Föstudagur 31. jan - Að sinna erindum í bæjarrúnti

Félagarnir Ívar, Dagur og Oddgeir sáu um hlaupin í dag á meðan Sveinbjörn og Jói sáu um aðra hreyfingu.

Einn hlauparanna átti brýnt erindi í Tryggingastofnun og var því ákveðið að stilla bæjarrúntinn af í samræmi við það.  Þar komu menn hins vegar að lokuðum dyrum rétt fyrir hálf eitt.  Í ljós kom að afgreiðslan er opin á föstudögum frá 10 til hvorki meira né minna en 12.  Þeim er átti erindið tókst hins vegar að ljúka sér af þar sem hægt var að koma bréfi því er hann hafði meðferðis í þar til gerða lúgu.  Við það hélt hópurinn sína leið, glaður í bragði.

Bæjarrúnturinn endaði síðan í tæplega 8 km.

Fimmtudagur 30. jan - Góðverk dagsins

Mætt í dag voru Úle, Dagur, Oddgeir og Síamssystur.  Cargobræður komust ekki þar sem þeir eru enn að jafna sig eftir átök þriðjudagsæfingarinnar (að sögn kunnugra).

Rangsælis hringur um flugvöllinn.  Á horni Hofsvallagötu og Hringbrautar skildu leiðir.  Síams fóru Hofsvallagötu en drengirnir héldu áfram, annars vegar niður Kaplaskjólsveg og hins vegar niður Meistaravelli.  Það runnu tvær grímur á Dag (setti upp kindarlegan svip) þarna á horninu þegar hann áttaði sig á því að hann ætti að fara tempó með drengjunum en ekki rólegt með stelpunum.  "Ég hafði hugsað mér að fara með stelpunum" sagði hann þá.

Drengirnir náðu Síams rétt eftir Dælustöðina.  Verður ekki látið upp hér hvað þær voru að gera þegar þeir komu að þeim!

Dagur hafði enn tíma til að vinna góðverk og það tókst.  Fyrrum ráðherra var á hlaupum við Þyrluþjónustuna.  Degi fannst hann fara fullt hægt yfir og linnti ekki látum fyrr en honum hafði tekist að fá hann til að auka hraðann og halda honum að Kafara.  Að vísu var fyrrum ráðherra þá kominn í mikla andnauð, en Degi var alveg sama.  Hann hafði náð sínu fram og var bara býsna ánægður með þetta allt saman.

Alls 8-9 km.

Föstudagur 24. jan - Bannað að skilja eftir

Síamssystur heiðruðu samkomuna í dag ásamt Úle og Oddgeiri.

Fóru bæjarrúnt, enda föstudagur.  Síamssystur kvörtuðu sáran undan því að vera skildar eftir á hlaupum.  Það má ekki gerast og hlýddu Úle og Oddgeir skilyrðistlaust, enda þægir drengir.

Rúmlega 7 km

Fimmtudagur 22. jan - Fimm á tempói

Gæðaæfing í dag með þeim Þórólfi, Degi, Ívari, Úle og Oddgeiri.

Flugvallarhringur um Kaplaskjól (hjá sumum) og Meistaravelli (hjá hinum) með sambærilegum sprettköflum og verið hafa á boðstólum upp á síðkastið.

Alls frá 10,5 km til 11,0 km.

Miðvikudagur 22. jan - Tveir spaðar

Tveir spaðar hlupu í dag, Dagur og Oddgeir.  Hlupu stuttan flugvallarhring, um Suðurgötu, kátir og sprækir.

Alls 7 km + planki.

Jói var svo sjóðheitur á kantinum.

Þriðjudagur 21. jan - Æfing til heiðurs Alice Cooper

Þessi mættu í dag: Þórólfur, Fjölnismaður, Dagur, Ívar, Oddgeir og Katrín Edda.

Katrín Edda snéri á strákana og fór snemma af stað, var að ljúka sinni æfingu þegar þeir voru að gera sig klára.  Strákarnir vissu að í dag væri þriðjudagur og að á þriðjudögum er ætlast til þess að menn hafi einhver gæði í æfingunum.  Dagur var alveg með á hreinu hvað yrði á dagskránni; Cooper-testið!  Það felur í sér 12 mínútna "all in" sprett sem síðan er endurtekinn að einhverjum tíma liðnum og framfarir (eða afturfarir) þannig mældar.  Hefðbundinn rangsælis hringur um flugvöllinn um Hofsvallagötu.  Cooper-testið hófst svo á mótum Hofsvallagötu og Ægisíðu og lauk meira og minna hjá mönnum við Þyrluþjónustuna, sem er vestan við braut 01.  Verður að segjast eins og er að menn voru bara býsna sprækir!

Til stendur að halda Cooper-testið mánaðarlega fram á vor til að mæla árangur manna og kvenna, m.a. þeirra sem ætla sér í maraþon á næstunni.

Alls rúmlega 8 km.

Mánudagur 20. jan - 5+1

Ágæt mæting í dag, 5+1: Dagur, 1/2 Cargo kóngur, Úle, Ívar, Oddgeir og Huld.

Mismikill metnaður í dag, sumir fóru langt, aðrir styttra, sem er bara í fínu lagi.  Sumir hlutu drjúgan spöl um helgina.

Þeir sem lengst fóru náðu góðum 9 km.

Föstudagur 17. jan - Vörutalning og árshlutauppgjör

Bæjarrúntur, þar sem Síamssystur, önnur Cargo systra, forsetinn og Oddgeir mættu.

Frábært veður, hlýtt og rjómalogn.  Það varð tilefni til bölsýni af hálfu Cargo systur, sem óttast að okkur verði refsað í sumar með leiðinlegru veðri vegna þess góða veðurs er nú ríkir.

Í höfuðstað tóku hin Cargo systirin og JB Run á móti hópnum.  Vambirnar voru vel útkýldar og þeir í óðaönn að stanga úr tönnunum.  Er gengið var á þá af hverju þeir kysu frekar óhollustu í stað hreyfingar brugðu þeir fyrir sig bókhaldstungumáli, að þeirra hefði verið þörf í mötuneytinu vegna vörutalningar á frönsku kartöflunum og árshlutauppgjöri þar að lútandi.

Alls 8,5 km.

Fimmtudagur 16. jan - Gæði, gæði, hraði

Orðið yfir æfingu dagsins er gæði, a.m.k. fyrir suma.  Til æfingar mættu Þórólfur, Dagur og Oddgeir.  Sami hringur og á þriðjudaginn, með sömu sprettútúrdúrunum, en á miklu meiri hraða.

Alls 10 km.

Hagsmunasamtök FISKOKK

Mættir: Dagur, Ívar, Óli forseti og Sigurgeir.

Mættum Þórólfi þegar við vorum að byrja og þá var hann að klára sína æfingu. Sveinbjörn var líka á svæðinu og fór á brettið inni.

Undirritaður mætti of seint á æfingu! Fór kött-inn til að reyna ná þeim sem fóru á réttum tíma, hópurinn sameinaðist hjá HÍ þar sem þeir bættu aðeins við til að gefa mér færi á því að eiga með þeim smá moment. Þessi gæðastund var því miður ekki löng þar sem þeir voru á leið vestur í bæ á meðan undirritaður fór Suðurgötu. Óli forseti dró strákana sína 9,5 km og sagði að þeir væru með fókusinn í lagi, enda er undirbúningur fyrir undirbúning á fullu.

Miklar umræður eru í gangi varðandi að færa heimasíðu FISKOKK á Facebook og hafa verið stofnuð hagsmunasamtök FISKOKK á Facebook. Þessi hópur stefnir á að afhenda Óla forseta undirskriftalista á Bessastöðum í næstu viku þar sem farið verður fram á að stjórn FISKOKK verði komin með heimasíðuna á Facebook fyrir 1. febrúar 2014.

Kv. Geiri CK

Tímamót...

Mættir: Dagur, Ívar, Sveinbjörn og CK (báðir).

Þegar allir voru klárir í klefanum sáum við Sveinbjörn á stuttbuxum og bol, enda ekki kallaður Chuck-arinn fyrir ekki neitt! Reyndar kom svo í ljós að hann ætlaði að skokka inni á brettinu...

Restin fór kött-inn þar sem var ákveðið að hugsa málið fram að bakarí og sjá hvernig stemmarinn væri í hópnum. Það er greinilegt að allir voru hungraðir í gæðaæfingu. Endum á gæðaæfingu þar sem allir fóru 3 hörkuspretti.

Núna verða gæðaæfingar á þriðjudögum og fimmtudögum fyrir þá sem hafa áhuga á því. Einnig er planið að fara taka langar æfingar á laugardögum.

Það kom upp umræða um heimasíðu klúbbsins og hvort það væri ekki komin tími á að fara með hana yfir á Facebook. Allir voru sammála því að það væri komin tími á það og nú setjum við pressu á stjórnina að fara í það mál, þrátt fyrir að 2 af 3 í stjórn eru ekki á Facebook!

Kv. Geiri CK

JB Run í sókn?

Dularfullur maður í svartri hettuúlpu sást á vappi við Hótel Loftleiðir í hádeginu í dag.  Þegar betur var að gáð kom í ljós að þetta var JB sjálfur – Der König - í könnunarleiðangri.  Nú vill svo til að undirritaður er félagi í JB Run og þar sem Oddur aðalritari FI Skokk var sá þriðji sem myndaði skokkhóp dagsins var ljóst að JB Run var í meirihluta.   Samkomulag náðist um að hlaupa Hofsvallahringinn.  Tveir blástakkar og svört hettuúlpa hlupu af stað út bílaplanið og hurfu fyrir hornið á skrifstofubyggingunni - út í veður og vind.

ÓB.

Föstudagur 10. jan - Farið um langan veg

Bæjarrúntur á hálku og dálitlum vindi.  Forsetinn mætti.  Það gerðu einnig Ívar, Oddgeir, Cargo gellurnar og Dagur.

Það bar helst til tíðinda í dag að á Sæbrautinni varð á vegi hópsins maður nokkur á hlaupum.  Hann kvaðst ætla að hlaupa 50 km í dag, enda 50 ára í dag.  Hann var búinn með u.þ.b. 30 km þegar hér var komið við sögu.

8 km í dag.

Þriðjudagur 7. jan - Maraþonpælingar

Fjórmennt í dag: Dagur, Ívar, Cargo prinsinn kenndur við glamúr og Oddgeir.

Nokkur umræða átti sér stað um hugsanlegt maraþonhlaup á vormánuðum.  Ljóst er að einhverjir í hópnum iða í skinninu og langar í hlaup. Hvaða hlaup verður fyrir valinu á eftir að koma í ljós en ákvörðun verður væntanlega tekin fljótlega.

Rétt um 8 km.

Mánudagur 6. jan - Ekki fara í Kópavoginn!

Ágætis mæting:  Þórólfur, Dagur, Cargo prinsarnir, Ívar, Oddgeir og Síamssystur.

Ákveðið var á síðustu stundu að beygja af leið og hlaupa inn í Fossvogsdalinn í von um skjól.  Þegar komið var að Víkinni var beygt til hægri og upp í Kópavoginn.  Þar linnti mönnum illa og var því ákveðið að koma sér strax aftur til Reykjavíkur.  Sigurgeiri sárnaði nokkuð en tárin höfðu þornað þegar komið var aftur að höfuðstöðvum.

Rúmlega 9 km.

Fyrsta æfing ársins!

Mættir: Dagur, Óli, Fjölnir, Sigurgeir og Ívar.

Allir nema Ívar mættu aðeins of snemma, ca. 20 mín fyrr, og fór þ.a.l. á undan af stað! Nýtt ár nýir tímar, maður spyr sig! En til að það sé nú alveg á hreinu þá eru æfingar áfram kl. 12:08

Ég veit því miður ekki hvað Ívar gerði en giska á suður eða hofs.

Þeir sem voru of snemma á ferð fóru Hofs, kött-inn! Eins og svo oft á þessum tímamótum voru markmið ársins rædd fram og til baka. Einnig var farið yfir áramótaskaupið, allir sammála um að það var með besta móti þetta árið.

Fréttir bárust af fv. formanni (Jón Lennon) okkar sem var á landinu yfir jólin. Það hefur lítið farið fyrir hlaupum hjá honum vegna tímaleysi, endalausar afsakanir.

Kv. Geiri CK

Við Áramót

Kæru FI skokkarar og landsmenn.

Nú, þegar við erum í þann mund að segja skilið við þetta ár, leitar hugurinn til baka og staldrar við þá atburði sem eru hvað minnisstæðastir á árinu sem er að líða.  Stutt var í samkennd hópsins og einhug þegar skorað var á hann eitt hádegið að finna svartan kött að nafni Nuk sem sloppið hafði úr einkaþotu á flugvellinum í sumar.   Eigandi kattarins, danska ævintýrakonan og milljónamæringurinn Susanne Alsing atti félaga í að ganga til liðs við hjálparsveitina í Öskjuhlíð, en þessi kona neitaði að yfirgefa landið í þotu sinni án kattarins.    Kötturinn fannst sem betur fer í flugskýli skammt frá þotunni.  Fleira vakti athygli á árinu.  Getgátur voru uppi um að JB Run væri aðeins tekjukeyrsla.    Á þessu kosningaári komst nýr formaður til valda og telja sumir að nú sé hafið langt og farsælt stöðugleikatímabil FI skokk með nýrri stjórn og að hinir róstursömu aðalfundir og átök um lög félagsins heyri sögunni til.  Altént heyrðust gamlir félagar tauta fyrir munni sér þessa vísu:

Forystan hjá FI skokk,

fann sér leið til valda.
Ætlar hún að stíga á stokk,
 og standa um aldir alda?

Einn er sá atburður sem er eftirtektarverður og hann er sá að formaður FI skokk flutti ekki stefnuræðu stjórnar á aðventuhlaupi samkvæmt fornri venju.   Nú er komið fram í árslok og svo fáir hafa skilað sér í hádegishlaupin á bílaplan Hótels Loftleiða  síðan aðventuhlaupið var haldið, að ekki hefur fundist vettfangur til að flytja ræðuna.  Vegna þess verður hér stikklað á stærstu atriðum stefnumála stjórnar:  Að reist verði upphitað biðskýli fyrir norpandi félaga vegna óþolandi biðtíma eftir Garmintækum gervitunglum.   Sama biðskýli verði nýtt í glennu- og teygjuathafnir skokkara eftir hlaup, en þetta ku hafa sært blygðunarkennd hótel gesta á síðasta ári og hafa menn þurft að hverfa með þessa háttsemi  suður fyrir hús.  Kanna hugmynd landsstjórnar um lækkun höfuðstóls félagsskulda og leggja niður vísitölutengingu.  Keyptur verði fundarhamar (Þórshamar) til að berja niður mótþróa  á aðalfundum. 

Gleðilegt ár !

Síðasta æfing ársins!

Mættir: Ársæll, Anna Dís, Óli Formaður, Dagur og Sigurgeir

Ársæll og Anna Dís létu vindinn ekkert hræða sig og fóru Suðurgötu á meðan restin flúði Kára og fóru skógræktina.

Það var farið yfir markmið ársins og næsta árs. Sumir náðu sínum markmiðum á meðan það vantaði aðeins upp á hjá öðrum að ná sínum markmiðum. Allir voru með markmið 2014 klár sem innihalda m.a. maraþonhlaup, 10 km og 1/2 maraþon. Sumir ætla að ná tímamarkmiðum á meðan aðrir eru meira að reyna ná ákveðnum fjölda hlaupa o.s.frv.

Fyrir ykkur sem eruð í vandræðum með að setja ykkur markmið fyrir 2014, þá eru hérna nokkur atriðið sem er gott að hafa í huga þegar þið ákveðið ykkar markmið.

Við höfum öll í okkur hæfileika til að ná árangir, við þurfum einfaldlega að læra að virkja hann. Það er staðreynd að ef við lærum að nýta okkur þennan hæfileika, þá getum við notið velgengni bæði í starfi og einkalífi frekar skjótt. Hér er einfaldar leiðbeiningar sem hjálpa þér.
Hvernig á að setja sér markmið og ná fullkomnum árangari í starfi og einkalífi.

1. Vertu einlægur og heiðarlegur við sjálfan þig. Skoðaðu heiðarlega hvar þú ert staddur, hvert þú ert að stefna og hver þú vilt verða.

2. Hafðu skilning á markmiðum þínum. Þeir sem ná markmiðum sínum í starfi og einkalífi, hafa skilning á þeim markmiðum sem þeir vilja ná og hvað er nauðsynlegt að gera og framkæma til að ná þeim.

3. Þú verður að öðlast hugrekki til að takast á við það sem þú óttast. Ef þú vilt færast yfir á næsta áfanga til að ná markmiðum þínum, þá verður þú að vinna stöðugt í því að yfirvinna það sem þú óttast að gera. Láttu ekkert standa í veginum fyrir þér.

4. Deildu velgengni þinni. Þegar þú nærð markmiði, áttu ekki að njóta þess í sjálfelsku. Margt fólk getur notið hluta af velgengninni, -- kannski ekki alltaf í beinu sambandi, t.d. fjárhagsleg velgengni er ekki átt við að þú eigir að gefa peningana til annara, þú getur deilt með öðrum reynslu eða með einhverjum hætt látið aðra njóta.

5. Byggðu upp eldmóð. Þegar þú ert fullur af eldmóð og ákafur, þá ertu stöðugt að vinna í markmiðum þínum. Þegar hindranir verða í veginum, þá notar þú eldmóðinn og ákafann til þess að yfirvinna þær. Sigraðu þessar hindranir, farðu í kringum þær, undir þær, í gegnum þær eða gerðu það sem er nauðsynlegt til að koma þér áfram í að ná markmiði þínu.

6. Vertu í jafnvægi. Það er nauðsynlegt að vera í góðu jafnvægi til að njóta velgengni. Þegar þú tekur ákvörðun um að framkvæma eitthvað, fylgdu því eftir. Það skapar jafnvægi.

7. Upplifðu velíðanartilfinningu velgengninnar. Þegar þú nærð markmiði, þá getur þú sagt, „ég nýt velgengni og ég er ánægður.“ Það þarf ekki að þýða að þú ætlir að láta staðar numið og að nú sé nóg komið, heldur getur þú sagt, „ Ég gerði þetta og ég er ánægður með niðurstöðurnar. Nú get ég haldið áfram með önnur markmið og nýtt mér það sem ég lærði til að ná enn betri árangri.

Kv. Sigurgeir

Föstudagur 20. des - Öfuguggi

Stjórnin "rúlaði" í dag, svo einfalt var það.  Hún mætti öll eins og hún lagði sig ásamt einum kvenkyns aðdáanda.

Bæjarrúntur með þrælöfugum "dead-ara" í Tjarnargötunni þar sem ekki tókst að taka hann í Aðventuhlaupinu í gær eins og oftast er gert.  Þrælöfugi "dead-arinn" var í stuttu máli þannig að í stað þess að enda við Ráðhúsið þá var byrjað þar og hlaupið á afturábak upp að hinu hefðbundna rásmarki.  Í ljós kom að Oddgeir var mesti öfugugginn.  Úle og Íbbi voru næstmestu öfuguggarnir og kvenkyns aðdáandinn var minnsti öfugugginn.

Rúmlega 8 km.

Fimmtudagur 19. des - Aðventuhlaupið: Pottur, sauna, bjór og matarafgangar

Það var þrusugóð mæting í aðventuhlaupið, alls 14 manns, ef með eru taldir þeir sem tóku bara góðu molana úr Mackintosh-dósinni, þ.e. fóru bara í pottinn, saununa og bjórinn.  Þau tímamót urðu að Sveinbjörn mætti ekki, í fyrsta skipti sem það gerist, að sögn kunnugra, frá því að menn og konur hófu að hlaupa Aðventuhlaupið fyrir allmörgum árum.

Það var lítilsháttar þema í þetta skiptið, hlauparar þræddu lítt kunnur götur í Þingholtunum, sem allar enda í -stígur.  Í lokin var síðan 2. armur Kolkrabbans tekinn og hlaupinu lokið í myrkri og hálku í Öskjuhlíðarskógi, svona rétt til að fá einhverja spennu í þetta.

Pottinum, saununni og bjórnum voru síðan gerð góð skil ásamt matarafgöngum, sem svangur þátttakandi nældi sér í af næsta borði sem nýlega hafði verið yfirgefið.

Rúmlega 7 km.