Fimmtudagurinn 24 maí

Tölvupóstur Dags í dag bjargaði mér með að muna eftir að setja inn æfingu í dag fyrir morgundaginn :).

Það verður næst síðasta æfing þessa tímabils. Það sem mig langar til að láta ykkur gera er að fara 100-200 m upp brekku (ekki mjög bratta og helst nær 200 m) og í beinu framhaldi af brekkunni að fara inn á svona 100 m flatan kafla (má jafnvel vera aðeins niður í móti).

Mér dettur helst í hug, og nú þarf ég að hugsa áttirnar vel svo að Guðni þurfi ekki að laga lýsingarnar :), að fara upp í Öskjuhlíð og í suður (eða SA eða jafnvel SSA) frá bílastæði perlunnar er lítill malarstígur sem endar með brekku upp á bílastæðið. Sennilega er best að fara sirka 200 m (200 góð skref) niður eftir malastígnum og byrja þar. Þegar upp á bílastæðið er komið (brekkan búin) er svo hægt að hlaupa þvert yfir bílastæðið (ætti að vera flatt) ef umferð er þolanleg eða beygja beint til hægri og fara niður afleggjarann/veginn sem liggur þar (gæti verið full mikið niður í móti þó). Ef þið hafið hins vegar betri stað í huga, endilega að nota þann stað.

Markmiðið með æfingunni er að hlaupa fyrstu 200 m (upp brekkuna) hratt en reyna svo bara að halda hraðanum en opna skrefin (lengja skrefin) þegar á flata partinn er komið (þannig ættuð þið að fara aðeins hraðar en ætti samt að vera léttara en að puða í brekkunni). Þetta hjálpar til með hraða og auðveldar að hlaupa hratt þreytt. Þessi æfing á að láta ykkur pústa aðeins þannig að þið megið ekki hlaupa of hægt (en heldur ekki byrja það hratt að þið komist bara 3 spretti).

Æfinging er þá sem sé 10 mín upphitun

2x5-6x(brekkan og beini kaflinn) með skokki til baka eftir sprettina og labbi til baka á milli setta.

10 mín niðurskokk

Gangi ykkur vel

Bjössi

Boðhlaup í Borgarfirði

Þann 10. júní verður haldið boðhlaup í Borgarfirði og stefnum við að því að senda sveit til þátttöku.

Hlaupið fer fram í Borgarnesi, í tengslum við Borgfirðingahátíð. Hlaupið hefst kl. 11:30 og er hlaupið frá húsi Sparisjóðs Mýrasýslu.

Hlaupið er 15 km boðhlaup með 5 þátttakendum. Að minnsta kosti 2 konur skulu vera í hverri sveit. Hver hlaupari skal hlaupa 1000 m þrisvar sinnum.

Þetta er hlaup sem klúbburinn tók þátt í og sigraði fyrir nokkrum árum og væri gaman að endurtaka leikinn núna.

Áhugasamir láti vita í 'COMMENTS' hér að neðan.

Gönguferð - Brúarárskörð

Næstkomandi laugardag stendur klúbburinn fyrir gönguferð inn að Brúarárskörðum, en Brúarárskörð eru eitt dýpsta gljúfur á Suðurlandi.

Lagt er upp frá bílastæðinu í Miðhúsaskógi og gengið yfir hraunið "upp á Litlahöfða austan árinnar og upp á brún Kúadals sem er lítið dalverpi inni í fjöllunum og þá blasa gljúfur Brúarár sem er mjög tröllsleg og þar sprettur áin fram í margbreytilegum uppsprettum og innarlega í gljúfrinu standa sums staðar bunurnar út úr klettaveggjunum. Af brúnum Kúadals er gott útsýni yfir skörðin en hægt er að fara innar og ganga niður í grasi vaxna brekku sem heitir Tangi en þar þarf að ganga fram á brún til þess að sjá stærsta fossinn í Brúarárskörðum."

Gangan tekur um fjóra tíma og er reiknað með að leggja af stað á hádegi.

Við verðum með aðstöðu í sumarhúsi STAFF í Reykjaskógi þar sem hægt verður að bíða eftir göngufólki ef ekki allir í fjölskyldu ganga.

Skráið þátttöku í 'COMMENTS' hér fyrir neðan.

Of seinn en samt...

Ég er of seinn með æfingu þessarar viku (man yfirleitt ekki eftir þessu fyrr en á fimmtudagsmorgnum sem er þá eftir hádegi á fimmtudögum að íslenskum tíma). Þið tókuð samt æfinguna frá í síðustu viku í fyrradag þannig að þá er ágætt að taka þessa á morgun eða í byrjun næstu viku.

10 mín upphitun upp á Klambratún (Miklatún)

Æfing 3-5x(sprettur 1, sprettur 2) með 1/2-3 mín á milli. Sem sé hlaupa 3-5 sett af 2 tegundum af sprettum, hvíla 1 mín eftir sprett 1 og 2-3 mín eftir sprett 2.

Sprettur 1:
Byrjað á SV horni túnins og hlaupið til V niður meðfram Miklubrautinni og svo beygt til hægri (til N) við Rauðarárstíg (að ég held, aldrei búið í RVK) og hlaupið niður á NA horn túnsins.

Sprettur 2:
Byrjað á NA horni túnsins og hlaupið eftir stígnum upp á SV horn túnsins (horn í horn)

10 mín niðurskokk niður á Hótel Loftleiði

Gangi ykkur vel

Bjössi

Æfing 10. maí

Sæl öll

Í dag tökum við aðeins hraðari æfingu en samt með magni.

10 mín upphitun og endað við 3 km merkinguna við vesturenda flugbrautarinnar



Hlaupum svo þaðan út að rauðu sólinni rúmum 300 metrum norðar í einum spretti



Hvílum þar í 1 mínútu og hlaupum svo í einum spretti til baka.

Þetta skal gert 8-12 sinnum eftir aldri og fyrri störfum (þ.e.a.s. 8-12 sprettir með mínútu hvíld á milli, EKKI 8-12 ferðir fram og til baka).

10 mínútna niðurskokk

Gangi ykkur vel og til hamingju með vel lukkað Flugleiðahlaup

Bjössi

P.S. myndunum stal ég af blogginu og þakka þeim sem tók þær kærlega fyrir

Frjálsíþróttamót 19. maí

Laugardaginn 19. maí verður Alucup haldið í annað sinn og stefnir Skokkklúbburinn að þátttöku í ár en við vorum ekki með í fyrra. Eftirfarandi tilkynning barst frá framkvæmdaraðila mótsins, en frjálsíþróttadeild ÍR sér um skipulagningu. Áhugasamir láti vita í athugasemdum hér að neðan eða sendi póst á huldkon@gmail.com Tökum einnig við ábendingum um starfsmenn sem mögulega hefðu áhuga á að taka þátt.


Frjálsíþróttamót fyrirtækja og stofnana 19. maí

Alucup er frjálsíþróttamót fyrir starfsmenn fyrirtækja og stofnana.
Það var fyrst haldið þann 1. apríl 2006 en þá tóku 29 lið þátt í mótinu.
241 keppandi var skráður til leiks; 57% þátttakenda voru karlar en 43% voru konur.
Í ár verður mótið haldið laugardaginn 19. maí.
Keppt verður í þríþraut utanhúss, 5km hjólreiðar, 3km hlaup og 200m sund.
Þrír skipa hvert þríþrautarlið, tveir karlar og ein kona eða tvær konur og einn karl.
Sameiginlegur árangur telur til stiga. Þríþrautin hefst kl. 11.
Hjólað og hlaupið verður um Laugardalinn og synt verður í samnefndri sundlaug!
Innanhúss verður keppt í karla og kvennaflokki í 60m, 200m, og 800m hlaupi, kúluvarpi og langstökki. Keppni innanhúss hefst kl. 12:30 í Laugardalshöll hinni nýrri!
Skyldugrein fyrir þátttöku er boðhlaup þar sem fimm (3+2 eða 2+3) skipa hverja sveit. Hver þátttakandi hleypur 60 metra sprett og afhendir næsta manni kefli!
Hvert fyrirtæki/stofnun ákveður hversu marga keppendur það sendir til leiks og ekki er gerð krafa um annað en þátttöku í boðhlaupinu. Það flýgur því hver eins og hann er fiðraður í þessu móti!
Hver keppandi má taka þátt í þremur greinum auk boðhlaupsins.
Veitt verða verðlaun fyrir fyrstu þrjú sætin í hverri einstaklingsgrein, þríþraut og boðhlaupi.
Það lið sem flest stig hlýtur samanlagt í karla og kvennaflokki telst sigurvegari.
(sjá úrslit á Alucup 2006 á www.fri.is mótaforrit, úrslit móta 2006, Alucup 2006)FrjF

"Þetta gekk svo sannarlega vel"

13. Icelandair hlaupinu lokið, sól, logn og almennt gott veður, fín umfjöllun í beinni útsendingu í Ísland í dag, 392 ánægðir og brosandi þátttakendur í mark, brautarmet hjá Kára Steini, almenn ánægja með trakteringar eftir hlaup, verðlaunaafhending til fyrirmyndar og síðast en ekki síst afburða starfsfólk, valinn maður í hverri stöðu sem sá til þess að dæmið gekk fullkomlega upp - við erum best í heimi.

Eða eins og kallinn í Kardimommubænum sagði þegar búið var að slökkva eldinn í turninum hjá Tobíasi - "Þetta gekk svo sannarlega vel".

Til hamingju allir með frábært hlaup,
Dagur, Formaður Skokkklúbbsins