislegt skrafað, þ.á.m. nýafstaðin ráðgefnadi þjóðaratkvæðagreiðsla um tillögur þjóðlagaráðs að nýrri stjórnarskrá (þurfið þið að vita eitthvað meira?).  Þar skiptust menn í tvær ójafnar fylkingar (2 með tillögunum og 1 á móti).  Ekki verður farið nánar út smáatriði þessa skrafs að svo stöddu.

Alls hlaupnir ca. 7 km.

Jói hinn fyrri gekk svo í hlað þegar teygjum var að ljúka.

Frankfurt maraþon 2012

Það er ekki endilega markmið í maraþonhlaupi að klára á ákveðnum tíma, markmiðið getur verið t.d. að hafa gaman (það má).  Þannig fór ég a.m.k. í þetta maraþon, sem er mitt þriðja. Félagsskapurinn var alveg gulltryggður (gömlu hjónin-Huld og Sigrún og svo Rúna frá Köben að ógleymdri Sibbu, ofurhlaupara.  Við Huld og Rúna vorum á rosalega fínu Hilton hóteli, sem Rúna hafði verið svo elskuleg að græja fyrir okkur og Sibba var á öðru hóteli skammt frá með slatta af ofurhlaupurum og nokkrum venjulegum. Hvað er það samt að vera venjulegur hlaupari?  Er það ekki heilmikið afrek í sjálfu sér að klára heilt maraþon? Það er ekki eins og maður hlaupi 6 flugvallarhringi eða til KEF að gamni sínu. Eða er það? 
Undirbúningurinn fyrir þetta hlaup tók um 9 vikur, eða helmingi styttri tíma en í fyrra. Prógrammið var flott og skemmtilegt en ekki endilega létt.  Oft er meira ekki endilega betra.  Nema þegar um er að ræða vissa hluti, eins og bjór.

Að minnsta kosti einu sinni var ég hætt við að fara og síamssystirin næstum því.  Svo tók maður bara punginn á þetta. 3G.
Mikið svakalega ætlaði ég ekki að stressa mig á þessu.

Það tókst nokkurn veginn.

Á  keppnisdag var kalt, 4°C og gola en við höfðum nægan tíma til að nærast vel.  Við Huld karbólóduðum í einn og hálfan dag í stað þriggja.  Okkur leið ekki vel af þeirri drykkju svo við hættum bara.  Ég tók „anti-cramp“ töflur í tvo daga fyrir hlaup og í hlaupinu. Ég vissi ekkert hvað var í þeim.  Það stóð hvergi.  Ég fékk enga krampa og var stálslegin sem aldrei fyrr í hlaupinu.  6 gel runnu niður með nokkrum hálfum glösum af vatni eða isotonisch drykk.  Líðanin í hlaupinu var afbragðsgóð.  Ég vissi að þetta yrði minn dagur. Ég var búin að hvíla óvenju vel í nokkra daga.  Ég elti „pacer“ allt hlaupið og það var gott og gaman.  Brautin er flöt og skemmtileg.  Mér leið of vel. Þuldi í sífellu möntruna mína „áfram Hera“, en Hera er fótboltavinkona mín úr Val sem berst við mjög erfið veikindi. Ég hljóp eiginlega mest fyrir hana. Vil að henni batni.  Hún er keppnis.  Þegar ég frétti af alvarleika veikindanna hjá henni var ég um það bil að hætta við maraþonið.  Þetta var í byrjun sept.  Eftir að ég heyrði um stöðu mála ákvað ég að láta slag standa.  Mitt verkefni væri lítils virði á erfiðleikaskalanum miðað við hennar.  Það væri of auðvelt að hætta.  Það má ekki hætta.  Það er ekki í boði.

Seinni hluta hlaups var ég staðráðin í að hanga réttum megin, beið samt eftir „vonda kafla landsliðsins“.  Hann kom ekki.   Þá hugsaði ég – þetta er of auðvelt, ég er ekki að fara að missa þessa blöðru ( 3:44 pacer) frá mér.

Ég fór fram úr fullt af fólki síðustu 7km.  Ég var fersk.  Endamarkið var inni í sportshalle.  Rauður dregill, gógó stelpur, tónlist og læti.  Ég sá ekkert og heyrði ekkert, ánægjan var of mikil.  PB og skítlétt. Mig langaði ekkert að gráta eða leggjast niður eins og oft áður.  Mig langaði bara að finna bjórtjaldið og hlægja.  Finna stelpurnar.  Ég vissi að Sibba myndi massa sitt hlaup og vissi líka að fyrirrennari minn (Forerunner) myndi standa sig prýðisvel og gera betur en í fyrra.  Enda hafði hún æft með Sibbu, að hluta til. Ég vonaði að Rúna myndi koma í mark skammt á hæla mér.  Ég vissi ekki hvað hafði gerst með hana fyrr en ég hitti þær þrjár hjá pokageymslunni.  Hlutirnir ganga ekki alltaf eins og maður heldur að þeir gangi.  Stundum ganga þeir verr og stundum betur.  Í  þetta sinn gengu þeir betur hjá mér.

Þakka þeim sem lásu.
SBN
Ég dansa það af mér!
Smellið á "finish cam close-up left" og fylgist með stúlku í skærgrænum langerma bol og bleikum yfir. 

Fjórar fyrir hlaup

Skrýtin heimreið!

Októberfest

 

 

Þriðjudagur 30. nóv - Norðan garri

Norðan garri mætti þeim er hlupu af stað frá höfuðstöðvunum í dag.

Alls mættu átta stykki: Dagur, Jón formaður, Jói hinn síðari, Oddgeir, Sigrún von Frankfurt, Bjöggi kenndur við fegurð, Heilla Dís og Fjölnismaðurinn.

Í dag var tempódagur í boði Jóns formanns, sem reyndar stytti sér leið og beygði af við Suðurgötu, ásamt Sigrúnu sem nýkomin er heim frá Frankfurt.  Annars var dagsskipun Jóns eitthvað á þessa leið: 5 km á tempóhraða.  Það þýddi fyrir þá sem hófu sprettinn á gatnamótum Hringbrautar og Hofsvallagötu að því takmarki yrði náð við ca. Kafara (menn hlupu síðan ýmist um Hofsvallagötu, Kaplaskjól eða Meistaravelli).  Var vel tekið á því, sérstaklega þegar stutt var í Kafarann og sumir sáu að aðrir voru u.þ.b. að ná þeim.

Rólegt niðurskokk í gegnum Öskjuhlíðarskóg að lokum.

Vegalengdir í dag frá 7 km til rúmlega 9 km.

Jákvæð kona leggur í‘ann

Það er ekki alltaf sem áform um uppskeru eða viðhald á sér stað þótt manni þykir það eiginlega það eðlilegasta í heimi eða fyrir það minnsta lágmark þegar búið er að eyða tíma og púðri í æfingar og hvað þá að berja smá járni inni í skrokkinn á undirbúningstímabilinu.

En nei það er sko ekki sjálfsagt að allt dæmið gangi upp og nú tala ég af reynslu, reynslu sem ég hélt að ég myndi nú aldrei þurfa að lenda í.

Vaknaði á föstudagsmorgni með beinverki og höfuðverk en eins og jákvætt fólk gerir þá hristir maður svoleiðis fljótt af sér og skellir þessu bara á stressið. Mikil spenna var nú í ungu konunni enda að fara að hitta hina yndisfögru Síams systur. Eftir flug fór ógleðinn að hellast yfir en þar sem ég er nú bjartsýn og jákvæð að eðlisfari þá var þessu líka bara skellt á spenning og stress, enda fátt skemmtilegra en að þreyta maraþon. Laugardagurinn var í sama fasi en unga konan bar sig massa vel og reyndi eins og herforingi að láta lítið við þessu bera og hafði sig allan við að borða matinn sinn en kláraði nú ekki alltaf eins og hún er vön, eitthvað var það nú skrýtið en svona er bara stressið, það fer alveg með mann svona dagana fyrir mót!!! Sunnudagsmorguninn leit bara nokkuð vel út. Þá fann ég hið raunverulega fiðrildi sem kemur og það var svona mun vægara en ógleðistilfinningin sem var búin að láta vart við sig sl. daga. Spennan magnaðist bara og tilhlökkunin mikil. Pælingar fóru af stað hvort ég gæti nú kannski PBað eða haldið mig kringum 4 tímana, sem væri nú bara allt hið besta mál. Mestu máli skipti var nú bara að hafa gaman og gera sitt besta. Við Sigrún fundum okkur stæði og þutum af stað. Hún fór nú fljótt úr augsýn en minns var bara góður á sínu róli. Eftir 3Km fór eitthvað undarlegt af stað, maginn útþendist og ógleðinn færðist yfir mig. Hvað skyldi nú vera í gangi? jæja ég fer nú ekki að láta þetta trufla mig og hélt því áfram en alltaf versnaði og versnaði ógleðin og þurfti ég alveg að hafa mig alla við að fara ekki út í kant og gera jú know!. Hélt áfram á sama róli og hélt þetta myndi líða hjá en á km 14 gat ég ekki meira og líkaminn bara mótmælti. Djöfull er hér í gangi, er þetta aumingjaskapur eða hvað? Hringdi í hinn helminginn minn og enginn svaraði. Brotnaði hér bara alveg niður og var í rusli, byrjaði að labba og hlaupa til skiptis. Barði inn í hausinn á mér að þetta væri nú bara aumingjaskapur og ég gæti ekki verið neitt veik, hvernig gæti það staðist, ég sem verð aldrei veik!. Náði svo loksins í hinn helminginn sem er nú vanur að berja mann áfram en fann að ekki var allt með felldu, enda ekki vön að væla yfir því að hlaupa, meira í hina áttina. Vildi hætta en hvatti mig til að halda aðeins áfram en þarna voru magakrampar byrjaðir á fullu og sama hvað ég gerði hættu þeir ekki – líkaminn var hér algjörlega að mótmæla. Þrjóskan tók hér við en ákvað að láta Huldina vita að hér væri nú ekki allt með felldu og sendi henni sms. Hér kom sér vel að vera með símann á sér, en það hef ég bara aldrei á ævinni gert áður, mun líklega aldrei gera aftur til að forðast minningar hlaupsins…..

Ekki liðu margir km og líkaminn gargaði á að hætta þessu bullu og ég snéri því við. Hringdi í Tómasinn og sagði honum að þetta væri búið, væri farin til baka (var þó ekki viss hvernig)…..hér var ég komin ca 17km. Hann hvatti mig til að finna medical tjald og fá mat á ástandið. Auðvitað hlýðir maður bara og því snéri ég við og labbaði og skokkaði til skiptis, ætla ekkert að fara út í smáatriði hvernig mér leið. Kringum km 21 var medical aðstoð og þar var ég mæld bak og fyrir. Eftir nokkrar mælingar var mér sagt að sykur, blóðþrýsingur og púls var allt í góðu, þú er greinilega í góður formi en bara veik!! (sem ég var nú búin að finna út úr sjálf!). Tjáð að hlaupa ekki en gæti gengið! Mér var einnig tjáð að það væri rúta handan við hornið en ekki vitað hvað var langt í næstu rútu. Ákvörðun var því tekinn – heim skal halda, sé nú ekki tilganginn í því að labba hálft maraþon með magakrampa og uppköst í bland, enda þarf ég ekki að sanna fyrir neinum að ég get hlaupið maraþon. Hálft maraþon var skammturinn þann daginn á Bruttó tíma 2:42:03



Kveðja frá magakveisaranum

RRR

Mánudagur 29. okt - Fleyg orð örmagna hlaupara

Mestmegnis hrútar mættu í dag: Jón formaður, Íbbi, Úle og Tag Heuer.  Að auki hlupu Fjölnismaðurinn og Oddgeir með hrútspungunum.  Hefðbundinn hringur via Hofsvallagötu hlaupinn og ýmislegt skrafað, þ.á.m. afrek okkar kvenna í Frankfurt í gær, sunnudag.

Í framhaldi af umræðu um maraþonhlaupið í Frankfurt bar á góma tvö skemmtileg tilsvör Dags og Fjölnis (ýmist sönn eða færð í stílinn) við komu þeirra í mark í maraþonhlaupum þar sem menn voru algerlega búnir á því.  Þegar Dagur kom í mark um árið í Boston, blautur og hrakinn, kom starfsmaður hlaupsins að honum og spurði á sína amerísku vísu: "Ær jú ókei?".  Flestir sem þekkja eitthvað til Dags myndu ætla að Dagur hefði nú bara harkað af sér og sagt "Æ em fæn!".  En því var nú ekki að heilsa og á Dagur að hafa svarað eitthvað á þessa leið "Nó æ em not".  Og var ekki að sökum að spyrja; maðurinn var dreginn rakleitt inn í sjúkratjald þar sem hlúð var að honum með nuddi og öðrum fínheitum.  Saga Fjölnis var eitthvað á þá leið að þegar hann kom örmagna í mark í Edinborg nú í vor var ástand hans slíkt að vallarvörðum þótti vissast að skella honum strax í hjólastól.  Á Fjölnir að hafa sagt hátt og snjallt rétt áður en hann settist örmagna í hjólastólinn: "Æ em a kargóking!".

Alls 8.5 km í frábæru stuttbuxnaveðri.  Eins og svo oft áður mættu menn Jóa hinum fyrri þegar verið var að teygja.  Jói hafði gengið af göflunum í hádeginu, eins og svo oft áður.

Frankfurt Marathon, wie gehts? - Úrslit

Sunnudaginn 28. okt:

Tvær yngismeyjar á vegum skokkklúbbsins luku keppni í Frankfurt nú rétt áðan.  Stóðu þær sig með mikilli prýði og fara flögutímar þeirra hér á eftir:

  -  Huld: 03:19:59

  -  Sigrún Birna: 03:43:05 (PB)


Til hamingju yngismeyjar.

Föstudagur 26. okt - Bæjarrúntur við frostmark

Flestir þeir sem mættu í dag hlýddu skipun formanns og mættu í stuttbuxum (þið munið kannski að hann tók sér alræðisvald um daginn og lengdi stuttbuxnatímabilið einhliða um einn mánuð, þ.e. til loka október).  Einhverjir þóttust hins vegar ekkert kannast við þessa tilskipun og mættu í síðum.  Hitastig á hitamæli við Valsheimili (0° C) og vottur af snjókomu/slyddu minnti menn á að veturinn er ekki langt undan.

Hersingin, sem samanstóð að Guð-na (leiddi för), Sæla, stuttbuxna Jóni, síðbuxna Ívari, Oddgeiri, Úle og Bjögga fór Hringbraut á enda, þaðann inn á Ánanaust, um Vesturgötu, Austurstræti, Bankastræti, Skólavörðustíg, Skólavörðuholt og þaðan stystu leið að höfuðstöðvum.  Jói hinn fyrri birtist svo þegar verið var að teygja.  Hann hafði gengið (ansi nærri sér) í hádeginu, en var að öðru leyti hinn hressasti.

Ritarinn, óver end ád.

Fimmtudagur 25. okt - Háleit markmið

Átta frískar lappir mættu en þær tilheyra þeim Jóni fráfarandi, hinum Jóa, Fjölni og Oddgeiri.

Lagt af stað í hefðbundinn hring via Hofsvallagata. Jón Örn var hins vegar með plan, geysigott plan, ef út í það er farið. Málið er nefnilega það að maðurinn er með stór og háleit markmið fyrir komandi misseri, markmið sem ekki verður farið nánar út hér að sinni.

Að skipan Jóns Arnar hófust 400m sprettir er komið var út á Ægisíðu.  Alls urðu sprettirnir sex að tölu og stóðu menn sig almennt vel nema hvað Fjölnir gerði sér upp meiðsli, enda nýlega búinn að taka hálft FM hnakka maraþon og það á fínum tíma.

Alls tæpir 9 km.

Styttist í aðalfund

Nú styttist óð-fluga í aðalfund félagsins og nokkrir félagsmenn voru á brainwash fundi í hádeginu í dag að finna til nýjar tillögur að lagabreytingum fyrir félagið.

Finnst Formanni ástæða til að minna félagsmenn á að skila inn tillögum að lagabreytingum fyrir kl. 08:00 þann 2. nóvember n.k. til einhvers stjórnarmanns.  Að öðrum kosti er óvíst að náist að fjalla um þær lagabreytingatillögur á aðalfundinum.

Annars mættu í Dag, Guðni, Óli, Björgvin, Þórdís, Ársæll og að sjálfsögu Formaðurinn.  Hljóp þetta lið rétt rúmlega 8 km á mismunandi tíma en allir lögðu þó af stað á sama tíma og komu í mark á sama tíma.

Formannskv.
Formaðurinn

Hrútapóstur

Þrír karlmenn(Ársæll, Guðni og Jón Örn) réðust til atlögu við Hofsvarlagötuhringinn fræga á réttum tíma í dag, enda frábært véður. Fréttist líka af þremur stúlkukindum á hlaupum og uppveðraðist karlpeningurinn allur við það.  Var töluvert rætt um gæði Íslendinga, bæði hvað varðar stærð og eins íslensk smíði á hjálpartækjum fyrir aðrar þjóðir til að ná sömu stærð.  Varð hrútastóðið þó aldrei vart við kindurnar enda ekki fengitími núna.  Nema þær hafi bara hlaupið mun hraðar en hrútarnir, sem er jafnvel ennþá líklegra.

Alls tæpir 9 km.

kv.
Formaður

Stæltir félagar

Helgin hefur greinilega tekið sinn toll af mönnum.  Aðeins tveir félagar, Sæll Formaður voru mættir á pinna í hádeginu í dag og sjaldan hefur fegurðarstuðullin verið svona hár.  Voru menn í fantagóðu formi og hlupu meðal annars fram úr Forseta gönguklúbbsins og félaga vorum.

Fyrir þá fjölmögru sem ekki meikuðu pinna, er hér svolítið til að hjálpa mönnum af stað aftur....
http://www.youtube.com/watch?v=9vmWiuKz4e8

kv.
Formi

Ný hlaupadagbók

Gleðilega afmælisveislu comradar

Langaði bara til að benda félagsmönnum á að á hlaup.is síðunni er nú komin hlaupadagbók.  ATH að það þarf að skrá sig inn á síðuna til að geta séð dagbókina.  Hún er síðan undir hlaup flipanum sem Hlaupadagbók.

Formaðurinn er búinn að stofna hóp utan um okkur á síðunni, svo endilega verið dugleg að bæta ykkur í hópinn.

Annars óska ég þátttakendum í haustmaraþoninu góðs gengis og okkur öllum gleðilegrar afmælisveislu á morgunn.  Munum bara að geyma smá orku í æfingar næstu viku.

Powerade#1

Fyrsta vetrarhlaup Poweradeseríunnar var haldið síðastliðinn fimmtudag í blíðskaparveðri.  Úrslit okkar fólks fara hér á eftir:

Oddgeir 40:09
Ása 43:44
Huld 45:02
Sigrún Birna 47:38
Fjölnir 47:55
Jóhann Þ. 50:00 (fyrsta hlaup í seríu)
Rúna Rut 51:14
Jón Örn 52:51

Flottur hópur, til hamingju með þetta!
Ritarinn

Þriðjudagur 16. okt - Fimm þúsundkallar

Tókum fimmþúskjellinn (5*1000m tempósprettir)í dag, sem telst bara "létt æfing" ef allt er tekið með í reikninginn.  Mættir vóru: Gunnur, sem hörfaði inn Suðurgötu, Johnny, sem þóttist ætla að hörfa, Dagur, sem reiknaði eitthvað út ca. hálfa leiðina, Guðni, sem hleypur fyrir Össur (í flugdeildinni, af því hann hleypur ekki), Oddgeir, sem hækkaði í stigagjöf í Powerade, ekki af því hann stóð sig svo vel heldur af því hann er svo gamall, Jói og baunagrasið, af því að hann er í vexti, Bjöggi og byssurnar, af því að hann er skotveiðimaður og SBN því einhver þurfti að ráða æfingunni.  Það var a.m.k. mjög gott veður til þess að eyða fimmþúsund kallinum og allir stóðu sig með stakri prýði.
Over and out,
SBN

Vísindahornið- Kolkrabbar hafa sem kunnugt er 8 arma og mun 3. armurinn jafnframt vera limur hans.  "That´s the reason the third one is so hard", í kolkrabbanum, sko...

Mánudagur 15. okt - 10 litlir hlaupagikkir

Fín mæting í dag. 10 litlir hlaupagikkir hlupu hefðbundinn flugvallarhring um Hofsvallagötu í fínu veðri.  Helst bar til tíðinda, hvað mætinguna varðar, að lærleggur (lærlingur) Úle, hann Pétur, mætti og dröslaðist hina rúmu 8 km þó óvanur væri.  Úle fékk reyndar nokkrar ákúrur frá meðhlaupurum sínum um mitt hlaup fyrir óþarfa skrafhreyfni við kvenpeninginn í stað þess að fylgjast afdrifum lærlingsins.

Þá bar það einnig til tíðinda að týndi sonurinn, hann Sigurgeir, lét veikt k(h)né fylgja kviði og mætti eftir langa fjarveru.  Var honum allvel tekið.

Alls rúmir 8 km og allir kátir og sprækir að hlaupi loknu.

Þriðjudagur 9. okt - Að vera náður eða ekki vera náður

Sex galvaskir, kiðfættir piltar úr Tungunum mættu á þriðjudagsæfingu.  Dagur var með plan sem fólst í því að taka tempókafla inn í æfingunni þar sem hlaupið yrði frá horni Hofsvallagötu og Ægisíðu að "Kafara" (ca. 3.5 km) með mismunandi forgjöf/forskoti.

Eftir að menn höfðu gefið upp áætlað tempó fyrir tempókaflann var farið að reikna eftir kúnstarinnar reglum hvernær hver og einn skildi leggja af stað.  Ef útreikningar væru réttir, og menn héldu sér á uppgefnu tempói, ættu allir að skila sér við "Kafara" á sama tíma.  Það gekk ekki alveg eftir þar sem fremsti maður sprakk t.d. á limminu um miðja leið og hóf keppni í göngu.  Að öðru leyti voru menn ekki svo langt frá þessu og skiluðu fjórir af sex sér nokkurn veginn á sama tíma við "Kafara".

Síðasta spölinn var svo tekinn "deddari" (rúmir 500m) í gegnum Öskjuhlíðarskóg með forgjöf.

Sem sagt alvöru æfing fyrir alvöru karlmenn.

Föstudagur 5. okt - íslensk Túnga

Þrí amígos, Úle, Dagur og Oddgeir, mættir í frábæru haustveðri, sól og hægviðri.  Bæjarrúntur tekinn og margt skrafað þó einna helst um íslenska tungu.  Einn í hópnum (getið hver) hefur sterkar skoðanir á því hvað svokallaðir fræðingar séu að vilja upp á dekk með því að segja okkur hinum hvernig eigi að tala og rita íslensku.  Málfræðireglur og venjur eins og hvenær skuli rita stóran staf, einfalt i eða y, tíðir o.s.frv. eru að hans áliti einungis til trafala eðlilegri þróun íslenskrar tungu.

Spurður um það hvernig hann myndi t.d. skýra út á prenti hvort hann hefði séð fíl eða fýl svaraði hann eitthvað á þessa leið: "Ég sá fuglinn fíl".  Ef um hitt dýrið var að ræða yrði ritað: "Ég sá fílinn fíl".

Þriðjudagur 2. okt - 2 sinnum 3000 kall

Það hafði kvisast út að æfingin í dag yrði gæðaæfing með stóru G-i og var mæting með besta móti, alls 11 manns + Sveinbjörn sem ákvað að ganga í hægðum sínum.  Gestur æfingarinnar var hún Sibba, sem ætlar með Huld og Sigrúnu til Frankfurt í lok mánaðar að keppa í pylsuáti.

Lengdur flugvallarhringur (rangsælis), sem hófst á upphitun uns tempóhluti æfingarinnar tók við á Hringbraut (við gatnamót Hofsvallagötu).  Hlaupið um Framnesveg, Kaplaskjól og þaðan inn á Ægisíðu.  Tvö 3000 metra tempóhlaup með 3 mín hvíld á milli.  Lauk ósköpum þessum ekki fyrr en við Öskjuhlíð.  Eftir það var niðurskokk að höfuðstöðvum.  Alls 10k.

Mánudagur 1. okt - Íslandsmeistarinn mætti

Enn í sigurvímu (og smá þynnku), eftir samfögnuð með sínum mönnum um helgina, mætti Fjölnir galvaskur til leiks og hljóp sigurhring umhverfis flugvöllinn.  Sigrún, Þórdís og Oddgeir samglöddust honum og hlupu með honum.  Formaður skokkklúbbsins samfagnaði einnig en hljóp aðeins hluta sigurhringssins.

Við komu að höfuðstövðum, eftir sigurhringinn, mættum við Úle með lærling að nafni Pétur sér til trausts og halds.  Þeir tóku stuttu útgáfuna af hádegisæfingu.  Ekki er enn vitað hvað Úle hyggst fyrir með lærlinginn.

Drög að æfingaáætlun fyrir ASCA vorið 2013

Mánudagar : Þrekæfingar til að byrja með, sambland af hlaupum og styrktaræfingum. Verður síðan skipt út með meiri hraðaæfingum eftir því sem líður á tímabilið.

Þriðjudagar : 'No Whining Tuesdays', hefðbundinn eltingarleikur eftir getu og nennu hvers og eins, Hofsvallagatan+ eða forgjafarhlaup

Miðvikudagar : Rólegt-recovery. Styttra en venjulega og endað með góðum teygjum.

Fimmtudagar : Erfiðar æfingar á fimmtudögum. Byrjum í brekkum (Kolkrabbinn, Kirkjugarðurinn, Öskjuhlíðarbrekkan, Stokkurinn m.m.) til styrktar en færum okkur svo meira yfir í sprettina eftir því sem líður á undirbúninginn.

Föstudagar : 'Freaky Friday' að hætti hússins með nýjan gestaþjálfara í hverri viku sem ræður för.

Reikna skal með löngu hlaupi um helgar og bent á hina fjölmörgu skokkhópa sem skipuleggja svoleiðis. Annars erum við líka með sms-lista sem hægt er að vera með á. Þess á milli eru síðan lyftingar, sund, hjólreiðar, göngur eða hvaðeina sem fólki dettur í hug að taka sér fyrir hendur.

Æfingaráætlunin gerir ráð fyrir að ekki mæti allir alltaf en þó þannig að allir finni eitthvað við sitt hæfi og allir geti hlaupið með. Þannig geti þátttakendur, á eigin forsendum og markmiðum, tekið ákvörðun um það hvernig tekið er þátt í æfingunum hverju sinni. Einnig er alltaf hægt að 'fara sér'.

Stjórn skokkklúbbsins.