Fimmtudagur 27. feb - Tempó

Mættir í tempóæfingu í dag voru forsetinn, Dagur og Oddgeir.  Þórdís lagði af stað á undan.  Tempóæfingin var 20 mín. upphitun, 3 x 5 mín. sprettir með 1 mín. rólegu skokki á milli, og svo 20 mín. niðurskokk.  Endaði í 10 km.

Fréttst hefur að kargódrengirnir hyggist taka lokaða séræfingu eftir vinnu í dag þar sem hraðinn á þessari æfingu var helst til mikill fyrir þá.

Mánudagur 17. feb - Tú tæms túdei

Það var verulega fátt um fína drætti í mætingunni í dag.  Undirritaður mætti galvaskur í þeirri von að þar biðu spegilegir karlar og konur, æst í að hlaupa í góða veðrinu.  Svo reyndist ekki vera.  Undirritaður hélt því áfram með fyrstu löngu æfinguna sína í undirbúningi fyrir Lifrarpollsmaraþonið í vor.

Alls tú tæms.

Föstudagur 14. feb - Reiv í tólin

Óli og Oddgeir sáu um að fylgja Ingu Cargó um miðbæ Reykjavíkur í hádegishlaupinu.  Komið við á Sónar-hátíðinni í Hörpu og smá "reiv" tekið með tilheyrandi hliðarskrikkjum.  Planki á plani í lokin.

Alls 8 km.

Þriðjudagur 11. feb - Brekkusprettirnir að hefjast

Sjö fagrir skjónar mættu í dag til sprettæfinga í kirkjugarðinum: Þórólfur, Jói yngri, Sigurgeir CK, Úle, Ívar, Dagur og Oddgeir.

Fyrsti í brekkusprettum fyrir komandi maraþon í vor, alls 6 stk, þó með mismunandi útfærslum og stíl.

Tæplega 9 km hjá flestum.

Mánudagur 10. feb - Hvar eru allir???

Það var einungis einn hlaupari sem treysti sér út í veðrið í dag, ritari stjórnar.

Langur flugvallarhringur, 10 km.

Föstudagur 7. feb - Hjónakorn, kóngur og drottning

Í dag mættu hjónakornin Sigrún og Oddgeir ásamt konungi og drottningu Cargósins, þeim Fjölni og Ingu.

Bæjarrúntur í blíðu veðri.  Ýmislegt skrafað.

Rúmlega 8 km.

Úrslit ASCA úrtökumótsins

ASCA úrtökumótið fór fram við kjöraðstæður seinnipartinn í dag.  Margt var um gæðahlaupara.  Þarna sást meðal annars til Ólympíufara, svo eitthvað sé nefnt.

Alls mættu 8 keppendur til leiks, 6 karlar og 2 konur, auk þriðja kvenkyns keppandans sem tókst ekki að nálgast hlaupabúnað sinn í höfuðstöðvunum í tæka tíð þar sem einhver óprúttinn aðili hafði læst hann inni í þar til gerðu herbergi/geymslu.

2 km upphitun var frá höfuðstöðvum að rásmarki.  Ræst við Þyrluþjónustuna og hlaupið að mótum Ægisíðu og Hofsvallagötu.  Þar var snúið við og sama leið hlaupin til baka.  Þetta dugði konunum en karlarnir urðu síðan að snúa við hjá Þyrluþjónustunni og hlaupa að Dælustöðinni og til baka.  5,7 km hjá konum og 6,8 km hjá körlum.

Tímavarsla og dómgæsla var í öruggum og fumlausum höndum Sveinbjörns og kunnum við honum bestu þakkir fyrir.  Úrslitin fara hér að neðan ásamt mynd af hópnum áður en lagt var af stað frá höfuðstöðvunum:

Konur - 5,7 km:     
Björg            25:45
Gísla             29:48

Karlar - 6,8 km:     
Kári Steinn   22:14
Viktor           26:50
Oddgeir        26:54
Brynjólfur     28:00
Ívar               29:26
Óli                29:38




Oddgeir, Kári Steinn, Ívar, Óli, Gísla, Björg, Viktor og Brynjólfur (Mynd: Anna Dís)

 

Minnum á ASCA úrtökumótið - Skemmtileg ferð til London í boði

Minnum á ASCA úrtökumótið - Skemmtileg ferð til London í boði.  Sjá nánar í tölvupósti sem félagsmenn fengu sendann í dag, miðvikudag.

Æ læk it.  Æ læk it a loh.

Miðvikudagur 5. feb - Aðstæður kannaðar að nýju

Ágæt mæting í dag.  Ársæll var undanfari.  Á eftir honum komu Huld, Dagur, Fjölnir, Úle og Oddgeir.  Rangsælis flugvallahringur um Hofsvallagötu.

Hlaupastígarnir við sjóinn líta mun betur út í dag en í gær og ekkert því til fyrirstöðu að halda úrtökumótið á morgun.

Rúmlega 8 km.

Þriðjudagur 4. feb - Aðstæður kannaðar

Fjölnir og Oddgeir mættu í dag til að kanna brautaraðstæður fyrir komandi úrtökumót nk. fimmtudag.  Ívar og Þórólfur fóru fyrr og á guðs vegum.

Öskjuhlíðaskógur er át (out) og hlaupastígarnir við sjóinn líta svona og svona út.  Vonandi ná hlýjindi og væta næstu tvo daga að laga ástand hlaupastíganna enn frekar.

Alls 9 km.

Hálka...

Mættir: Sigurgeir, Ívar, Óli og Inga.

Fórum í Fossvoginn í frekar leiðinlegri færð, hálku!

Ræddum aðeins mætingu síðustu vikur og þá kom í ljóst að Inga er búin að mæta í nokkur skipti en þá er bara aldrei bloggað...einmitt!

Á morgun verður gæðaæfing fyrir þá sem hafa gaman af því...

Kv. Sigurgeir

Föstudagur 31. jan - Að sinna erindum í bæjarrúnti

Félagarnir Ívar, Dagur og Oddgeir sáu um hlaupin í dag á meðan Sveinbjörn og Jói sáu um aðra hreyfingu.

Einn hlauparanna átti brýnt erindi í Tryggingastofnun og var því ákveðið að stilla bæjarrúntinn af í samræmi við það.  Þar komu menn hins vegar að lokuðum dyrum rétt fyrir hálf eitt.  Í ljós kom að afgreiðslan er opin á föstudögum frá 10 til hvorki meira né minna en 12.  Þeim er átti erindið tókst hins vegar að ljúka sér af þar sem hægt var að koma bréfi því er hann hafði meðferðis í þar til gerða lúgu.  Við það hélt hópurinn sína leið, glaður í bragði.

Bæjarrúnturinn endaði síðan í tæplega 8 km.

Fimmtudagur 30. jan - Góðverk dagsins

Mætt í dag voru Úle, Dagur, Oddgeir og Síamssystur.  Cargobræður komust ekki þar sem þeir eru enn að jafna sig eftir átök þriðjudagsæfingarinnar (að sögn kunnugra).

Rangsælis hringur um flugvöllinn.  Á horni Hofsvallagötu og Hringbrautar skildu leiðir.  Síams fóru Hofsvallagötu en drengirnir héldu áfram, annars vegar niður Kaplaskjólsveg og hins vegar niður Meistaravelli.  Það runnu tvær grímur á Dag (setti upp kindarlegan svip) þarna á horninu þegar hann áttaði sig á því að hann ætti að fara tempó með drengjunum en ekki rólegt með stelpunum.  "Ég hafði hugsað mér að fara með stelpunum" sagði hann þá.

Drengirnir náðu Síams rétt eftir Dælustöðina.  Verður ekki látið upp hér hvað þær voru að gera þegar þeir komu að þeim!

Dagur hafði enn tíma til að vinna góðverk og það tókst.  Fyrrum ráðherra var á hlaupum við Þyrluþjónustuna.  Degi fannst hann fara fullt hægt yfir og linnti ekki látum fyrr en honum hafði tekist að fá hann til að auka hraðann og halda honum að Kafara.  Að vísu var fyrrum ráðherra þá kominn í mikla andnauð, en Degi var alveg sama.  Hann hafði náð sínu fram og var bara býsna ánægður með þetta allt saman.

Alls 8-9 km.

Föstudagur 24. jan - Bannað að skilja eftir

Síamssystur heiðruðu samkomuna í dag ásamt Úle og Oddgeiri.

Fóru bæjarrúnt, enda föstudagur.  Síamssystur kvörtuðu sáran undan því að vera skildar eftir á hlaupum.  Það má ekki gerast og hlýddu Úle og Oddgeir skilyrðistlaust, enda þægir drengir.

Rúmlega 7 km

Fimmtudagur 22. jan - Fimm á tempói

Gæðaæfing í dag með þeim Þórólfi, Degi, Ívari, Úle og Oddgeiri.

Flugvallarhringur um Kaplaskjól (hjá sumum) og Meistaravelli (hjá hinum) með sambærilegum sprettköflum og verið hafa á boðstólum upp á síðkastið.

Alls frá 10,5 km til 11,0 km.

Miðvikudagur 22. jan - Tveir spaðar

Tveir spaðar hlupu í dag, Dagur og Oddgeir.  Hlupu stuttan flugvallarhring, um Suðurgötu, kátir og sprækir.

Alls 7 km + planki.

Jói var svo sjóðheitur á kantinum.

Þriðjudagur 21. jan - Æfing til heiðurs Alice Cooper

Þessi mættu í dag: Þórólfur, Fjölnismaður, Dagur, Ívar, Oddgeir og Katrín Edda.

Katrín Edda snéri á strákana og fór snemma af stað, var að ljúka sinni æfingu þegar þeir voru að gera sig klára.  Strákarnir vissu að í dag væri þriðjudagur og að á þriðjudögum er ætlast til þess að menn hafi einhver gæði í æfingunum.  Dagur var alveg með á hreinu hvað yrði á dagskránni; Cooper-testið!  Það felur í sér 12 mínútna "all in" sprett sem síðan er endurtekinn að einhverjum tíma liðnum og framfarir (eða afturfarir) þannig mældar.  Hefðbundinn rangsælis hringur um flugvöllinn um Hofsvallagötu.  Cooper-testið hófst svo á mótum Hofsvallagötu og Ægisíðu og lauk meira og minna hjá mönnum við Þyrluþjónustuna, sem er vestan við braut 01.  Verður að segjast eins og er að menn voru bara býsna sprækir!

Til stendur að halda Cooper-testið mánaðarlega fram á vor til að mæla árangur manna og kvenna, m.a. þeirra sem ætla sér í maraþon á næstunni.

Alls rúmlega 8 km.

Mánudagur 20. jan - 5+1

Ágæt mæting í dag, 5+1: Dagur, 1/2 Cargo kóngur, Úle, Ívar, Oddgeir og Huld.

Mismikill metnaður í dag, sumir fóru langt, aðrir styttra, sem er bara í fínu lagi.  Sumir hlutu drjúgan spöl um helgina.

Þeir sem lengst fóru náðu góðum 9 km.

Föstudagur 17. jan - Vörutalning og árshlutauppgjör

Bæjarrúntur, þar sem Síamssystur, önnur Cargo systra, forsetinn og Oddgeir mættu.

Frábært veður, hlýtt og rjómalogn.  Það varð tilefni til bölsýni af hálfu Cargo systur, sem óttast að okkur verði refsað í sumar með leiðinlegru veðri vegna þess góða veðurs er nú ríkir.

Í höfuðstað tóku hin Cargo systirin og JB Run á móti hópnum.  Vambirnar voru vel útkýldar og þeir í óðaönn að stanga úr tönnunum.  Er gengið var á þá af hverju þeir kysu frekar óhollustu í stað hreyfingar brugðu þeir fyrir sig bókhaldstungumáli, að þeirra hefði verið þörf í mötuneytinu vegna vörutalningar á frönsku kartöflunum og árshlutauppgjöri þar að lútandi.

Alls 8,5 km.

Fimmtudagur 16. jan - Gæði, gæði, hraði

Orðið yfir æfingu dagsins er gæði, a.m.k. fyrir suma.  Til æfingar mættu Þórólfur, Dagur og Oddgeir.  Sami hringur og á þriðjudaginn, með sömu sprettútúrdúrunum, en á miklu meiri hraða.

Alls 10 km.