Fundargerðir stjórnar tímabilið 2013-2014

Stjórnarfundur FI-Skokk (1. fundur tímabilsins 2013-2014)

 

 

18. desember 2013, kl. 1030 á skrifstofu Icelandair

Mættir: Ólafur, Ívar og Oddgeir.

1. fundur stjórnar tímabilið 2013-2014.  Fundargerð síðasta fundar samþykkt.  Eftirfarandi mál voru á dagskrá þessa fundar:

- Verkaskipting stjórnar

- Árgjald félagsmanna

- Framkvæmdaáætlun 2013-2014

- Aðventuhlaupið

- Uppfærsla félagatals

- Mætingahlekkur á bloggsíðuna

 

Verkaskipting stjórnar:

Ólafur formaður (forseti), Ívar gjaldkeri og Oddgeir ritari.

 

Árgjald félagsmanna:

Árgjald ákveðið óbreytt.

 

Framkvæmdaáætlun 2013-2014:

- Aðventuhlaup.  Verður haldið fimmtudaginn 19. desember, kl. 1708.

- ASCA – Dagsetning komin, 22. mars 2014.  Verður haldið í London.  Stjórnin stefnir að því að halda úrtökumót.  Stífari viðmið en áður varðandi þátttöku.  Lágmark 7 karlar og 4 konur þurfa að mæta í úrtökumót svo farið verði.  Náist ekki í annaðhvort liðið útlokar það þó ekki hitt liðið frá því að fara.  Úrtökumót fari fram fyrri hluta febrúar.

- Icelandairhlaupið – Annan fimmtudag í maí, 8. maí 2014, að öllu óbreyttu.

- Styrkveiting til félagsmanna vegna almenningshlaupa – Áfram stefnt að styrkveitingu.  Verður ákveðið síðar með hvaða formi það verður.

- Aðalfundur – Næsti aðalfundur verði haldinn í október eða nóvember 2013.  Stefnt skal að því að fundurinn verði frekar haldinn í október.

Að auki verður það áhersluatriði stjórnar að auka nýliðun í hópnum og efla ástundun þeirra félagsmanna sem fyrir eru.

Aðventuhlaupið:

Aðventuhlaupið fer fram fimmtudaginn 19. desember kl. 1708.  Stefnt að gufu, heitum potti og hressingu að hlaupi loknu.

 

Uppfærsla félagatals:

Gjaldkeri og ritari munu fara yfir félagatalið og uppfæra eins og þurfa þykir.

 

Mætingarhlekkur á bloggsíðuna

Stjórnin hyggst kanna það hvort æskilegt sé að koma upp einhverskonar tilkynningar/mætingarhlekk á bloggsíðuna.  Þannig munu þeir sem hyggjast mæta í hádeginu tilkynna mætingu sína á síðunni.

 

Næsti fundur áætlaður um miðjan janúar á nýju ári.

Fundi slitið kl. 1145.

 

 

-----------------------------------------------------------------------------------------------

Þriðjudagur 17. des - Parahlaup

Alls mættu 6 í dag.  Flugvallarhringur um Hofsvallagötu. Færi þungt á köflum.

Hlaupið æxlaðist þannig að það var að mestu hlaupið í pörum.  Sigurgeir CK hljóp með Oddgeiri, Fjölnir CK hljóp með Ívari og síamssystur hlupu sama.  Aldrei var mikið meira en 100-200 metrar á milli para.

Tæplega 9 km.

Við minnum á aðventuhlaupið á fimmtudagin.  Hlaup, sauna, heitur pottur og drykkur!  Er hægt að biðja um meira í aðdraganda jóla?

Mánudagur 16. Des

Mættir: Dagur og Sigurgeir

Fórum Hofs á þægilegu tempói. Rómantíkin var allsráðandi í dag enda ekki annað hægt í svona björtu og fallegu jólaveðri.

Við auglýsum eftir fleiri hlaupurum og lofum að taka vel á móti öllum sem mæta.

Kv. Sigurgeir

Fimmtudagur 12. Des

Mættir: Dagur og Sigurgeir

Tókum Hofs á þægilegu tempó.

Kv. Sigurgeir

Miðvikudagur 11. des - Vetrarfæri

Dagur, CKs og Oddgeir mættu í hádeginu.

Vetrarfæri en fínt hlaupaveður.  Annar CK fann allar afsakanir sem hægt var að týna til svo hann gæti farið stutt, um Suðurgötu.  Dagur, Fjölnir og Oddgeir fylgdu honum og lengdu síðan í og við Öskjuhlíð.

Vegalengdir frá 7 km til 9.5 km.

Minnum á Powerade vetrarhlaupið á morgun, fimmtudag.

Mánudagur 9. des - Spólvörn óskast

Já, það veitti ekki af spólvörn á fótabúnaðinn í dag er galvaskir drengir héldu til hlaupa í hálkunni.  Fyrst fór Sæli, alsæll með að hafa verið treyst fyrir því að slökkva ljósin og loka hurðunum á Listasafninu aðfaranótt laugardagsins, svo gaman var hjá honum á bollunni.  Því næst fóru þeir bakkabræður Dagur og Oddgeir, ásamt Jóa sem var í göngugír.  Lang síðast fóru síðan Ívar og Fjölnir, en þeir tóku upp á þeirri skemmtilegu nýbreytni að taka fyrst "lunch á þetta" áður en þeir fóru að hlaupa.

Vegalengdir frá 6 km til 9 km.

Planki að hætti atvinnumanna var tekinn í lokin og sá enginn annar en JB Run um að allt færi eftir settum reglum.

Fimmtudagur 5. des - Menn eru misjafnlega ferskir

Oddgeir virðist hafa verið sá eini sem mætti í dag.  Þarf ekki vikuhvíld á milli æfinga eins og CK dívurnar.

Veðurblíða en nokkuð kalt.  9 km og planki.

Þriðjudagur 3. des - Þrír ííískaldir

Þremenningarnir Sigurgeir, Fjölnir og Oddgeir létu ekki smá éljagang og kulda stoppa sig í dag.  Hlaup í og við Öskjuhlíð, með planka í lokin. Rúmlega 7 km hjá strákunum.

Þeir mæta sem þora...

Mættir: Inga, Dagur og Sigurgeir

Það er föstudagur og þá vita allir hvað var í boði! Ef ekki þá er komin tími á að þú mætir á æfingar...

Kv. Sigurgeir

Fimmtudagur 28. nóv - Þrjú á palli

Já, Þrjú á palli mættu í dag við góðar undirtektir.  Flugvallarhringur þar sem Dagur og Oddgeir vildu ólmir ná 10 km og það á góðu tempói.  Huld var líka í stuði og bauðst til að vera hérinn.  Óli stjórnarmaður kom síðan askvaðandi úr gagnstæðri átt á móti hópnum við Skerjafjörðinn.  Ekki sást meira til hans eftir það.

Planki tekinn í lokin, sem Huld rústaði.

Þriðjudagur 26. nóv - "...ef ég nenni..."

Sá er þetta ritar er sá eini, að því er virðist, sem sá ástæðu til að mæta í hádeginu í dag.  Tempóhlaup í skóginum við kjöraðstæður, alls 8 km.

Sigrún síams kom svo í lokin og tók plankann með þeim er þetta ritar.

Mánudagur 25. nóv - Tíminn er afstæður

Tímaskyn hlaupara var með lakara móti í dag.  Huld og Oddgeir voru þau einu sem tókst að fara á réttum tíma.  Aðrir fóru of snemma, sumir allt of snemma, þ.á.m. Sigurgeir og nýðliði af nafni Fjölnir (þetta nafn hljómar þó kunnulega), Ívar, formannsefnið Óli og Þórdís nýrri.

Flestir hlupu ca. 7-8 km að talið er.

Föstudagur 22. nóv - Komdu sæll Jónas!

Mætt í dag: Sigrún og Huld (síamssystur), Sigurgeir, Oddgeir og Sæli (sem fór á undan og sást ekki meir).

Bæjarrúntur.  Við Klambratún birtist Dagur skyndilega úr ormagöngum og bættist í hópinn.  Tíðindalaust uns menn nálguðust Hljómskálagarðinn.  Þá kom "Jónas" yfir karlpeninginn, þ.e. löngun til að spretta hringinn við Hljómskálagarð sem endar við styttuna á Jónasi Hallgrímssyni.  Kvenfólkið horfði á aðfarirnar.  Létt skokk að höfuðstöðvum að "Jónasi" loknum.  Rúmlega 8 km.  Plankinn tekinn í lokinn.  Huld reyndist öflugust að þessu sinni.

Aðalfundur og árshátíð skokkklúbbsins - Uppgjör

Hér að neðan fer fram uppgjör á aðalfundi og árshátíð skokkklúbbsins, haldin laugardaginn 9. nóvember. Lögmenn skokkklúbbsins hafa lúslesið textann og telja litlar líkur á meiðyrðamálum í kjölfar birtingar. Er það ein aðalástæða þess að birting uppgjörsins hefur tafist.

Aðalfundurinn

Það er óhætt að segja að nokkurrar hrútalyktar hafi gætt í Þingsal 9 þegar aðalfundur Skokkklúbbs Icelandair fór fram sl. laugardag.  Aðalfundarstörf hófust um klukkan 1230. Alls mættu 7 manns, allt hrútar, á fundinn og taldist hann því löglegur.  Gerð var tillaga um að Ársæll yrði skipaður fundarstjóri og var það samþykkt einróma.  Að því loknu hófust hefðbundin aðalfundarstörf og brá ritari stjórnar sér um stundarsakir í líki fráfarandi formanns er hann flutti skýrslu formanns.  Að því loknu fór gjaldkeri stjórnar yfir ársreikninginn.  Fjárhagsstaða klúbbsins telst vel viðunandi um þessar mundir, enda mikillar ráðdeildar og útstjórnarsemi gætt í hvívetna.  Næsta mál á dagskrá var kjör stjórnar.  Tveir af þremur stjórnarmönnum buðu sig fram til áframhaldandi starfa.  Því var ljóst að kjósa þyrfti um einn nýjan stjórnarmann.  Að lokum fór svo að Óli var kjörinn í stjórn skokkklúbbsins.

Þá var komið að lagabreytingum.  Gjaldkeri stjórnar hugðist leggja fram róttækar lagabreytingar.  Eftir töluverða umræðu, m.a. um núverandi lög klúbbsins, sem að margra mati eru ófullnægjandi, féllst hann á að draga breytingatillögu sína til baka.  Það gerði hann í trausti þess að ný stjórn fari í gagngera endurskoðun á núverandi lögum klúbbsins með það að markmiði að gera þau hnitmiðaðri, en á sama tíma einfaldari, en nú er.  Þá gerði einn fundarmanna sig líklegan til þess að bera fram enn róttækari tillögu en gjaldkerinn.  Við nánari athugun kom í ljós að sú tillaga var ekki talin fullnægja lágmarkskröfu um framsetningu lagabreytinga og taldi fundarstjóri því eðlilegra að hún ætti heima undir liðnum önnur mál.  Féllst viðkomandi fundarmaður á þá röksemdafærslu.

Undir liðnum önnur mál var ýmislegt rætt en þó var þungamiðjan í umræðunni tilgangur og markmið skokkklúbbsins og vissar áhyggjur af lítilli nýliðun.

Aðalfundi lauk um klukkan 1415.

Árshátíðin

Það var tuttugu manna hópur sem mætti á árshátíðina um kvöldið.  Fór hún fram í sal STAFF í Síðumúla.  Gerðu menn sér þar glatt kvöld, brögðuðu á góðum mat, drukku mjöð og hlýddu á félagsmenn segja frá afrekum á árinu sem er að líða.  Þá voru dansatriðin af dýrari gerðinni.  T.d. sáust ítrekuð skrens eftir dansgólfinu undir taktfastri tónlist Billy Idols og skrykkdans/snúningar á bakinu (með tilheyrandi svima og árekstrum á innréttingar staðarins þegar dansarinn stóð upp).  Þá má ekki gleyma þætti DJ Ívars sem grúfði sig yfir plötuspilarann á sama tíma og hann sinnti hlutverki barþjóns.  Eftirpartí fór svo fram í hverfi broddborgara Reykjavíkur.
 

Miðvikudagur 20. nóv - Plankastrekkjarar

Alls mættu fjórir allsgáðir hlauparar í dag.

Ársæll var undanfari, athugaði færið.  Dagur, Huld og Oddgeir fylgdu í kjölsogi hans.  Flugvallarhringur annaðhvort um Hofsvallagötu eða Meistaravelli.

Að hlaupi loknu var komið að plankastrekkjaranum.  Er nokkuð ljóst að klúbburinn á upprennandi heimsmeistara í plankastrekki í honum Ársæli.  Þvílík frammistaða!

Talandi um plankastrekkjara......smellið hér

Þriðjudagur 19. nóv - Hvar er WC-ið?

Fáir treystu sér út í dag.  Þó mættu Síamssystur og Oddgeir.

Ákveðið að fara flugvallarhring, réttsælis.  Eftir u.þ.b. 1 km varð Síamssystrum svo brátt í brók að þær þurftu að bregða sér á WC í HR.  Spurðist ekki meir til þeirra eftir það.  Oddgeir tók hins vegar fyrrnefndan flugvallarhring í nefið.  Sléttir 8 km.

Mánudagur 18. nóv - Tær vetrar snilld

Mætt í dag á mismunandi tíma en öll á guðs vegum voru: Dagur, Sigurgeir, Huld, Oddgeir, Þórdís, Sæli og Ívar.  Frábært vetrarveður, tært loft, snjór og falleg birta.

Dagur, Sigurgeir, Huld og Oddgeir fóru flugvallahring í lengri kantinum og enduðu í 10 km.  Þórdís og Sæli hurfu inn í skóg og Ívar var seinn fyrir og fór því sér.

Lög og markmið Icelandair Athletics Club

Lög og markmið Icelandair Athletics Club voru borin upp og samþykkt síðasta aðalfundi, haldinn 16. nóvember 2013. Engar breytingar voru gerðar að þessu sinni.  Sjá gildandi lög og markmið hér að neðan:

Tilgangur
Tilgangur klúbbsins er að vera vettvangur fyrir þá félaga í STAFF sem hafa ánægju af allri hreyfingu til heilsubótar.

Markmið
Markmið klúbbsins er að veita félagsmönnum sínum fjölbreytt tækifæri og félagsskap til að stunda hreyfingu. Klúbburinn skal þannig vera í fararbroddi innan samstæðunnar við skipulagningu og með hvatningu til þátttöku í hvers kyns atburðum sem stuðla að hreyfingu.

Lög félagsins
1. Klúbburinn heitir Icelandair Athletics Club, starfar undir merkjum STAFF og er opinn öllum félagsmönnum STAFF.

2. Í stjórn sitja 3 félagsmenn.  Stjórnin skiptir með sér verkum.  Aðalfundur kýs með sér skoðunarmann reikninga.

3. Ný stjórn leggur fram framkvæmdaáætlun fyrir komandi starfsár eigi síðar en fyrsta janúar.

4. Ný stjórn ræður framkvæmdastjóra almenningshlaupsins sem haldið skal í maí.

5. Félagsmenn greiða árgjald til að standa undir rekstrarkostnaði klúbbsins. Stjórnin ákveður árgjald hverju sinni.

6. Klúbburinn stendur fyrir skipulögðum æfingum af einhverju tagi.

7. Klúbburinn stendur fyrir almenningshlaupi fyrsta fimmtudag í maí. Stjórn klúbbsins er heimilt að færa þessa dagsetningu til.

8. Klúbburinn skipuleggur þátttöku í keppnum ár hvert í samræmi við áhuga félagsmanna.

9. Starfsári klúbbsins lýkur með lokahófi sem haldið er í október eða nóvember ár hvert. Lokahófið er jafnframt aðalfundur klúbbsins.
 

Til aðalfundar skal boða með að minnsta kosti 2ja vikna fyrirvara. Boðun aðalfundar skal fara fram á bloggsíðu klúbbsins og/eða með tölvupósti á skráða félagsmenn. Aðalfundur telst löglegur mæti, hvort sem meira er:

a)    Að minnsta kosti 5 atkvæðisbærra félagsmanna, eða

b)    að minnsta kosti 5% atkvæðisbærra félagsmanna 

Atkvæðisbærir félagsmenn á aðalfundi eru þeir sem skráðir eru í klúbbinn á hádegi, daginn fyrir aðalfund og hafa greitt árgjald þess árs. Við atkvæðagreiðslu á tillögum að breytingum á lögum og markmiðum klúbbsins skal aukinn meirihluti greiddra atkvæða ráða niðurstöðu. Aukinn meirihluti telst að minnsta kosti 2/3 hluta greiddra atkvæða. Hjáseta telst ekki til greiddra atkvæða.

Dagskrá aðalfundar skal vera eftirfarandi:

a)    Skýrsla formanns um afrek liðins starfsárs

b)    Yfirferð gjaldkera á ársreikningi klúbbsins og hann borinn upp til samþykktar

c)    Tillögur um breytingar á lögum og markmiðum klúbbsins

d)    Kosning stjórnar

e)    Kosning skoðunarmanns

f)     Önnur mál

Tillögur að lagabreytingum skulu berast stjórn með sannanlegum hætti eigi síðar en á hádegi, daginn fyrir aðalfund.

10. Tilgangur félagsins, markmið og lög þess skulu borin upp á aðalfundi félagsins til samþykktar, með eða án breytinga.

Vesalingarnir mæta ekki!

Naglarnir sem mættu á svæðið í dag voru Óli (King for a week), Inga og Sigurgeir.

Eins og svo oft á föstudögum þá var miðbærinn fyrir valinu. Við tókum þá djörfu ákvörðun að breyta leiðinni aðeins til að fá smá tilbreytingu í þetta og virkaði þessi nýja leið líka svona rosalega vel.

Á morgun er aðalfundur og árshátíð...PARTY

Aðalfundurinn
Aðalfundurinn verður haldinn á Hótel Natura (Hótel Loftleiðum).  Við ætlum fyrst að taka létta æfingu og verður lagt af stað klukkan 1108 frá hótelinu.  Munið að taka með ykkur handklæði.  Aðalfundurinn hefst svo að æfingu lokinni.  Léttar veitingar verða í boði.

Árshátíðin
Árshátíðin fer fram í Stélinu, sal STAFF í Síðumúla 11, og hefst hún klukkan 20 og mun standa fram eftir kvöldi.  Í boði verða veitingar í föstu og fljótandi formi.  Makar félagsmanna eru velkomnir.  Enginn aðgangseyrir er að árshátíðinni. Mæta svo og tjútta dálítið!!


Kv. Geiri CK

Hver er þessi Sigrún???

Mættir: Óli, Huld og Geiri CK

Þegar það var orðið ljóst að Sigrún mætti ekki þá fórum við bara af stað. Fórum yfir í Kópavog í leit að skjóli en líklega var bara meira rok þar enda HK-hverfið sem við fórum í gegnum!

Allir spenntir fyrir Árshátíðinni og líklegt að Sigrún verði á staðnum.

Kv. Geiri CK

Hverjir ætla að mæta á árshátíðina?

Skráið nafn ykkar í "ummælakerfið" hér að neðan og takið fram ef makinn kemur með.

Vinsamlegast skráið ykkur fyrir klukkan 12 á fimmtudag.

Koma svo!!

ASCA í Madrid - Ferðasaga og myndir

Eins og við var að búast var það föngulegur hópur sem hélt af stað í ASCA ferð sl. föstudagsmorgun.  Flogið var til Madrídar í gegnum London og gekk það ferðalag að mestu áfallalaust fyrir sig.  Að vísu misstu nokkrir liðsmenn af vélinni sinni milli London og Madrídar vegna grunsamlegra hluta sem fundust við gegnumlýsingu á farangri þeirra við öryggisleit í London.  Til að fyrirbyggja allan misskilning þá fundust engin ólögleg fæðubótarefni í farangri okkar fólks, enda málið allt einn stór misskilningur!

Menn og konur urðu að rísa árla úr rekkju á laugardasmorgun þar sem hlaupið var ræst klukkan 10.  Voru fæstir Madrídarbúar komnir á stjá um það leyti.  Hlaupið var í San Blas garðinum í austurhluta borgarinnar.  Brautin í garðinum var 1,2 km að lengd og hlupu konur 4 hringi, alls 4,8 km, og karlar 7 hringi, alls 8,4 km.  Ræst var í karla- og kvennaflokki á sama tíma.  Okkar fólk reyndi sitt ítrasta en átti við ofurefli að etja að þessu sinni í formi klónaðra þríþrautargyðja frá Austrian (konur) og sólbrúnna hráskinkuhnakka frá Iberia (karlar).  Fór svo að kvenna- og karlalið Icelandair lentu bæði í 2. sæti í liðakeppninni.

Liðaúrslit:

Konur:

1)      Austrian

2)      Icelandair

3)      Sameinað úrvalslið SAS, Iberia og Austrian

Karlar:

1)      Iberia

2)      Icelandair

3)      SAS

4)      Lufthansa (DNQ)

Að málsverði og verðlaunaafhendingu lokinni hélt hópurinn á vit ævintýranna í miðborg Madrídar.  Heimför á sunnudegi gekk síðan vel ef frá er talin nokkur bið í flugvélinni eftir lendingu í KEF þar sem ekki var hægt að koma landgangi að vegna slæms veðurs.

Hér að neðan fylgja nokkrar myndir úr ferðinni.
 

Liðsmynd með hinum goðsagnakennda Paco

 

 

Verðlaunaafhending kvenna

 

 

 

Verðlaunaafhending karla

 

 

Bragðað á lystisemdum Madrídar

 

 

Báðir með dælulykilinn.  Þjónar eru óþarfir á svona stað!

 

Mánudagur 11. nóv - Í skóginum hljóp hlaupari einn.....

.....það var Oddur nýliði.

Síamskettirnir og Ingunn komu svo og hughreystu hann við höfuðstöðvarnar.  Rúmlega 7 km.

Föstudagur 8.nóv

Mættir: Dagur, Fjölnir, Hilmar og Inga.
Hlaupið um Hofsvallagötu og Suðurgötu eftir smekk og "nennu" hvers og eins.

Baráttukveðjur til Madrid!

fþá

Skógarhlaup 6.nóv

Margt um manninn í dag en dreifing hlaupara yfir meðallagi. Dagur, Ívar og Fjölnir ákváðu að halda í skóginn vegna næðings vindar og þar urðu á vegi okkar; Óli á heimleið, Þórdís sem var dreginn í hópinn en hvarf svo sjónum okkar, Ingunn á hlaupum og Jói á göngu. Á lokasprettinum við hótel hittum við svo Önnu Dís og Gróu. Samtals 8,3 km.

fþá

Þriðjudagur 5. nóv - Nýr félagsmaður er eldri en tvívetra

Mætt í dag voru Síamskettirnir tveir, maraþonbræður, Oddur og nýr félagsmaður, Arnar Benjamín Ingólfsson.  Réttsælis hringur um flugvöllinn þar sem karlar lengdu aðeins í, fóru um Kaplaskjól í stað Hofsvallagötu.  Kvenþjóðin fór um Hofsvallagötu.  All mikið fart á karlpeningi á seinni stigum æfingar, þar sem Dagur færðist allur í aukana er hann áttaði sig á því að nýji félagsmaðurinn væri eldri en tvívetra í hlaupunum.

Karlar tæplega 10 km.  Konur aðeins minna.

Fimmtudagur 31.okt

Mættir: Huld, Inga, Óli, Jói Pilot, Fjölnir og Sveinbjörn á sérleið.

Hofsvallagata með hámarks D-vítamín inntöku. Kvennfólkið lagði á ráðin með fyrirhugaða ASCA keppni. Enn er laust sæti í karlaliðinu.

fþá CK

Árshátíðin - Hýsing óskast

Árshátíð Skokkklúbbs Icelandair verður haldinn laugardaginn 16. nóvember.  Aðalfundurinn verður haldinn fyrr um daginn.  Nánar um það síðar.

Stjórn skokkklúbbsins auglýsir eftir velviljuðum félagsmanni sem er tilbúinn að hýsa árshátíðina. Þeir sem eru tilbúnir, vinsamlegast setji sig í samband við undirritaðann sem fyrst.

Kveðja, f.h. Skokkklúbbs Icelandair,
Oddgeir
Ritari
s. 8619870

Þriðjudagur 29. okt - Fjórir kóngar

Fjórir kóngar mættu í dag:  Hinir lúnu Cargó Kíngs og hinir hressu GI og Oddur.  Rólegur hringur um flugvöllinn að beiðni Cargó Kíngs.

Fjörlegar umræður spunnust um hið margrómaða KSÍ og nýjustu uppátæki þeirra.

Alls 8,6 km.

Mánudagur 28.okt

Mættir: Cargo Kings, Sveinbjörn og Óli auk Jóa á göngu.

Kóngarnir fóru rólegan skógræktarhring rétttsælis öfugan. Sveinbjörn fór sér og Óli kom seint og um síðir í maraþon endurheimtur eftir flott hlaup um helgina.

fþá CK

Hver er meðlimurinn?

Nýlega voru tveir meðlimir skokkklúbbsins í staddir í bænum Fuengirola á Spáni.  Var þar dvalið í góðu yfirlæti í íbúð starfsmannafélags Icelandair.  Við lestur gestabókarinnar hnutu menn um nöfn annarra félagsmanna sem hafa verið duglegir að nýta sér íbúðina, enda íbúðin fín og bærinn huggulegur.

Kvöld eitt þegar umræddir meðlimir skokkklúbbsins sátu að snæðingi á ágætum veitingastað í bænum var þeim litið inn í eldhúsið.  Þeim til mikillar furðu sáu þau einn meðlima klúbbsins ljóslifandi í kokkabúningi, reiðandi fram girnilegar kræsingar af mikilli innlifun.  Náuðst nokkrar myndir af okkar manni við iðju sína.  Að vísu eru þær ekki í bestu gæðum en verða að duga.

Og nú er spurt:  Hver er meðlimurinn?  Tilgátur óskast sendar í "Comment-a-kerfið".  Önnur spurning:  Hvað er hann eiginlega að gera þarna?  Tilgátur óskast einnig sendar í  "Comment-a-kerfið".

Miðvikudagur 23. okt - Lokaundirbúningur í gangi fyrir FM-hlaupið

Mætt í undirbúning fyrir næstu helgi, þegar FM-hlaupið svokallaða fer fram, voru: Einhverfu bræðurnir Dagur og Úle, síamssystur, Sigurgeir og Oddur.  Þá mætti Jói einnig í nýrri gerð af hlaupaskóm.

Vegalengdir í boði í FM-hlaupinu verða 1/2 maraþon og heilt maraþon.

Af einhverfu bræðrunum er það að frétta að þeir eru í lokaundirbúningi sínum fyrir þriðja maraþonið á skömmum tíma, á meðan Sigurgeir og Oddur eru að gera sig klára fyrir 1/2 maraþon.  Huld er ennþá volg fyrir 1/2 en Sigrún segir pass.

Æfingaprógram einhverfu bræðranna virðist nokkuð sérstakt því á dagskránni í dag, 3 dögum fyrir maraþonhlaup, var ærlegt tempó.  Alls hlupu þeir 10 km.  Restin hljóp styttra og mun hægar, alls 8,5 km.

Fimmtudagur 17. október - Ekkert "junk"

Loks komu upp þær aðstæður að hægt var að knýja fram alvöru æfingu. Settir voru fram valkostir (les. afarkostir) þ.e. 6x800 eða tempó. Fyrri kosturinn varð ofan á og í æfingunni tóku þátt Dagur, Fjölnir, Ívar og Huld. Leystu allir verkefnið með sóma og hlupu á sama hraða og Dagur hljóp 37. kílómetrann í gegnum bjórstöðvarnar í Einhverframaraþoninu. Það var nb hraðasti kílómetrinn.

Auk áðurnefndra sást til Óla og Sveinbjörns.

Að leiðarlokum var stóra hlaupahanskamálið leyst farsællega, þökk sé FC og hans hirð.

Kveðja góð,

Huld

   

Miðvikudagur 16.okt

Mættir: Guðni og Fjölnir. Ársæll í forstarti

Rólegur hringur í góða veðrinu um Fossvog-Háaleiti-Safamýri-Hlíðar og heim. Samtals um 8km.

Kv, FÞÁ

Tapað / Fundið

Starfsmaður kom að máli við ábyrgan Cargo King og var með svarta hlaupahanska (líklega kvennmanns) sem fundust í gær við teygingaraðstöðu hlaupara undir gafli hótels.
Ef einhver telur sig eiga tilkall til þessara hanska getur viðkomandi sett sig í samband við undirritaðann.

Kv, Fjölnir

Þættinum hefur borist bréf.....

Ævareiður hlustandi hringdi inn vísukorn vegna Eindhoven uppákomunnar og var greinilega mikið niðri fyrir er hann söng þessar línur fyrir þáttastjórnanda:

"Hann drekkur bjór þrisvar í viku
og notar karate sem líkamsrækt.
Hann hleypur maraþon um helgar
með mynd af Degi í vasanum...
Með mynd af Degi í vasanum?"
                                        Lagið-tengist ekki þessari frétt og heldur ekki myndin!

Við þökkum þessum hlustanda fyrir sitt innlegg.
Góðar stundir!

Takið daginn frá - Aðalfundur og árshátíð Skokkklúbbs Icelandair verða haldin laugardaginn 16. nóvember

Aðalfundur og árshátíð Skokkklúbbs Icelandair verða haldin laugardaginn 16. nóvember nk. Nánari upplýsingar varðandi tíma og staðsetningu verða veittar er nær dregur.

Mánudagur 14. okt - Fjölnir CK er mættur

Hófleg mæting í dag þrátt fyrir frábært veður:  Fyrstur af stað (of snemma) var Fjölnir CK, já ég endurtek Fjölnir CK!  Á réttum tíma fóru Huld síams, ÞórdísÆ og Oddur.  Sveinbjörn mætti líka á réttum tíma en hvarf fljótlega inn í skóg.  Lestina ráku svo Íbbi og Matti.

Mismunandi áherslur og vegalengdir í dag, frá ca. 7 km og upp í 10 km.

Sigurgeir CK birtist í vinnufötunum í lok æfingar.  Var hann í leit að félaga sínum honum Fjölni CK og virtist nokkuð áhyggjufullur.  Þegar þetta er ritað hefur ekkert spurst til Fjölnis CK og eru þeir sem eitthvað vita um ferðir hans beðnir um að gefa sig fram við vallarstjóra.

Skötuhjú í borgarferð

Svo virðist sem skötuhjúin Dagur og Úle hafi brugðið sér í helgarferð til Eindhoven í þeim tilgangi að taka þátt í skemmtiskokki sem haldið er árlega í borginni. Völdu félagarnir lengstu vegalengd í boði, alls 42,2 km.  Hér að neðan má sjá myndir af þeim kumpánum að hlaupi loknu, ásamt tímum.  Vel gert hjá þessu skemmtilega pari!

Dagur Egonsson, Hollendingurinn fljúgandi, á 3:28:01

Ólafur Briem, Europhiaman, á 3:28:20


 

Föstudagur 11. okt - Bæjarins besta hlaup

Mætt í dag: GI, Sigrún síams, Sigurgeir og Oddur.  Hópurinn fór bæjarrúnt í ágætu veðri.  Hlýtt en nokkuð vindasamt. Alls 7,5 km. 

Jakkafata-Úle mætti einnig en þó allt of seint.  Þar af leiðandi var ekki var hægt að bíða eftir honum og ekki er vitað hvað hann tók sér fyrir hendur.

P.s. Fín mæting í "Powder-aid" hlaupið hans Dags í gærkveldi.

Úrslit ASCA úrtökumótsins liggja fyrir

Úrslit ASCA úrtökumótsins sem fram fór þriðjudaginn 8. okt. liggja fyrir.  Það var fín mæting hjá konunum og boðið upp á hörkukeppni.  Mæting hjá körlunum var ívið lakari en fínir tímar hjá þeim sem hlupu.  Þátttökufjöldinn dugir til að manna kvenna- og karlasveit fyrir komandi ASCA hlaup í Madrid.

Konurnar hlupu alls tvo hringi í Öskjuhlíðinni en karlarnir hlupu fjóra.  Hver hringur var u.þ.b. 1,7 km að lengd.  Röð og tímar þátttakenda eru hér að neðan.  Lokatími kvennanna er í seinni dálki (feitletrað), sá fyrri er millitími eftir fyrri hring.  Sama gildir um karlana, síðasti dálkur (feitletraður) er lokatími en dálkarnir þrír á undan eru millitímar hringja 1-3.  Tvær konur og einn karl mættu að auki en luku ekki hlaupi.


Konur:

Inga	08:10	16:17
Huld	08:10	16:24
Sigrún Erle	08:10	16:29
Björg	08:15	16:54
Þórdís O Anna Dís Karlar:
Þórólfur	07:10	14:08	21:03	27:52:39
Oddgeir	07:10	14:22	21:48	29:09:05
Viktor	07:15	14:50	22:36	30:12:92
Klemens	07:30	15:13	23:03	30:47:69

Ívar


                                                                            

Miðvikudagur 9. okt - Nýja Dressman auglýsingin

Mættir í réttum "dresskóða" fyrir væntanlega Dressman-auglýsingu voru: Bjöggi B, Sigurgeir, Oddur, GI og Dagur.  Að auki mættu Síamssystur sem viðhlæjendur.  Hefðbundinn hringur um flugvöllinn via Hofsvallagötu, nema Bjöggi B sem fór í sér myndatöku á Suðurgötunni.  Þá sást til Jóa á góðu skriði í grennd við Dressmen og Síamssystur.

U.þ.b. 8,6 km hjá flestum.

Hádegisæfing 07.okt

Mættir: Huld. Inga, Óli, Ívar, Dagur, Fjölnir, Sveinbjörn, Jói.

Sveinbjörn og Jói á sérleiðum en aðrir fóru Hofs í rjómablíðu. Mikil spenna í mannskapnum vegna úrtökumóts ASCA

Kv, FÞÁ CK

Vika 41

Mánudagur: Rólegt 7-9 km.
Þriðjudagur: 4x1600 á keppnis-pace.
Miðvikudagur: Rólegt 7-9 km
Fimmtudagur: 55 mín tempó.
Föstudagur: Rólegt 7-9 km.
Laugardagur: 2 klst. (3/1).

Föstudagur 4. okt - Skógurinn

Mætt:  Dagur, ÞórdísO, 1 síamssystir, Oddur, Úle og Íbbi.

Menn og konur leituðu í Öskjuhlíðarskóginn í dag, enda norðangarri og fremur svalt í veðri.  Dagur leiddi hópinn um skóginn enda maðurinn öllum hnútum kunnugur á þessum slóðum.  Svo fór að lokum að einhverjir heltust úr lestinni, hvort sem það var af völdum hafvillu eða uppgjafar.

Af kargókóngum er það helst að frétta að annar þeirra sást laumast að krásum Hamborgarafabrikkunnar á meðan á æfingu stóð en hinn ók hring eftir hring á bílastæði aðalstöðvanna á sama tíma.

Fimmtudagur 3. okt - King for a day

Mætt:  Dagur, önnur síams systra, Oddur, Sigurgeir og Úle, sem fékk að vera "king for a day" í fjarveru Fjölnis.  Sæli og Sveinki fóru sér á undan.

Tempóæfing í þægilegri kantinum.  Veður svo gott að hægt hefði verið "að spila borðtennis við þessar aðstæður", að mati Úle.

Miðvikudagur 2. okt - The Boys

Það voru hinir geðþekku drengir í tríóinu The Boys sem mættu í dag en sá hópur samanstendur af Degi, Matta og Oddi.  Rólegt hlaup í rólegu veðri.  Sigrún Síams mætti svo í lokin og tók síðustu mínútu æfingarinnar.

Tempó á morgun.

Þriðjudagur 1. október

Það voru bara meistarar sem mættu í dag, enda meistaramánuður hafinn. Inga, Dagur, Matthías og Huld tóku æfingu dagsins samkvæmt æfingaáætlun sem flestum ætti að vera kunn. Karlpeningurinn ætlaði engu að síður að víkja sér undan æfingunni en Ingu tókst með harðræði að knýja fram hlýðni. Í sem stystu máli hljóðaði æfingin upp á 5x800 og hófust sprettirnir við bakarí og lá leiðin um Hofs, Ægisíðu að Nauthóli. Verkaskiptingin var þannig að Inga, Matti og Huld sáu um að hlaupa en Dagur reiknaði og hrópaði upp millitíma.
Allir hlutaðeigandi voru sáttir að leiðarlokum og uppskáru 8 km.
Kveðja góð, Huld

Vika 40

Mánudagur: 7-9 km rólegt.
Þriðjudagur: 5x800 m á 10 km pace
Miðvikudagur: 7-9 km rólegt.
Fimmtudagur: 30 mín tempó
Föstudagur: 7-9 km rólegt.
Laugardagur: 15 km keppnishlaup.

Mánudagur 30. sept - Nauðsynlegt að menn haldi ró sinni

Mætt í dag voru:  Huld, Ívar (hver er það aftur?), Dagur, Úle, Valli og Oddur.

Valli og Oddur voru svo spenntir fyrir tempóæfingu morgundagsins að þeir urðu bara að taka hana núna.  Restin hélt hins vegar ró sinni, lengdi aðeins í og hljóp sína leið.  Rúmlega 9 km hjá V&O en 10 km hjá hinum.

Að vísu skilaði Huld sér ekki til höfuðstöðvanna í lok æfingar og hér með lýst eftir henni.

Föstudagur 27. sept - Cul de sac

Fínt veður og ágæt mæting:  Dagur, Úle, Síams, Þórdís hin nýja, Valli og Oddur.  Sæli og ðe duckwatcher fóru prívat, sitt í hvoru lagi.

Óvissuferð í boði Úle og gekk á ýmsu.  Óvenju mikið af snörpum, skörpum og skyndilegum beygjum ásamt áður ókunnum húsasundum.  Leiðin sem var farin er svo flókin og ruglingsleg að hún verður ekki frekar tíunduð hér.

Þá bar það til tíðinda að öðrum síamstvíburanna tókst að strauja niður menntamann í bókstaflegri merkingu þegar hópurinn hljóp í gegnum yfirráðasvæði Háskóla Íslands svo lá við stórskaða fyrir háskólasamfélagið.

Hádegisæfing - TEMPÓ

Mættir: Matthías, Huld, Inga, Dagur, Óli og Sigurgeir

Óli var eitthvað tímabundinn og var mættur kl. 11:08. Við hittum hann á fyrsta km hjá okkur en þá var hann að klára á fljúgandi siglingu og hafði engan tíma til að tala við okkur.

Aðrir tóku æfingu dagsins sem var 50 min tempó. Það er ekki hægt að segja annað en að allir stóðu sig eins og hetjur. ALLIR fóru Meistaravelli og það var engin að skala þessa æfingu :o)

Kveðja,
Sigurgeir

Miðvikudagur 25. sept - Gæðaúttekt búninga- og sturtuaðstöðunnar

Það voru aðeins þeir allra hörðustu sem treystu sér út í hádeginu, nebbilega Íbbi og Oddur.  Áttu þeir góða stund saman.

Það sást til Dags í búnings- og sturtuaðstöðu félagsmanna í hádeginu og er talið að hann hafi verið í árlegri gæðaúttekt og þar af leiðandi ekki komist út að hlaupa.

Þriðjudagur 24. sept - 3X1600

Í dag mættu Dagur, Úle, Huld, Ársæll, Matti og Oddur.

Nú skyldi taka 3X1600m spretti á áætluðum ½ maraþons keppnishraða hvers og eins.  Ársæll og Matti ákváðu reyndar að taka ekki þátt í þessari vitleysu og fóru um Suðurgötu.  Hin héldu áfram, byrjuðu tempósprettina eftir að komið var yfir Hofsvallagötu, og beygðu af Hringbraut við Meistaravelli.

Vegalengdir frá ca. 7km upp í ca. 9,5km.

Vika 39

Mánudagur: Rólegt 7-9 km.
Þriðjudagur: 3x1600 m á keppnis-pace.
Miðvikudagur: Rólegt 7-9 km.
Fimmtudagur: 50 mín tempó
Föstudagur: Rólegt 7-9 km.
Laugardagur: 1:45

Föstudagur 20. sept - Ný cargó sending

Kargókíngs voru uppteknir í uppvaskinu í dag í kjölfar tilraunaeldhúss Bertels og sendu því fulltrúa sinn á æfinguna.  Fulltrúi þeirra var Inga, en hún hóf nýverið störf hjá kargóinu.  Auk hennar mættu HogS, Úlen, Bjöggi, Oddur, Sæli og Þórdís en þau tvö síðastnefndu fóru á undan.

Föstudagsbæjarrúntur með ormagöngum og öllu.

Hádegisæfing 19. sept

Mættir: Óli, Fjölnir, Dagur, Ársæll, Ívar og Sigurgeir.

Ársæll fór aðeins á undan og Ívar eitthvað á eftir.

Aðrir mættu á sinn stað kl. 12:08.

Í dag var 45 mín tempóæfing. Það var boðið upp á Hofs og Kapla-langt + perri.
Flestir fóru Kapla-langt en samt var einn sem fór Hofs en hann er búinn að lofa að lengja þegar næsta tempóæfing verður.

Kveðja,
Sigurgeir

Hádegisæfing 18. sept.

Ég þori ekki að skrifa neitt, ég mátti ekki vera á æfingunni.  Við GI skiptum dögunum á milli okkar en ég mætti óvart tvo daga í röð. Hinir voru Huld, Dagur, GI og B.Bjútí.  Síðan gat maður ekkert hlaupið eftir að maður frétti hverjir voru gestakokkar í starfsmannamötuneytinu í dag; CK.  Hjálp!  Þetta er náttúrulega fín afsökun fyrir þá sem nenna engu að þykjast vera að elda.
Frábært veður var í dag og fengum við Huld ávítur fyrir að vera í vitlausum buxum, þ.e. síðum.  Þetta mun aldrei gerast aftur og er beðist velvirðingar á þessum leiðu mistökum. 
Með vísan til fyrri umræðna hlaupahópsins eru til meðferðarúrræði fyrir þá sem vilja hætta að hlaupa:

1. Fá vinnu við vetrarraðhlaupsseríu Poweradehlaupsins.
2. Þykjast vera að elda í einhverju mötuneyti.
3. Láta vísa sér af æfingu fyrir rangan klæðaburð.
4. Gerast sendiherrafrú í útlöndum.
5. Trúa að maður geti hætt með hverri einustu frumu líkamans, ekki bara halda að maður geti það.

Ýmsir möguleikar eru greinilega í stöðunni sem áður voru ekki sýnilegir.

Æfingin í dag var skv. plani (sjá æfingaáætlun) en GI og Dagur tóku smá auka sprett til að sýna sig aðeins fyrir okkur.  Þeir kunna þetta strákarnir okkar.
Ókei, bæ.
SBN
Mynd úr tilraunaeldhúsi höfuðstöðvanna

Hádegisæfing 17. september

Núðlu grænmetissúpa með engifer og soja
Steiktar kjötbollur að hætti ömmu
Grænmetisbaka með jógúrtsósu

Björgvin var ekki svangur og æfði inni.

Vika 38

Mánudagur: 7-9 km rólegt.
Þriðjudagur: 4x800m sprettir á 10 km pace.
Miðvikudagur: 7-9 km rólegt.
Fimmtudagur: 45 mín tempó.
Föstudagur: 8-9 km (6,4 km á keppnishraða)
Laugardagur: 1:45 (3/1)

Hádegishlaup 16. sept 2013

Dagur, Guðni, Óli og Sveinbjörn í Öskjuhlíð.
GI

Föstudagurinn 13. sept - Engin óhöpp í dag

Bæjarrúntur í tilefni föstudagsins, föstudagsins þrettánda.  Hefðbundinn hringur á þægilegum spjallhraða þar sem þátt tóku: Dagur, Úle, GI, Óskar, Sigurgeir og Oddur.  Allir komust heilir frá æfingunni, engin óhöpp og engin hjátrú í gangi, sjö níu þrettán!

Þrátt fyrir almenn rólegheit og afslöppun sá Sigurgeir aftur ástæðu til þess að kvarta yfir því að menn framkvæmdu æfinguna ekki rétt, að of geyst væri farið (hann virtist sjálfur hálf lúinn að sjá eftir mikið æfingaálag að undanförnu).

Fimmtudagur 12. sept - Tempóæfing

Í dag var prógram í boði Sigurgeirs en það hljóðaði upp á hlaup í 30 mínútur sem skiptust í 10 mín. upphitun, 15 mín. tempó og 5 mín. niðurskokk.  Þeir sem kusu að mæta í þetta voru Þórólfur, Dagur, Úle, Sigurgeir, Oddur, Bjöggi, Síams 1 og Síams 2.  Þórdís kaus að fara á undan og sér.

Dagur krafðist þess að hlaupinn yrði réttsælis hringur um flugvöllinn, þrátt fyrir sterkan útsynning.  Það þýddi óhjákvæmilega að þegar komið var að tempókafla æfingingarinnar, við suðurenda N/S flugbrautar, var vindur í hámarki og óhagstæður með afbrigðum.  Menn héldu þó haus og tóku á því.  Reyndar virtist Þórólfur hlaupa í meðvindi allan tímann, slíkur var hraðinn á manninum.  Menn og konur skiluðu sér síðan að höfuðstöðvum á mismunandi tímum enda mishratt hlaupið og mislangar vegarlengdir farnar.

Sigurgeir var ekki alls kostar sáttur við hópinn í dag og hélt því fram að hann hefði verið sá eini sem framkvæmdi æfinguna rétt, þ.e. hélt sig nákvæmlega við 10, 15, 5 mínútna skiptinguna.

Hádegishlaup 11. september 2013

Mættir:  Björgvin, Dagur, Guðni, Huld, Matti og Óskar

Hlaupið inn í Fossvog og um Öskjuhlíðina.  Samtals 7k.

GI

Vika 37

Það gleymdist að setja æfingarplanið fyrir vikuna, seint er betra en aldrei!

Miðvikudagur: Rólegt 7-9 km
Fimmtudagur: 30 mín tempó
Föstudagur: Rólegt 7-9 km
Laugardagur: 10 km keppnishlaup. Þeir sem tóku ekki langt um síðustu helgi eiga að taka 90 mín hlaup!

Hádegisæfing þriðjudaginn 10. sept - Hvert fóru allir?

Eftir fína mætingu síðustu daga var heldur fámennara yfir að líta, enda veður ekki gott.  Þó létu Fjölnir og Oddur það ekki slá sig út af laginu og tóku sína gæðaæfingu með vindinn og regnið í fangið.  Öfugur flugvallarhringur um Hofsvallagötu.  6x400m sprettir hófust á gatnamótum Hofsvallagötu og Hringbrautar og lauk við N/S braut flugvallarins.  Alls tæpir 9K í dag.

Í dag var komið að Sigrúnu að leysa Huld af og bíða við höfuðstöðvarnar og kasta kveðju á landann er hann lauk æfingu sinni.

Hádegisæfing mánudaginn 9. sept - Í hvaða átt er Súlnasalur?

Fín mæting í hádeginu.  Sveinbjörn lagði hálfnakinn af stað á undan hinum sem voru:  Þórólfur, Dagur, GI, Oddur, Úle, Bjöggi og mú....ég meina Fjölnir.  Rangsælis flugvallarhringur.

Allt gekk samkvæmt áætlun þar til menn nálguðust Bjössabakarí á Hringbraut.  Þá fór Bjöggi eitthvað að heltast úr lestinni og dró þá GI og Fjölni með sér í þann pakka.  Allt í einu beygði Bjöggi hart í bak og tók strikið beint á Súlnasal Hótel Sögu með þá GI og Fjölni í eftirdragi.  Tvennum sögum fer af því hvaða erindi hann og félagar hans áttu þangað en þeir voru þögulir sem gröfin þegar gengið var á þá að æfingu lokinni.  Þóróflur, Dagur, Oddur og Úle héldu sínu striki og beygðu ekki af Hringbraut fyrr en við Framnesveg.  Endaði þar af leiðandi í 10K hjá þeim.  Dagur hafði á orði að þessi æfing hefði verið "sköluð" upp á við hjá honum, Oddi og Úle, þökk sé Þórólfi.

Við höfuðstöðvarnar beið síðan Huld.  Hún hafði tekið séræfingu og ákvað að kasta kveðju á landann af því tilefni.

Lýst er eftir æfingaplaninu.  Það sást síðast í fórum Valla víðförla.  Ekkert hefur til þeirra spurst í nokkurn tíma.  Ekki gott þegar menn slá svona slöku við.

Hádegisæfing föstudaginn 6. sept - Ætlar þú að nota þetta vatn?

Mætt í dag: Dagur, Óskar, GI, Sigrún (núna í hlaupafötum), Valli og Oddur.  Músin sem var í aðalhlutverki á æfingunni í gær var hvergi sjáanleg.  Það fréttist víst af henni í kantínunni að gæða sér á steikarsamloku og bernaise.

Æfingin í boði GI sem þræddi miðbæ Reykjavíkur og sýndi meðhlaupurum sínum staði sem hann fór með gamlar kærustur á í den, þ.á.m. Hólavallakirkjugarð (hvað var í gangi þar?).  Endaði í alls 8K.

Í lok æfingar risu upp deilur meðal manna hvort menn hafi gefið nóg í æfinguna.  Dagur og Oddur viðurkenndu að þeir hefðu "skalað" æfinguna.  Það fannst Valla alger firra og sagðist aldrei "skala"sínar æfingar.  Annaðhvort færi hann "all in" í þær eða lullaði bara (lullaði s.s. í dag).

Þá er komið að því að skýra út fyrirsögn æfingarinnar.  Spurningin heyrðist í karlasturtunni eftir æfingu gærdagsins.  Bjöggi sem var nýbúinn að endurræsa vatnið í sinni sturtu, steig um stundarsakir úr sturtunni og var ekki alveg ljóst hvort hann hyggðist fara aftur undir vatnið eða ekki.  Þá kemur Dagur aðvífandi á leið til sturtu, staðnæmist hjá Bjögga og spyr: "ætlar þú að nota þetta vatn?".

Hádegisæfing fimmtudaginn 5. sept - Sigrún, af hverju ertu í svörtum ruslapoka?

Mætt(ir) í dag voru: Dagur, Valli, Bjöggi Bí, Bechmel, Oddur og músin, en hún hafði ákveðnu hlutverki að gegna.  Að auki mætti Sigrún til leiks en þegar búið var að hlaupa tæpan kílómeter áttaði hún sig á því að hún var í hversdagsfötunum, hafði gleymt að fara í hlaupagallann fyrir æfingu.  Við það kvaddi hún hópinn og sást ekki meir.  Degi var nokkuð brugðið er hann sá Sigrúnu leggja af stað í hversdagsfötunum og var honum sérstaklega starsýnt á svartan mittisregnjakka sem hún klæddist.  Spurði hann því fordómalaust, "Sigrún, af hverju ertu í svörtum ruslapoka?".

Í dag lá fyrir að taka æfingu með 25 mínútna innvöfðum tempókafla.  Hefðbundinn rangsælis flugvallarhringur, með möguleika á lengingu, varð fyrir valinu.  Bjöggi og Bechmel gáfu snemma til kynna að þeir hyggðust ekki þreyta þessa raun og kvöddu við Suðurgötu.  Restin, Dagur, Valli, Oddur og músin héldu áfram.  Við Björnsbakarí á Hringbraut var komið að því að hefja tempóhluta æfingarinnar.  Hlutverk músarinnar skal nú gert heyrikunnugt:  Músin skyldi fara um Hofsvallagötu á meðan Dagur, Valli og Oddur skyldu fara um Meistaravelli, Kaplaskjól langt og Perrann.  Músin var sem sagt agn sem hinir áttu að reyna að hlaupa uppi.  Er skemmst frá því að segja að þeim félögum mistókst ætlunarverk sitt herfilega enda umrædd mús mun sprækari en hún gaf til kynna þegar verið var að leggja henni lífsreglurnar við upphaf hlaups.  Það fauk nokkuð í Valla þegar hann áttaði sig á því að ekki myndi takast að hlaupa músina uppi og hafði á orði að hún hefði "skalað" æfinguna (þetta er língó sem Valli heyrði um daginn á x-fit æfingu).  Menn hittust að lokum sælir og glaðir við HLH þar sem teygt var og spjallað.

Spurning til þín lesandi: Hver var músin?

Hádegisæfing 3.sept

Mættir: Bertel, Huld, Guðni, Dagur, Jói og Sigurgeir.

Plan dagsins voru 8xbrekkur og tókum við það að sjálfsögðu í kirkjugarðinum.

Allir tóku vel á því með bros á vör.

Kveðja,
Sigurgeir

Hádegishlaup, 2. september 2013

Týnda kynslóðin mætti í hádegishlaup, Ársæll, Dagur, Guðni og Jói sem eyddu hádeginu í Öskjulíðinni og svo Sigurgeir sem náði ekki að hlaupa í gær af því hann var of upptekinn að horfa á bæði liðin sín tapa fótboltaleikjum (gengur betur næst), þannig að hann hljóp 13 í rokinu í dag sem refsingu.

GI

Vika 36

Mánudagur: 7-9 km rólegt.
Þriðjudagur: 8 x brekkur.
Miðvikudagur: 7-9 km rólegt.
Fimmtudagur: 45 mín tempó
Föstudagur: 4,8 km pace. Hérna á að hlaupa á þeim hraða sem þú ætlar að hlaupa á í HM, gott að taka smá upphitun og niðurskokk. Þannig að þetta endar í ca. 7-8 km.
Laugardagur: 90 mín.

Alvöru æfing fyrir alvöru fólk!

Mættir: Huld og Cargo Kings.

Í dag var 40 mín tempó. Það er gaman að segja frá því að met var slegið í tempó-kaflanum þar sem allir voru vel undir 3:30 pace. Það var virkilega gaman að sjá hversu vel allir tóku á því og eru með fókusinn í lagi fyrir HM.

Á morgun er rólegt 7-9 km og þ.a.l. líklegt að menn eins og Oddur, Guðni o.fl. láti sjá sig :o)

Cargo Kings komast ekki í hádeginu á morgun þar sem þeir þurfa að undirbúa sig fyrir Strandblaksmót Icelandair Group sem verður í Sporthúsinu kl. 17:00 á morgun (föstudag). Kings hafa æft af fullum krafti fyrir strandblakið og fylgir hér myndband sem var tekið á æfingu okkar í gær, http://www.youtube.com/watch?v=Zmfd9etbXGE

Kveðja,
Sigurgeir

Hádegisæfing miðvikudaginn 28. ágúst - Marathonman lætur á sér kræla

Honum var vel tekið á sinni fyrstu æfingu eftir RM-ið sl. laugardag.  Já við erum að tala um hann gode gamle Úle.  Hann mætti þrælsprækur, pinnstífur og til í tuskið.  Engum sögum fer hins vegar af hlaupafélaga hans, Degi, sem einnig hljóp heilt maraþon í RM.  Talið er líklegt að hann sé ekki eins vel á sig kominn eftir hlaupið og Úle og þurfi meiri hvíld áður en hann reimar aftur á sig hlaupaskóna.

Auk Úle Marathonman mættu: GI (búinn að hvíla eftir RM), báðir Síams, Valli (tekur léttu æfingarnar) og Oddur.  Rangsælis flugvallarhringur um Hofs hjá strákunum en Síams fóru um Suðurgötu.  8,6K hjá þeim sem fóru lengst.

Þegar menn voru að týnast af svæðinu eftir æfingu dúkkaði Matti Sveinbjörns allt í einu upp.  Enginn veit hvaðan hann kom en hann var í hlaupafatnaði, í hlaupaskóm, sveittur og glaður sem hlýtur að þýða að hann var að hlaupa.  Er hann hér með beðinn um að gefa sig fram við aðra hlaupara við upphaf æfinga svo hægt sé að fylgjast betur með honum.

Klemenz lagður af stað hringinn í kringum landið

Klemenz Sæmundsson, félagi í Skokkklúbbi Icelandair, lagði í dag af stað í hringferð um landið á hjóli. Hann hyggst ljúka hringferðinni rétt um viku síðar eða miðvikudaginn 4. september, en þann dag verður kappinn fimmtugur. Strax í framhaldi af hringferðinni ætlar Klemenz svo að hlaupa "Klemmann" svokallaðan en hann liggur frá Reykjanesbæ um Sandgerði, Garð og aftur í Reykjanesbæ. Hann býður alla þá sem vilja hlaupa, hjóla eða ganga með honum þennan síðasta hluta ferðarinnar velkomna (hvort sem er öll vegalengdin eða hluti hennar). Með þrekraun þessari hyggst Klemenz safna áheitum til styrktar Blóðlækningadeild LSH.

Nánari upplýsingar um ferð Klemenzar og þátttöku í "Klemmanum" má finna hér á hlaup.is Einnig er hægt að fylgjast með ferðum hans á facebook hér. Stjórn Skokkklúbbs Icelandair hvetur félagsmenn til að fjölmenna í Reykjanesbæ seinnipartinn 4. september og samfagna Klemenz í "Klemmanum" hvort sem er hlaupandi, hjólandi eða gangandi og styrkja um leið gott málefni.

Hádegisæfing þriðjudaginn 27. ágúst - Gaman gaman

Þau sem mættu í dag voru:  Fjölnir (já hann mætti), Huld, Bjöggi og Oddur.  Einnig sást til Þórólfs vera að ljúka sinni æfingu þegar fyrrgreindir aðilar voru að leggja af stað.  Að auki fréttist af Úle maraþonfara í búningsklefanum en ekki er vitað hvort hann fór eitthvað lengra en það.

Valli víðförli hafði sett upp metnaðarfulla dagskrá fyrir daginn í dag.   Þegar á reyndi sá Valli sér hins vegar ekki fært að mæta (var hugsanlega í símanum).  Dagskráin frá Valla í dag hljóðaði upp á 8 x 400m spretti.  Fjölnir, Huld og Oddur fóru um Hofsvallagötu og hófu sína spretti á gatnamótum þeirrar götu og Hringbrautar.  Bjöggi ákvað að fara um Suðurgötu og hóf hann sína spretti við hringtorg þeirrar götu og Hringbrautar.  Var það samdóma álit manna að þessi æfing hefði verið hin besta skemmtun og gert mönnum og konum gott.  Alls 8,6K hjá þeim sem fóru lengst.

Frést hefur að Valli hyggist mæta á léttu æfinguna á morgun

Hádegisæfing mánudaginn 26. ágúst - Valli og Oddur sameinast

Það urðu fagnaðarfundir hjá þeim köppum Valla víðförla og Oddi er þeir mættu loks báðir í hádegishlaup í dag.  Með þeim í för voru hinir rómuðu síamskettir.  Ívar sást á vappi fyrir utan hótelið með íþróttapokann sinn en virtist ekki alveg viss um hvað hann vildi gera, talaði loks um að hann myndi æfa í einrúmi í dag.

Farinn var réttsælis hringum um flugvöllinn via Hofsvallagötu.  Á þriðja kílómeter, við dælustöðina, rakst hópurinn á Bjögga Bronco og Þórdísi, en þau höfðu lagt fyrr af stað.  Þar norpuðu þau og virtust við fyrstu sýn vera í reykingapásu.  Svo reyndist ekki vera heldur voru þau að teygja af öllum lífs og sálarkröftum.  Menn köstuðu kveðju á landann og straujuðu svo burt.

Alls 8,6K hjá þeim sem lengst fóru.

Úrslit í RM maraþoninu

Eftirfarandi félagsmenn tóku þátt í Reykjavíkurmaraþoni á laugardaginn og fara úrslit hér á eftir.  Byssutími er fyrri tími, flögutími sá seinni:

Maraþon
Dagur B. Egonsson 3:23:48/3:23:40
Ólafur Briem 3:31:29/3:31:23
Rúna Rut Ragnarsdóttir 4:11:26/4:09:15


1/2 maraþon
Kári Steinn Karlsson 1:07:40/1:07:37
 

10K
Þórólfur Þ. Þórsson 36:29/36:26
Arndís Ýr Hafþórsdóttir 38:37/38:34
Jakob Schweitz Þorsteinsson 43:24/43:14Bertel Ólafsson 52:30/51:43
Anna Dís Sveinbjörnsdóttir 54:53/53:22
Matthías Sveinbjörnsson 57:26/56:00
Ársæll Harðarsson (hleypur undir nafninu Ingibjörg Kristjánsd.) 57:27/55:57
Ívar S. Kristinsson 57:28/55:53
Fjölnir Þ. Árnason 1:01:32/59:41
Inga Lára Gylfadóttir 1:02:00/1:00:48
Inga Rut Jónsdóttir 1:02:04/1:00:22

Ef einhver nöfn vantar í upptalninguna hér að ofan þá vinsamlegast sendið kvartanir og athugasemdir á oar@icelandair.is ásamt tímum.

Æfingarplan fyrir viku 35

Mánudagur: Rólegt 7-9 km
Þriðjudagur: 8*400 m sprettir á 5 km pace.
Miðvikudagur: Rólegt 7-9 km
Fimmtudagur: 40 mín tempó. Hérna er upplagt að mæta í Fossvogshlaupið, sjá á hlaup.is
Föstudagur: Rólegt 7-9 km
Laugardagur: 90 mín (3/1).

Kveðja,
Sigurgeir

Klemminn tekur hringinn - Þér er boðið að taka þátt

Góður félagi okkar í Skokkklúbbi Icelandair, Klemenz Sæmundsson, hyggst næstkomandi þriðjudag (27. ágúst) leggja upp í hringferð um landið á hjóli.  Hann hyggst ljúka hringferð sinni rétt um viku síðar, eða miðvikudaginn 4. september.  Þann dag verður Klemenz fimmtugur.  Eins og þetta allt sé ekki nóg þá hyggst Klemenz ljúka hringferðinni með því hlaupa "Klemmann".  Hér að neðan má sjá nánari upplýsingar frá Klemenz um þetta allt saman:

"Nú fer að styttast í það að ég leggi af stað að hjóla hringinn. Fer af stað þriðjudaginn 27. ágúst og kem heim á afmælisdaginn minn 4. september en þá næ ég virðulegum aldri og verð fimmtugur. Í beinu framhaldi af hjólinu mun ég hlaupa „klemmann“ en hann er 23,5 km frá heimili mínu og er hlaupið til Sandgerðis og út í Garð og þaðan aftur heim. Þetta allt er til styrktar Blóðlækningadeild LSH. Er þetta ekki góð æfing fyrir okkar ágæta skokkhóp til að koma og taka þátt?"

 

 Hvað segja félagsmenn um að mæta á Reykjanesið á fimmtugsafmæli Klemenz og hlaupa "Klemmann" eða hluta hans og styrkja um leið gott málefni?   Nánari upplýsingar um "Klemmann" verða birtar er nær dregur 4. september.

Hádegisæfing föstudaginn 23. ágúst - Hver var að lýsa eftir Oddi?

Oddur mætti í dag og hljóp um bæinn í hópi fagurra símassystra.  Nokkru áður hafði Ívar læðst af stað, hann ætlaði greinilega að láta lítið fyrir sér fara (það sást samt til hans).  Götur og stígar miðbæjar þræddir af kostgæfni og m.a. hlaupið fram hjá hópi útlendinga sem hvöttu okkur áfram og sögðust komnir hingað til að hlaupa í RM á morgun.  Alls 8K í dag.

Valli víðförli virðist hafa miklar áhyggjur af fjarveru Odds, enda skiljanlegt.  Af Oddi er það að frétta að hann er búinn að vera mjög upptekinn upp á síðkastið þar sem hann þarf að vinna fyrir kargóið.  Verður svo áfram næstu daga en svo mun vonandi rofa eitthvað til.

Hádegisæfing 22. ágúst

Mættir: Dagur og Cargo Kings.

Æfing dagsins var 30 mín tempó sem allir tóku með bros á vör, fórum Hofs.

Það virðist ætla vera erfitt að halda öllum saman á æfingu. Núna þegar Fjölnir er kominn í leitinar þá erum við búin að týna öðrum í staðin! Heyrst hefur að Guðni sé ástfanginn af nýja mötuneytinu og getur ekki hætt að borða!

Oddur er týndur!



Oddur er mjög rólegur og hefur látið lítið fyrir sér fara síðustu vikur. Hann er ekki mög hlýðinn þar sem hann var geltandi stanslaust síðast þegar hann mætti á tempó æfingu og svo sást í skottið á honum á rólegri æfingu á föstudeginum. Líklega varð hann viðskila við eiganda sinn í miðbænum og vonumst við til að hann sláist aftur í hópinn á morgun þegar það verður farið í miðbæinn.

Kveðja,
Sigurgeir

Hádegisæfing 21. ágúst

Það var hrærður og stoltur þjálfari sem horfði á eftir þeim Sigrún B. og Fjölni vagga af stað í æfingu dagsins.  Sjálfur ákvað ég að taka hvíldardag enda stórverkefni framundan.

Ljóst má vera að eftir góða æfingu í gær hafa margir þurft á hvíld að halda enda heilsteikt grísafillet með kartöflubátum og dijon sinnepssósu á matseðlinum.

Yfirþjálfarinn
Dagur

 

Hádegisæfing 20. ágúst

Mættir: Bjúti, Dagur, Óli, Jói, Guðni, Hr. Lemon, Huld, Sveinbjörn, Bertel og Valli.

Bertel og Jói fór sér á meðan aðrir tóku æfinguna skv. plani.

Planið í dag voru 7 brekkusprettir og þeir voru að sjálfsögðu teknir í kirkjugarðinum! Ekki verður rætt um tímana sem sáust í þessum sprettum nema að þeir voru aðeins lakari en þegar við vorum öll upp á okkar besta, en ég hef fulla trú á þessum hóp og veit að þetta á bara eftir að verða betra :o)

Formleg leit hefur verið hafin af Fjölni sem hefur verið saknað síðan á þriðjudaginn í síðustu viku. Fjölnir var klæddur svörtum stuttbuxum og bláum bol merktum Edinborg maraþon síðast þegar það sást til hans. Hann er 183 cm á hæð, 110 kg og svarar nafninu Wheelie. Allir sem hafa upplýsingar um ferðir hans eru vinsamlegast beðnir um að hafa samband við undirritaðan á skrifstofu Icelandair Cargo.

Kveðja,
Sigurgeir

Æfingaráætlun í viku 34

Ég biðst afsökunar á því hversu seint þetta kemur en treysti því að allir hafi áttað sig á því að það var rólegt 7-9 km í dag :o)

Vonandi eru allir búnir að fylgja planinu og tóku sitt annað langa hlaup um helgina og klárir í viku nr. 3.

Annars lítur vikan svona út:

Þriðjudagur: 7x brekkusprettir
Miðvikudagur: Rólegir 7-9 km
Fimmtudagur: 30 mín tempó
Föstudagur: Rólegir 7-9 km. Hérna má líka taka auka hvíldardaga fyrir þá sem þess þurfa.
Laugardagur: 5 km keppnishlaup.

Kveðja,
Sigurgeir

Hádegishlaup 19. ágúst 2013

Mættir voru Huld ásamt týndu sauðunum sem auglýst var eftir á föstudaginn var, en það voru Björgvin, Dagur, Guðni og Ólafur.  Óli fór Hofsvallagötu en aðrir Suðurgötu.

Nú er helst auglýst eftir hlaupaáætlun fyrir vikuna, en í síðustu viku var lofað brekkusprettum á æfingunni sem verður á sama tíma á morgun.

GI

Föstudagur 16. ágúst - Þreytan segir til sín

Svo virðist sem þreytan sé farin að segja til sín eftir ágæta mætingu síðustu daga.  Menn eins og Valli, Guðni í Sunnu og Úle virðast alveg búnir á því og því hvergi sjáanlegir.  Hins vegar sást til Dags á bílaplaninu rétt áður en æfingin hófst.  Hann þóttist hins vegar ekkert þekkja hlaupafélaga sína þegar þeir ætluðu að kasta á hann kveðju. Honum virtist meira ummunað að vera kammó við nýju vini sína á fjórðu hæðinni, enda á leiðinni með þeim í frítt golf.

Aðeins þeir allra hraustustu mættu, þ.e. Huld, Sigrún, Oddur og Ársæll.  Ársæll fór snemma eins og svo oft áður og lá leið hans um Hofsvallagötu.  Restin fór hins vegar í bæinn við mikinn fögnuð borgarbúa.  Leiðin var gróflega þessi: Hlíðarnar - Klambratún - Laugavegur - Bankastræti - Austurstræti - Fischersund - Vesturgata - Bræðraborgarstígur - Sólvallagata - Hólavallagarður - Hljómskálagarður - Gamla-Hringbraut - HLL, alls 8,5K.

Enn og aftur undrast menn fjarveru Fjölnis.  Hann bloggaði í gær (eða var það hann sem bloggaði?) að hann myndi mæta í dag.  En viti menn, enginn fþá.

Fimmtudagur 15. ágúst - Oddur kominn í leitirnar

Fín mæting í dag þrátt fyrir vætutíð: Dag-Úle kombóið, Valli og Oddur, GI, Bjöggi bjútí og hindin Huld.  Að auki mætti Sigrún en þó ekki fyrr en æfingin var yfirstaðin, en það er nú önnur saga.

Tempóhlaup í boði Valla sem þýddi ca. 15 mínútur í upphitun, 20 tempó og 10 í niðurskokk, alls ca. 45 mínútur.  Flestir fóru um Hofsvallagötu, nema Dag-Úle kombóið sem fór enn lengra og Bjöggi sem fræsti Suðurgötu.

Almennn ánægja með þetta allt saman.

Að lokum:  Lýst var eftir Valla og Oddi.  Nú eru þeir fundnir.  Nú er lýst eftir Fjölni.  Hann ku starfa hjá Icelandair Cargo.  Hann mætir iðulega til vinnu með íþróttatösku með sér.  Að öðru leyti er lítið vitað um ferðir hans.

Hádegishlaup 14. ágúst 2013

Bertel, Dagur, Guðni og Ívar fóru Suðurgötu á 5:15 meðahraða (hraðar fyrst meðan menn voru að ná hvor öðrum og hægar eftir það).

Talið er að Óli hafi mætt og hlaupið langt.  Ekkert sást samt til hans.

Valli og Oddur báðir að sinna viðskiptavinum.

GI

Valli er fundinn!

Mættir: Guðni, Óli, Dagur, Huld, Sveinbjörn og Cargo Kings (báðir...)

Sveinbjörn fór sér.

Skv. plani voru 7x400m sprettir og það tóku allir sprettina með bros á vör enda stór plön hjá flestum fyrir HM í október.

Það hefur mikið verið rætt og skrifað um mætingu ákv. aðila, en það hefur alveg gleymst að leita af Oddi. Oddur hefur komið með stórar yfirlýsingar um árangur í HM 26. okt. en ekkert sést til hans á æfingum síðustu daga!

Hvar er Oddur?



Kveðja,
Sigurgeir

Hvar er Valli?

Hádegishlaup 12. ágúst 2013



Ársæll og Ívar hlupu Suðurgötuhring
Bertel, Dagur, Fjölnir, Guðni og Huld hlupu út á Granda og fylgdu þaðan línu út að Hörpu
Sveinbjörn var sér

Eftir hlaupið standa samt tvær spurningar.  1)  Hvaða lína er þetta eiginlega sem menn hlupu eftir og svo 2) Hvar er Valli? (eða öllu heldur Sigurgeir).

GI

Æfingarplan fyrir viku 33

Það eru nokkrir í hópnum að hefja undirbúning fyrir 1/2 maraþon (haustmaraþon félags maraþonhlaupara) sem fer fram 26. okt n.k. Einnig eru tveir drengir að æfa sig fyrir maraþonveislu sem hefst í Rvk. maraþoninu og tekur einmitt enda í HM 26. okt.

Eftir umræður gærdagsins á æfingu var ákveðið að setja vikuplan á síðuna fyrir þá sem hafa áhuga á að fara 1/2 maraþon.

Vika 33 lítur svona út:
Mánudagur: 7-9 km á rólegu pace
Þriðjudagur: Upphitun - 7x400m sprettir á 5 km pace - niðurskokk
Miðvikudagur: 7-9 km á rólegu pace
Fimmtudagur: 45 mín tempó. Upphitun -10 km pace - niðurskokk
Föstudagur: 7-9 km á rólegu pace. Hér er stefnt á að hafa fyrsta Lemon hlaupið.
Laugardagur: Langt hlaup, 90 mín.
Sunnudagur: Hvíld

Fyrir áhugasama þá er æfingaráætlunin hér: http://www.halhigdon.com/training/51133/Half-Marathon-Advanced-Training-Program

Það eru að sjálfsögðu allir velkomnir á æfingar kl. 12:08 hvort sem þeir hafa áhuga að fylgja þessu plani eða fara sínar eigin leiðir.

Sjáumst hress og kát kl. 12:08 á mánudaginn :o)

Kveðja,
Sigurgeir

Hádegishlaup 9. ágúst 2013

Ársæll, Dagur, Guðni, Huld, Óli, Sigurgeir fór bæjarrúnt í þokkalegu veðri. 

Mæting í vikunni hefur verið fín og á bara eftir að batna. 

GI

Hádegishlaup 8. ágúst 2013

Mættir:  Dagur, Guðni, Oddgeir, Ólafur.

Í símanum: Sigurgeir

Hlaupaleið:  Inn í Fossvog og yfir í Kópavog og til baka.

Veður:  Vott

GI

Hádegishlaup miðvikudaginn 7. ágúst - Á tali hjá Guðna Ingólfs

Á tíma: Dagur, Odd- og Sigurgeir.
Á öðrum tímum: Laufey, Þórólfur og Úle.
Á tali: Guðni (komst ekki þar sem hann var í símanum).

DOS hlupu út að Eiðistorgi og til baka, alls 9K.
Úle hljóp á golfvöllinn á Seltjarnarnesi og til baka, alls 16K.
Þórólfur sagðist ætla að fara mjög hægt.
Laufey sást í skóginum og ekki vitað frekar um ferðir hennar.

Ritari

Hádegishlaup 6. ágúst 2013

Bertel 7k
Odd- og Sigurgeir Hofs, 8,6k
Dagur og Guðni, Framnes, 10k
Sveinbjörn sér
María Rún sér

GI