Útsala hjá Afreksvörum

Auka afsláttur dagana 6-10 febrúar

Response hlaupajakkar og Wired peysur karla stærðir XXL og kvenna stærðir L-XL á sérstökum afslætti 55%

Spenci innlegg 200 kr

Endurskynsvörur 60% afsláttur

650ml drykkjarbelti 70% afsláttur

NewBalance skór 1221-1050-718-856-766 á aðeins 3.990 kr

Smartwool sokkar 50% afsláttur

Fuel Belt bakpokar aðeins 490 kr og 990 kr

sýnishorn karla stærð L og kvenna stærð M á allt að 50% afslætti.

Poweradehlaup

Það er Poweradehlaup næsta fimmtudagskvöld og því ekki æfing. Öll að mæta galvösk í hlaupið.

Gangi ykkur vel

Bjössi

Æfing 1. feb.

Sæl öll

Mér sýnist á vegargerðarkortinu að færð sé góðu lagi í Reykjavík. Við skulum því gera eftirfarandi:

Lengra komnir
10 mín upphitun
3-4x1 km (hægt að hlaupa á stígnum í Skerjafirðinum - km merkingar eiga að vera þar) með 2 mín skokki á milli.
5-10 mín niðurskokk

Byrjendur
10 mín upphitun
2x1 km með 1 km skokk/labb á milli
5-10 mín niðurskokk

Gangi ykkur vel

Bjössi

Æfing 25 janúar

Sæl öll

Ég held að þessi bloggþjálfun fari nú öll að smella saman. Við (þið) takið æfinguna sem er póstuð undir 18 janúar á morgun (eða í dag eftir því hvenær þið lesið þetta) 25 janúar. Ég mun reyna mitt besta til að halda æfingunum um 45 mín. Hins vegar er erfiðara fyrir mig að finna út úr með færð, þið verðið þá bara að aðlaga æfingarnar að aðstæðum.

Gangi ykkur vel

Bjössi

Hádegisæfing

Sex mættu á hádegisæfingu, Fjölnir, Bryndís, Guðni, Ingunn, Aðalsteinn og Dagur. Stígarnir nánast auðir og vorangan í lofti.

Æfing 18. janúar

Sæl öll

Eftir kommentið frá Degi þá mun ég reyna að miða við að æfingarnar séu 45 mínútur sem þið getið tekið í hádeginu og miðað er við að farið sé frá Hótel Loftleiðum. Reyndar verður erfiðara að ná magni inn þannig en við styttum upphitun og niðurskokk og reynum að ná alla vega 30 af þessum 45 mín sem "æfingu".

Í þessari viku verða brekkusprettir. Notast skal við malabrekku í Öskjuhlíðinni. Hún byrjar (sprettirnir byrja) af malbikuðum vegi við nokkra stóra steina (2-3) og fer beint upp þangað til eftir um 200 m að það er 90 gráða beygja til hægri og endar brekkan (sprettirnir) við nokkrra stóra steina við malbikaða veginn aftur. Hvíldin er að skokka niður eftir malbikaða veginum að steinunum þar sem sprettirnir byrja.

Lengra komnir
10 mín upphitun
Síðan skal taka brekkuspretti en fjöldinn ræðast af fyrri hlaupum og tíma (miðað er við að eyða um 30 mín í sprettina). Allir ættu að fara að lágmarki 5 spretti en ef einhverjum tekst að fara 10 á 30 mín þá er sá hinn sami í hörkuformi. þannig að hlaupa skal 5, 6, 7, 8, 9 eða 10 spretti og er hvíldin að skokka niður malbikaða veginn. Einnig er hægt að taka 2x3 spretti eða 2x4 spretti og þá er hvíldin á milli spretta að skokka niður malbikaða veginn en hvíldin á milli setta er að labba niður malbikaða veginn.
5 mín niðuskokk

Byrjendur
10 mín upphitun
3-5 brekkusprettir (eftir því hvað menn treysta sér til) upp að beygjunni (sikra 200 m) og hvíldin er að labba niður aftur.
5 mín niðurskokk

Reyndi að setja þessa æfingu inn í gær en síðan var eitthvað að stríða mér. Hvenær vikunnar viljið þið að ég pósti æfinguna?

Gangi ykkur vel.

Gamlárshlaup ÍR

Gamlárshlaup ÍR var haldið í góðviðri og ágætis aðstæðum á gamlársdag. Metþátttaka var í hlaupinu en 567 tóku þátt.
Eftirtaldir félagsmenn tóku þátt í þessu stórskemmtilega hlaupi.
28 39:21 Dagur Björn Egonsson
73 43:19 Huld Konráðsdóttir
102 44:44 Guðni Ingólfsson
182 48:02 Sigrún Birna Norðfjörð
248 51:07 Sveinbjörn Valgeir Egilsson
262 51:35 Anna Dís Sveinbjörnsdóttir

Hádegisæfing

Firnagóð mæting, Sveinbjörn, Bryndís, Aðalsteinn, Ingunn, Sigurgeir, Fjölnir, Guðni, Dagur. Hlaupið í pörum, mislangt eftir áhuga.

Fimmtudagsæfingin 11. janúar

Upphitun fyrir alla er að skokka niður að Ráðhúsinu við Reykjavíkurtjörn. Þeir sem eru byrjendur geta skokkað og gengið til skiptis.

Æfing lengra komnir
3-5 hringir í kringum Reykjavíkurtjörn (farið stysta mögulega hring, er um 1089 m) eftir aldri og fyrir þjálfun með 2 mín hvíld á milli.

Æfing byrjendur
2-3 hringir í kringum Reykjavíkurtjörn. Hlaupið um hálfan hring og skokkið svo afganginn. 2-3 mín hvíld á milli hringja.

Skokka aftur upp á Hótel Loftleiðir (Byrjendur geta skokkað og gengið til skiptis).

Endilega látið vita hverjir eru að taka þetta í kommentunum hér að neðan og hverngi gekk, hvort þetta sé of erfitt eða of létt.

Gangi ykkur vel.

Úrtökumót fyrir ASCA

Úrtökumótið verður haldið þann 15. febrúar næstkomandi, klukkan 17:30.

Hlaupinn verður hringur um Öskjuhlíðina eins og undanfarin ár. Konur hlaupa 2 hringi (u.þ.b. 4 km) og karlar 4 hringi (u.þ.b. 8 km) sem er nálægt vegalengdunum sem hlaupnar eru í ASCA keppninni. Tími verður mældur og eftir hlaup er boðið upp á orkudrykk og farið í heita pottinn í sundlauginni að Hótel Loftleiðum.

Allir eru hvattir til að taka þátt í keppninni sem hefur verið afar skemmtileg og spennandi í þau níu skipti sem hún hefur verið haldin. Úrslitin í úrtökumótinu ráða miklu um það hvernig lið okkar verður skipað þann 10. mars en þá verður keppnin haldin í Reykjavík. Alls er um 13 sæti að ræða, 8 karla og 5 konur. Ef einhverjir hafa áhuga á að vera í liðinu en komast alls ekki í úrtökumótið geta þeir haft samband við formanninn, dagur@icelandair.is, sími 5050-359.

Hádegisæfing

Guðni, Fjölnir, Sigurgeir og Dagur. Hlupum inní Fossvogsdal, 4k út og sama leið tilbaka. Á leiðinni, við brúnna yfir Kringlumýrarbrautina, bættist við fyrrverandi félagi í klúbbnum, Valdi sem nú starfar hjá JetEx. Valdi fór með okkur í ASCA til Róm (minnir mig). Valdi fór fullt maraþon í RM 2005 á 4:11:42.

Halldór Harðarson stefnir á 1/2 maraþon RM 2007

"Er búinn að fá mér kort í Laugar og þarf að gera mér (raunhæft) prógramm til að byrja frá byrjun - byrja á að skafa nokkur (reyndar ansi mörg) kg af til að hnén eyðileggist ekki...

- ég mun ekki bregðast"

Hádegisæfingar

Góð mæting í gær, Sigurgeir, Sveinbjörn, Bryndís og Dagur. Lagt af stað í rólegu tempói. Við Þjóðminjasafnið skildu leiðir og menn fóru ýmist Suðurgötuna, Hofsvallagötuna eða Kapplaskjólið.

Brekkusprettir í dag, Sveinbjörn, Guðni, Dagur. 6xstígurinn í skóginum (300m) á 65-80sec., rólega niður, síðasti hraðastur eins og vera ber.

Æfing fimmtudaginn 4 janúar

Sæl öll

Ég hef tekið að mér að vera með æfingar á blogginu fram að Flugleiðahlaupi. Ég biðst afsökunar á því hvað fyrsta æfingin kemur seint en ég "gleymdi" tímamismuninum. Auk þess tók mig aðeins tíma að fatta hvernig á að setja blogg inn á síðuna.

Ég kem til með að vera með tvær æfingar til að byrja með, eina fyrir byrjendur og aðra fyrir hina. Gaman væri að fá að vita í kommentunum hversu margir úr hvorum hópi mæta á æfingarnar og Ef engir byrjendur mæta þá mun ég fljótlega hætta að setja inn æfingar fyrir þá.

Byrjum frekar rólega eftir hátíðirnar

Byrjendur:
10 mín skokk/hlaup í upphitun
4x1 mín hraðar en 10 mín upphitunin með 1 mín labbi á milli
5-10 mín niðurskokk

Hinir:
20 mín skokk í upphitun
4-5x1 mín hratt með 1 mín skokk á milli. Eftir 4-5 spretti er skokkað í 3 mínútur og svo tekið annað sett af 4-5x1 mín hratt 1 mín á skokk á milli. Menn geta valið á milli þess að fara 4 mín eðað 5 mín (eða 4 mín öðru settinu og 5 mín í hinu) eftir aldri og fyrri störfum.
15 mín niðurskokk

Gangi ykkur vel

Bjössi

Gleðileg jól!

Átta félagar Skokkklúbbsins létu óveður ekki á sig fá og mættu á jólaæfinguna sl. fimmtudag. Létt skokk í Öskjuhlíðinni og síðan haldið á vit ævintýranna í kirkjugarðinum. Hlaupinn hringur sem stundum hefur verið farinn á æfingum. Hratt upp brekku og rólegt á milli og þetta endurtekið nokkrum sinnum. Rólegt skokk í Öskjuhlíðinni á eftir. Það kom í ljós að veður var með allra besta móti í Öskjuhlíðinni og í kirkjugarðinum. Á eftir var spjallað yfir góðum veigum.

Minni á Gamlárshlaup ÍR á gamlársdag, 10 km hlaup sem gaman er að enda árið á. Nánari upplýsingar á Hlaupasíðunni.

Stjórn Skokkklúbbsins óskar félögum sínum öllum gleðilegra jóla og farsæls komandi árs og vonar að næsta ár verði þeim gott hlaupaár.

Jólaæfing 21. desember kl.17:15

Jólaæfing Skokkklúbbs Icelandair verður haldin fimmtudaginn 21. desember kl.17:15. Hist verður við Hótel Loftleiðir (búningsaðstaða við sundlaugina) og hlaupinn stuttur hringur við allra hæfi. Á eftir verður slakað á í heita pottinum í sundlauginni og síðan býður Skokkklúbburinn félögum upp á hressingu.

Stjórnarfundur 5. desember 2006

Mættir: Dagur, Anna Dís, Huld

Stjórnin skipti með sér verkum, Dagur formaður, Guðni framkvæmdastjóri ASCA og Icelandair hlaups, Anna Dís gjaldkeri og Huld ritari.

Félagsgjöld fyrir 2006 hafa ekki verið innheimt, ákveðið var að sleppa því, en jafnframt að innheimta félagsgjöld 2007 strax í janúar.

Dagur tekur að sér að koma félagaskrá á meðfærilegra form og uppfæra eftir bestu vitund. Jafnframt þarf að yfirfara póstlista í Lotus Notes.

Jólaæfingin verður 21. desember kl. 17:15 frá HLL.

Huld sendir út tilkynningu varðandi jólaæfinguna í vikunni fyrir ásamt því að benda á bloggsíðu klúbbsins, en áherslan í samskiptum við félagsmenn verður framvegis í gegnum bloggsíðuna og mun mikilvægi fréttabréfsins þannig minnka. Ekki gert ráð fyrir að fréttabréf verði sent út nema mikið liggi við og þá alltaf bent á bloggið varðandi frekari upplýsingar.

Æfingar í vetur, Dagur talar við Dr. Sigurbjörn að vera okkur innanhandar varðandi þjálfun í vetur. Þar sem hann er búsettur erlendis yrði um bloggþjálfun að ræða.

Lög og markmið Icelandair Athletics Club

Lög og markmið klúbbsins tóku nokkrum breytingum á síðasta aðalfundi. Veigamesta breytingin var varðandi tilgang og markmið klúbbsins. Reynt verður að höfða til breiðari hóps en áður og er ætlunin að auka fjölbreytnina í starfsemi klúbbsins. Ný lög klúbbsins eru eftirfarandi:

Lög og markmið Icelandair Athletics Club

Tilgangur
Tilgangur klúbbsins er að vera vettvangur fyrir þá félaga í STAFF sem hafa ánægju af allri hreyfingu til heilsubótar.

Markmið
Markmið klúbbsins er að veita félagsmönnum sínum fjölbreytt tækifæri og félagsskap til að stunda hreyfingu.

Lög félagsins
1. Klúbburinn heitir Icelandair Athletics Club, starfar undir merkjum STAFF og er opinn öllum félagsmönnum STAFF.
2. Aðalfundur kýs stjórn klúbbsins til eins árs í senn. Í stjórn sitja fjórir félagsmenn. Stjórnin skiptir með sér verkum og skipar formann.
3. Félagsmenn greiða árgjald til að standa undir rekstrarkostnaði klúbbsins. Stjórnin ákveður árgjald hverju sinni.
4. Klúbburinn stendur fyrir skipulögðum æfingum af einhverju tagi.
5. Klúbburinn stendur fyrir almenningshlaupi fyrsta fimmtudag í maí. Stjórn klúbbsins er heimilt að færa þessa dagsetningu til um allt að 14 daga þegar sérstaklega stendur á.
6. Klúbburinn skipuleggur þátttöku í ASCA keppnum ár hvert í samræmi við áhuga félagsmanna.
7. Klúbburinn býður félagsmönnum í Reykjavíkurmaraþonið ár hvert, bjóði sjóðsstaðan upp á það. Félagar hlaupa í nafni Icelandair.
8. Starfsári klúbbsins lýkur með lokahófi sem haldið er í október eða nóvember ár hvert. Lokahófið er jafnframt aðalfundur klúbbsins.
9. Tilgangur félagsins, markmið og lög þess skulu borin upp á aðalfundi félagsins til samþykktar, með eða án breytinga.

Skýrsla stjórnar Icelandair Athletics Club starfsárið 2005-2006

Inngangur
Síðasta starfsár Skokkklúbbsins var viðburðaríkt að mörgu leiti og ætla ég að nefna nokkuð af því sem hæst bar. Á síðasta aðalfundi var kosin ný stjórn eins og vera ber og skiptin hún með sér verkum:
Dagur - Formaður - halda utan um starfsemina, samskipti við þjálfara, boða til stjórnarfunda, umsjón og þrif keppnisbúninga (mikilvægt)
Mímir - Ritari - samskipti við félagsmenn (m.a. útgáfa fréttabréfs eftir þörfum)
Ívar - Gjaldkeri - passa budduna
Guðni - Meðstjórnandi - framkvæmdastjóri Flugleiða hlaupsins
Ívar S. Kristinsson hætti fljótlega stöfum hjá Icelandair og hélt því Jón Mímir áfram því göfuga starfi að halda utanum budduna, Guðni tók við ritarastarfinu. Skráðir félagsmenn eru nú um 60.

Helstu viðburðir
Úrtökumót fyrir ASCA
Sjö félagsmenn mættu í úrtökumót fyrir ASCA sem haldið var þann 2. febrúar.
Þetta er í níunda sinn sem þessi háttur er hafður á til að velja í lið. Hlaupið tókst afar vel þrátt fyrir mikið vatnsveður og talsvert myrkur. Hlaupnir voru 1,5km hringir í Öskjuhlíðinni, karlar 5 hringi (7,5km) og konur 3 hringi (4,5km). Allir þátttakendur voru valdir til þátttöku í ASCA þetta árið.

ASCA - Víðavangshlaup 2006 í London
Víðavangshlaup ASCA fór fram í boði British Airways í útjaðri London laugardaginn 11. mars. Brautin var fjölbreytt, bæði hlaupið á grasi og stígum ásamt því sem nokkrar hæðir urðu á vegi hlaupara. Hitinn var í kringum 5 gráður og hálfskýjað. Í kvennaflokki voru hlaupnir 4,8 km. og 9,6 km. í karlaflokki. Sex lið mættu til leiks í kvennaflokki og varð sveit Icelandair í þriðja sæti, hársbreidd á eftir BA og SAS. Karlaliðið gerði betur en áður og náði 5. sætinu af 7. Næst er röðin komin að okkur, og mun Skokkklúbburinn taka að sér að halda hlaupið 2007.

Icelandair hlaupið
Hlaupið tókst mjög vel í alla staði þó að rignt hafi í fyrsta skipti í 12 ára sögu hlaupsins. Alls luku 328 hlauparar keppni. Stjórnin vill þakka öllum sem lögðu hönd á plóginn fyrir framlag sitt til að gera þetta hlaup eitt af þeim fjölmennustu og bestu hlaupum sumarsins.
Fyrstur í mark, annað árið í röð, var Kári Steinn Karlsson á nýju brautarmeti 21:46. Fyrst kvenna var fyrrverandi félagsmaður í Skokkklúbbnum Gerður Rún Guðlaugsdóttir á 28:27.
Daginn eftir Icelandair hlaupið var hlaupið “The Day After Run” þar sem nokkrir af þeim sem störfuðu við hlaupið daginn áður fóru sömu leið og í aðalhlaupinu. Þetta er siður sem nú hefur verið í mörg ár.

Þjálfari og æfingar
Stefán Már Ágústsson og Sigurbjörn Árni Arngrímsson voru með í undirbúningi fyrir ASCA. Eftir ASCA var þátttaka á æfingum það lítil að ákveðið var að hætta skipulögðum æfingum. Verður það eitt af verkum nýrrar stjórnar að taka ákvörðun um fyrirkomulag og framhald þeirra.

Fréttabréf
Útgáfa fréttabréfsins hefur verið stopul seinni hluta starfsársins, en það hefur verið gefið út þegar þurfa þykir. Á síðasta starfsári komu út 5 fréttabréf.

Gallar
Á síðasta starfsári var keyptur merktur hlaupafatnaður á félagsmenn. Fyrir valinu varð fatnaður af tegundinni Sugoi og var honum vel tekið.

Spjallvefur
Opnaður var spjallvefur á http://fiskokk.blogspot.com/ til upplýsingamiðlunar og samskipta kringum æfingar.

Frjálsíþróttamót fyrirtækja og stofnana
Þann 1. apríl var haldið ÍR frjálsíþróttamót í Laugardalshöllinni fyrir starfsmenn fyrirtækja og stofnana. Skokkklúbburinn var ekki meðal þátttakenda en vert er að skoða þetta á nýju ári enda er skipuleggjendur ráð fyrir að framhald verði á.

Þátttaka í hlaupum
Þátttaka félagsmanna í hlaupum á sl. starfsári var ágæt. Meðal annars frábær þátttaka var í þrítugasta Gamlárshlaup ÍR en þar voru m.a. 8 félagsmenn.

Powerade Vetrarhlaup
Í heildarstigakeppni vetrarins urðu Huld í 3. sæti og Anna Dís í 18. sæti. Í aldursflokkakeppninni urðu Huld í 1. sæti með 60 stig (fullt hús), Guðni er í 4. sæti, Anna Dís í 8. sæti, Sveinbjörn í 12. sæti og Anna María í 12. sæti með 8 stig.

Öldungameistaramót innanhúss
Þrír Öldungameistaratitlar skiluðu sér í hús.
Sveinbjörn Egilsson varð fyrstur í 400m, 50-55 ára á 61,58.
Huld Konráðsdóttir varð fyrst í 3000m, 40-45 ára á 11:43,83
Dagur Egonsson varð fyrstur í 3000m, 40-45 ára á 10:36,04
Önnur úrslit félagsmanna voru sem hér segir:
Dagur Egonsson varð 2. í 800m, 40-45 ára á 2:24,69
Sveinbjörn Egilsson varð 3. í 800m, 50-55 ára á 2:49,72
Guðni Ingólfsson varð 4. í 3000m, 35-39 ára á 11:31,28

Öldungameistaramót utanhúss
Í flokki 40-49 ára sigraði Dagur Egonsson á 40:15 og Sveinbjörn Egilsson í flokki 50-59 ára á 48:22.

Hamborgarmaraþon
Huld Konráðsdóttir bætti sig í heilu maraþoni í Hamborg er hún hljóp á 3:13:14. Aðeins 4 félagsmenn hlaupið maraþon hraðar og þar af aðeins einn á þessari öld.

Two oceans Marathon
Bryndís Magnúsdóttir hljóp hálfamaraþon í Suður Afríku.

Running Times
Síðastliðinn vetur kom á eina hádegisæfinguna Candace Karu sem er einn af ritstjórum Running Times, en Running Times er eitt útbreiddasta hlaupatímarit í veröldinni. Fór vel á með okkur (Guðni, Sveinbjörn, Dagur) og tókum við hana með okkur Hofsvallagötuhringinn og skiluðum henni inná hótel í miðbænum. Eigum við heimboð hjá henni í Main í Bandaríkjunum.

Reykjavíkurmaraþon
Skokkklúbburinn átti frumkvæði að því að Icelandair hét á starfsmenn að hlaupa Reykjavíkurmaraþon. 89 hlupu, 1.043 km og söfnuðust 3.129.000,- til Vildarbarna.

Boot Camp
Í haust var boðið uppá sex Boot Camp æfingar frá aðalskrifstofu þátttakendum að kostnaðarlausu og mæltist það vel fyrir þótt þátttakan hafi verið léleg á síðustu tveimur æfingunum. Flest mættu 25.

Æfingar falla niður

Í ljósi slælegrar mætingar félagsmanna á æfingum síðustu vikur/mánuði höfum við ákveðið að leggja þær niður að svo stöddu. Ákvörðun þessi verður endurskoðuð við hentugleika.

Félagsmenn geta eftir sem áður fengið persónulega ráðgjöf hjá þjálfurunum og eru netföng þeirra agustsson@gmail.com og sarngrim@khi.is

Kveðja,
Dagur Egonsson
Formaður Skokkklúbbs Icelandair